Lookilera’n 3 - Nouveau Testament en Gulay 2004

Magtub ke Jean ndang ade njékebe nange le Nube ke Sardes

¹ «I ndang magtub nè ade doo ke danrán ke njèkan dè njékebe nange ke kem̂ ɓee-bò ke Sardes. E ke ndilge ke ji sejimute le Nube se kɔnyonge ke ji sejimute tooi jinn’t nga, tam ede nè: M’ger pa njiyei mbak. Ri ndikumgajer kuwe ɓar dèi’t karè, nè ke get ɓaa, i tò asenan se doo ke wei ɓá. E tam ede nè:

² Ute rai kalang, ade kundekem̂ lei ɓeɓer le kade gute nyanraige ke nan-in ke maji nga weii kɔke tɔ lé. Man m’an pa njiyei maje ɔr njêt tàkum Nube’t lem̂ lé.

³ Ade kem̂i olé dè tà ke i oo a, ke ndɔ ke i taa se kem̂i a tɔ. I ngonm tà nè nga a, i tel i tur hali rang a tɔ. Ke nè á i tel i ndikum lé ɓaa, m’a m’ree kubei nang bus tite njèɓog m a i ger kàde ke m’a m’tee’n dèi’t nga lé.

⁴ Nè né è bè géa, i aw se dooge ke nange kubu le de mite lé kem̂ ɓee-bò ke Sardes. Dooge nè nga à njiyei se kubuge ke nda tede asikum njiyei se’m kuwe.

⁵ Titeke bè á nanan ke tête rɔ ɓaa, d’a tule kubu ke nda káng-káng rann’t. M’a m’tuju ri’n kɔke kem̂ magtub ndikumgajer’t nga lé. Nè m’a m’tam ndàt non Bɔm’t se non dooge le’n ke danrán titeke dooge nè ei lemge kerɔte kuwe.

⁶ Nanan ke ka mbi’n tò tutu ɓaa, maje kade ur mbi’n maje oo’n tà ke Ndil ede njékebe nange le Nube nga.»

Magtub ke Jean ndang ade njékebe nange ke Philadelphie

⁷ Doo ke m’an’n nga tam ede nè: «I ndang magtub ade doo ke danrán ke njèkan dè njékebe nange ke kem̂ ɓee-bò ke Philadelphie. E ke njè tò se ninn’n a, njè tam ngarankum tà a tɔ. E uwe lakêlé le ngar David jinn’t. Ke nè á teen tà rebe ɓaa, doo karé géa asekum kutu gugu lé a, ke nè á utu tà rebe ɓaa, doo karé géa asekum teen gugu lé a tɔ. E tam ede nè:

⁸ M’ger pa njiyei mbak. An! m’teen tà rebe m’inye wei noin’t. Doo karé bè géa ase kutu tà rebe nè nga lé. Tɔgi è ndêin bè ade m’ger kuwe. Nè né è bè géa ile koje dè tà’t le’m, m i tam ede nè i ger’m lé lé.

⁹ An! njé ke kem̂ kei kebe nan’t le Sú tami edi nè n’ei Juipge. Nè ei lanmi karè m ei Juipge ke get lé. M’a m’ade d’ade ree le kɔse keje de nang noin’t a, d’ade ger titeke m’tári a tɔ.

¹⁰ Ndɔ ke m’unn ndu’m m’adi kade oré tài njak dè kundekem̂’t. Ɗarinè i an dè ndukunn le’m nga sêw-sêw; ɓaa, man géa, man m’ee der giri ndɔ nyantosowur’t. Kerɔte kuwe, nyantosowur à ree le nan dooge malang ke ndii dè nang nè.

¹¹ Man m’ree kalang. Nyan ke tò jii’t nga, uwe mong-mong tede kade doo karé bè géa taa jɔkɔ tête rɔ lei nga aw’n lé.

¹² Doo ke tête rɔ ɓaa, m’a m’ade à è kage ngaw gile kei ke tò se ninn’n le Nube le’m. M’a m’ade à tel kunde loo tee nata gile kei’t nè nga ndan lé. M’a m’ndang ri Nube le’m se ri ɓee-bò le Nube le’m dènn’t a tɔ. Ɓee-bò nè nga è Jérusalem ke kige ke in danrán ra Nube’t le’m. Doo ke tête rɔ ɓaa, m’a m’ndang ri’m ke kige dènn’t a tɔ.

¹³ Nanan ke ka mbi’n tò tutu ɓaa, maje kade ur mbi’n maje oo’n tà ke Ndil ede njékebe nange le Nube.»

Magtub ke Jean ndang ade njékebe nange ke Laodicée

¹⁴ Doo ke m’an’n nga tam ede nè: «I ndang magtub nè ade doo ke danrán ke njèkan dè njékebe nange le Nube ke kem̂ ɓee-bò ke Laodicée. Doo nè nga dé ɓar’n «Amen», maje kade è titeke bè kuwe. E ke njèkɔrgo tà ke get ke dooge undei kem̂ de dènn’t. E kuwe è ngire gir nyankundege le Nube malang. E tam ede nè:

¹⁵ M’ger pa njiyei mbak. M’ger titeke i sɔl lé a, olé lé a tɔ. Man ɓaa, m’ndinge kade i sɔl éké olé tá.

¹⁶ A ɓaa, titeke i ɔbe jɔr karè anje kolé éké sɔl nga, m’a m’tɔmoin tam’t lɔtch kɔke.

¹⁷ I tam ede nè: Man m’ee baw, nyankingege taai ra’m pel-pel, ndoo nyan karé bè géa ra’m ndan lé. Nè i ke njè nonkil, i dangte ke kumi tò ndoo, i ndoo ngain, i njèkumtɔ ke aw mburi suturu karè. Ké i ger bè lé wa?

¹⁸ M’a m’ra ndoo rai’t, tài tò njak kuwe, i ndogo se’m nar-ɔr ke dé leen poro d’ade yede’n tee ɓaa, a i baw nyankinge. I ndogo se’m kubuge ke nda i tule rai’t utu’n dè rasɔl mburi ke tò suturu. M’ra ndoo rai’t, tài tò njak kuwe, i ndogo se’m kuge i rii’n kumi ɓaa, a i tel kan loo njai-njai.

¹⁹ Man ɓaa, dooge malang ke m’tár de nga, m’ndáng de a, m’um ndêin dè de’t a tɔ. Maje kade in kalang i tur hali.

²⁰ An! m’nda tà kei’t nata m’unde tà kei. Ke nè á doo karé oo ndu’m á ɔr tà kei ade’m ɓaa, m’a m’aw kem̂ kei goon’t, m’a m’use se’n nyan a, è géa à use se’m nyan a tɔ.

²¹ Doo ke tête rɔ ɓaa, m’a m’ade à ndi se’m kutu-ngar’t le’m, titeke man géa m’tête’n rɔ ɓita m’aw m’ndi’n se Bɔ’m dè kutu-ngar’t le’n ɓai.

²² Nanan ke ka mbi’n tò tutu ɓaa, maje kade ur mbi’n maje oo’n tà ke Ndil ede njékebe nange le Nube.»