Jean 8 - Nouveau Testament en Gulay 2004

Dinye ke d’uwe’n dè dingem ke rang’t

¹ Jésu tel aw dè mbal ke kage olivierge ndai tutu.

² Nè loo ke loo à ar ɓai ɓaa, è tel aw kêm kei’t le Nube. Kosdooge malang reei rann’t. E tête ra’n ndi nang unn gir ndó de nyan.

³ Njékɔrgir gute-nduge se Pharisienge uwei dinye karé dè tò se dingem ke rang’t reei se’n undei nin non dooge’t malang.

⁴ Go’t gugu ei edi Jésu edi nè: – Njèndó dooge nyan, dinye nè nga d’uwe’n mêtch dè tò se dingem ke rang’t.

⁵ Kêm magtub gute-ndu le jéi ke Moise ndang nga, è unn ndu’n ade jèi le tile dinyege ke titeke bè se kuberi her tɔl de kɔke. Ké tà ri á a i tam dè’t wa?

⁶ Dé tam tàge nè nga titeke bè d’an-in’n kêm Jésu tede kile’n tà dènn’t. Nè è ule dè’n nang, tuje nyan nang se ngonn ji’n.

⁷ Titeke njékɔrgir gute-nduge se Pharisienge deji Jésu tà ke kété kété nga, è in ndi dè rann’t ede de ede nè: – Maje kade doo karé dann si’t ke ra majelé nja karé lé unn kuberi her ile’n dinye nè nga kété ade j’an-in.

⁸ Jésu ule dè’n nang tel unn gir tuje nyan nang se ngonn ji’n.

⁹ Loo ke dooge ooi tà nè bè ɓaa, in-in go nan’t mênênn-mênênn. Njé ke tɔgege kuwe ɔsi nang in-in kété ɓita njé ke rang uti go de ɓai. Jésu kuwe se kar’n bere á nain-in tà nan’t se dinye ke kété d’unde’n dann de’t nga.

¹⁰ Loo ke Jésu ɔr dè’n dɔ ɓaa, è an doo ke rang karé lé. E deje dinye nè nga ede nè: – Ké njé kile tà dèi’t nga ei ra wa? Ké doo karé bè géa ile tà dèi’t lé njing wa?

¹¹ Dinye nè ile jésu dè’t ede nè: – Kuwe-ɓee, doo goto. Nè Jésu tel ede’n ede nè: – Man kuwe géa m’ile tà dèi’t lé tɔ. Ɔte aw loo lei. Nè unn gir’n ɗarinè ɓaa, i ra majelé kumi ke kété lé ta.]

Jésu è lookar le dooge dè nang nè

¹² Jésu tel unn tà tam ede doobulege ede nè: – Man nga m’a m’ee lookar le dooge ke dè nang nè. Nanan ke unn rebe goom’t ɓaa à njiye dann loo ndul’t lé, nè à ndi dann lookar’t. Lookar nè nga, à ɔr non’n kaw se’n loo ndikumgajer se non.

¹³ Pharisienge tami se Jésu edi nè: – I tam tà ɔje’n dè rai i kuwe. Kɔrgo tà lei ke i ɔr nga, è kɔrgo tà ke get lé.

¹⁴ Jésu tel ile Pharisienge dè’t ede nè: – Né m’tam tà m’ɔje’n dè ra’m man kuwe géa, kɔrgo tà le’m man nga, è ngarankum kɔrgo tà kuwe tede m’ger loo ke m’in tutu á m’ree a, m’ger loo ke m’a m’aw ke tutu a tɔ. Nè sei ɓaa, i geri loo kin-in’m éké loo kaw’m lé a tɔ.

¹⁵ Sei gangi tà se go kum kan loo le doo, nè man ɓaa, m’gangtà dè doo karé’t bè lé ɓai.

¹⁶ Ke nè á m’gangtà géa, tà gang le’m è tà gang ke get tede man se kar’m lé nè Bɔ’m ke njèkule’m nga è se’m nan’t .

¹⁷ Dé ndang kêm magtub gute-ndu’t le si d’ede nè: Ke nè á dooge joo ɔri tà ade aw go nan’t ɓaa, è ngarankum kɔrgo tà kuwe.

¹⁸ Man m’ɔrgo tà m’ɔje’n dè’m man kuwe: Bɔ’m ke njèkule’m nga géa ɔrgo tà le’m tɔ.

¹⁹ Pharisienge teli deji Jésu edi nè: – Ké Bɔi nga è ra wa? Jésu tel ile de dè’t ede nè: – Sei geri man lé a, Bɔ’m géa i geri nin lé a tɔ. Ke nè á né i geri man ɓaa, ayé geri Bɔ’m nga tɔ.

²⁰ Jésu ndi ngɔr se ke kɔg-loo ngonm nar’t. E tam tàge nè nga loo ke ndi à ndó’n de nyan kêm kei le Nube. Nè doo karé bè géa uwe’n lé tede kàde’n le’n nain ɓai.

Jésu ede de tà tel kaw le’n ra Bɔn’t

²¹ Jésu tel ede Pharisienge ɓai ede nè: – M’a m’ɔte kaw, sei a sangi man pi, nè a weii dann kaiya’t le si. Loo ke m’a m’aw ke tutu nga, sei asikum kawi tutu lé.

²² Juipge deji nan edi nè: – Tam ke n’tanm n’ede nè: «Sei asikum kawi loo ke m’a m’aw tutu lé» nga, ké n’ee kuwe n’ayé tɔl rayé ta wa?

²³ Jésu tel ile de dè’t ede nè: – Sei ɓaa, sei dooge ke dè nang nè, nè man m’in dɔ danrán. Sei ɓaa, sei le nang nè, nè man ɓaa m’ee le nang nè lé.

²⁴ Gir’n ke nè á kété m’ede’n sei m’ede nè a weii dann kaiya’t le si. Ke nè á umi kêm si dèm’t titeke man m’ee Krist nga lé ɓaa, a weii dann kaiyage’t le si kerɔte kuwe.

²⁵ Juipge teli deji Jésu edi nè: – Ké i nga i nan wa? Jésu tel ile de dè’t ede nè: – Tà ke m’ede sei kété loo kunn gir’t kule’t le’m nga kuwe, m’nda dè’t njáng sár ɗarinè ɓai.

²⁶ M’aw se tàge ngain ke ɔji dè si le tam a, m’aw se tàge ngain le gang dè si’t a tɔ. Nè njèkule’m nga tam ngarankum tà. Tàge ke m’oo tann’t á m’ede dooge ke dè nang nè.

²⁷ Juipge geri titeke Jésu tam tà nè nga ɔje’n dè Bɔ’n lé.

²⁸ Jésu tel ede de ede nè: – Loo ke ndɔn’t a i ɓeri Ngonn doo dɔ kàde kage-ke-dese’t pa ɓita a i geri titeke man nga m’ee Krist. Kêm ndɔn’t nè tá a i geri titeke man kuwe m’in se dè’m m’ra nyan karé lé, nè nyange ke Bɔ’m ndó’m á m’tam tà’n m’ede sei.

²⁹ E ke njèkule’m nga, è se’m nan’t. E inye’m se kar’m lé tede m’ra nyange ke taa kum’n se ndɔ’m-ndɔ’m.

³⁰ Dooge bule undei kêm de dè Jésu’t loo ke ndi à tam’n tàge nè.

Nganrankum ndi dè pal le ngannkà Abraham

³¹ Jésu ede Juipge ke undei kêm de dènn’t ede nè: – Ke nè á sei nain-in dann tà’t le’m ɓaa, sei njékuwe-girmge kerɔte kuwe.

³² Sei a i geri ngarankum tà nga a, ngarankum tà nga ade a i ndii dè si pal a tɔ.

³³ Dé tel d’ede Jésu d’ede nè: – Jè jè ngannkà Abraham. Ndɔ karé jè ra ɓer le doo ndan lé ɓai. Ké bain á i tam ede nè: J’a tel ndi dè jè pal wa?

³⁴ Jésu tel ede de ede nè: – Kerɔte kuwe, man m’ede sei ndàt, nanan á ke inye ra’n nyein dann kaiya’t se ndɔ’n-ndɔ’n ɓaa, è ɓer le kaiya kuwe.

³⁵ Ɓer nga à ra ɓee se njénojege le’n sár se non lé. Nè ngonn ɓaa à ra ɓee se njénojege le’n sár se non.

³⁶ Ke nè á man Ngonn á m’ade i ndii dè si pal ɓaa, a i ndii dè si pal kerɔte kuwe.

³⁷ Sei ngannkà Abraham ade m’ger kuwe. Nè i sangi le kade dé tɔl’m tede tà le’m ke urkei kêm si’t lé.

³⁸ Man m’ede sei tà nyange ke m’an ra Bɔm’t, nè sei ɓaa, i rai nyange ke an-in ra bɔ si’t.

³⁹ Juipge teli edi Jésu edi nè: – Kà jé jè nga è Abraham. Jésu tel ede de ede nè: – Ke nè á sei ngannkà Abraham kerɔte ɓaa, né ayé rai nyanra Abraham.

⁴⁰ Nè man njè kede sei ngarankum tà ke m’oo tà Nube’t nga, ɗarinè sei sangi kade dé tɔl’m. Abraham nga ndɔ ke ra nyan titeke bè lé.

⁴¹ Nè sei i rai nyan ra bɔ si tcha-tcha. Juipge teli edi Jésu edi nè: – Jè nga, dé tò se nan ke kaiya’t á d’oje’n jè lé. Nè Nube kuwe karé bere luk-luk á è Bɔ jé.

⁴² Jésu ede de ede nè: – Ke nè á Nube è Bɔ si kerɔte ɓaa, né ayé tári man tede man m’in ra Nube’t á m’ree. E man kuwe m’in se dè’m m’ree lé, è è á ule’m ra si’t.

⁴³ Sei unni mbi si dè nyange ke m’ndó sei, gir’n ke nè á sei asikum ger girtàge le’m lé.

⁴⁴ Sei ɓaa, bɔ si ke le si è sú. Nyange ke ngur’n ra bɔ si pênn-pênn á sei ndigi rai. E nga, è njè tɔ koo dooge ká-ká, kété mari ke desêin sár tee ɓila. E nga, nda dè njann’t njáng dè ngarankum tà’t lé, tede ngarankum tà goto kêmn’t. Tà lanm ke è tam se ndɔge malang nga in-in kêm’n è’t kuwe tede è njè tà lanm a, è bɔ njé tà lanmge a tɔ.

⁴⁵ Nè man ɓaa, undei kêm si dèm’t lé tede ngarankum tà ke m’tam.

⁴⁶ Ké nan dann si’t asekum tɔje’m majelé ra’m wa? Ke nè á m’tam ngarankum tà ɓaa, ké bain á undei kêm si dèm’t lé wa?

⁴⁷ Nanan ke è le Nube ɓaa à ur mbi’n le koo’n tàge le Nube. Nè sei uri mbi si ooi tàge le Nube lé, tede sei sei lennge lé.

Jésu bòi dum dè Abraham

⁴⁸ Juipge teli deji Jésu edi nè: – Tam ke jè tam kété j’ede nè i doo ke kêm ɓee-bò ke Samarie karè a, kumen tò kêmi’t a tɔ nga, ké è loon’t lé wa?

⁴⁹ Jésu ile de dè’t ede nè: – Ḿ-m̀, kumen goto kêm’t. Man m’ile koje dè Bɔm’t, nè sei á ilei koje dèm’t lé.

⁵⁰ Man m’sang riɓar ke ɔje dè’m lé. Nè njèsang riɓar se njègangtà ke ɔje dè’m ndi non.

⁵¹ Kerɔte kuwe, man m’ede sei ndàt, ke nè á doo karé an dè tà le’m sêw-sêw ɓaa, à wei ndan lé.

⁵² Juipge edi Jésu edi nè: – Ɗarinè jè ger titeke kumen tò kêmi’t kerɔte kuwe. Abraham wei ɓá, njéribe-dè-tàge ke tà Nube’t géa weii ɓá a tɔ. Nè i ɓaa i tam ede nè: «Ke nè á doo karé an dè tà le’m sêw-sêw ɓaa, yo à tɔl’n ndan lé.»

⁵³ Ké i nga i bòi i dum kà jé Abraham ke ndɔ wei nè nga wa? Njéribe-dè-tàge ke tà Nube’t ke ndɔ ke weii nga, ké i bòi i dum de wa? Ké i nga i ra rai ke nan wa?

⁵⁴ Jésu ile de dè’t ede nè: – Ke nè á man kuwe m’ndi sang riɓar se dè ra’m ɓaa, riɓar le’m è nyan ke raikarè. Bɔ’m ke sei tami edi nè: «E Nube le si» nga á è njèkule ndubra dèm’t.

⁵⁵ Sei ɓaa i geri Nube lé, nè man ɓaa m’ger’n. Ke nè á m’tam m’ede nè m’ger’n lé ɓaa, m’ayé k’ee njè tà lanm titeke sei bè tɔ. Nè man ɓaa, m’ger’n, gir’n ke nè á m’an’n dè tà le’n sêw-sêw.

⁵⁶ Kà si Abraham nga ndɔ ke ra ranel kêmn’t tede le kan ndɔ ree le’m. Ndɔ ke è an ndɔ nè nga se kum’n a, ra ranel dè’t ngain a tɔ.

⁵⁷ Juipge deji Jésu edi nè: – I nga, ɓali ase kɔr-mi lé ɓai, à ké an Abraham ra wa?

⁵⁸ Jésu ede de ede nè: – Kerɔte kuwe, man m’ede sei ndàt, man m’ndi tutu kété ɓita kade d’oje kà si Abraham nga ɓai.

⁵⁹ Ke loon’t nè, Juipge ɔyi kuberi her raw tede le tile’n Jésu tɔl’n, nè è ɓɔyɔ ra’n dann doobulege’t unde loo njêl tee kêm kei le Nube aw.