Jean 4 - Nouveau Testament en Gulay 2004

Jésu ɔrgir ra’n ade dinye ke Samarie

¹ D’ede Pharisienge titeke Kuwe-ɓee Jesu aw se njékuwe-girnge ngain dum pajage le Jean a, dooge ke ule de manné njonm géa bulei ngain dumi njé ke le Jean a tɔ.

² Nè ei njékuwegir-Jesuge á ndɔ ke ulei dooge manné njonm m è Jésu kuwe lé.

³ Loo ke Jésu oo tà nè nga bè ɓaa, è sure ɓeekon ke Judée inye tel aw kêm ɓeekon ke Galilée gugu.

⁴ Nè gar-gar è à unde kêm ɓeekon ke Samarie dɔ gang.

⁵ E aw tee kêm ngonn ɓee karé ke ɓeekon ke Samarie ke ri’n nè Sychar. Ngonn ɓee nè tò kɔte loo ndɔr ke ndɔ ke Jacob gang ade ngonn’n Joseph nga.

⁶ Loo nè nga bolè mann le Jacob tò tutu. Jésu tel tête ra’n ndi nang tà bolè mann’t nè tede è njiye rebe sár ɔr. Kàde nda dann ɓee bɔp.

⁷ Dinye karé ke ɓeekon ke Samarie ree tede le kɔde mann. Jésu deje’n ede nè: – Dinye, ade’m mann ndêin m’an-in.

⁸ Njékuwe-girnge awi kêm ɓee-bò’t le sang nyankuse ndogo.

⁹ Dinye ke Samarie tam se Jésu ede nè: – Hai! dingem i i Juip, à ké a kaw kaw ri á i deje’m man ke m’ee dinye ke Samarie mann kain wa? Dinye tam tà nè nga titeke bè tede Juipge se dooge ke ɓeekon ke Samarie nga tà le de uwe nan lé.

¹⁰ Jésu tel ile dinye nè nga dè’t ede nè: – Ke nè á i ger noje ke Nube uwe sei karè nè nga a, i ger doo ke deji ede nè: Ade’m mann m’an-in a tɔ nga ɓaa, né i kuwe a in kété le deje’n mann kain, ayé kadi mann ke an-in kutch-kutch kade an-in i ndii’n kumgajer.

¹¹ Dinye nè nga tel deje Jésu ede nè: – Dingem, ka-dɔ kɔde mann goto jii’t a, bolè mann nga géa heb ngain a tɔ. Ké a inge mann lei ke an-in kutch-kutch nga loo ke ra’t wa?

¹² Kà jé Jacob se ngannenge a, se nyankulge le’n kuwe an-in mann nè kété ɓita inyei adi jè nga, ké i bòi i dum dè’n wa?

¹³ Jésu tel ile dinye nè de’t ede nè: – Nanan ke an-in mann nè nga, kunde a tel ra’n ɓai.

¹⁴ Nè doo ke an-in mann ke m’a m’ade’n nga ɓaa, kunde a tel ra’n gugu ndan lé sár. Mann ke m’a m’ade’n nga à tel ngire mann ndikumgajer ke an-in kutch-kutch kêmn’t.

¹⁵ Dinye nè nga tel deje Jésu ede nè: – Kuwe-ɓee, ade’m mann nè nga tede kade kunde tel ra’m gugu lé a, kade m’tel ree nè m’ɔde mann nè nga gugu lé ta.

¹⁶ Jésu edé ede nè: – Aw i ɓar ngawi ɓita i tel i ree nè ɓai.

¹⁷ Dinye nè nga tel ede Jésu ede nè: – Ngaw’m goto. Jésu tel edé ede nè: – Tam ke i tam ede nè: Ngaw’m goto nga è kum.

¹⁸ Oiyo, kété i taa ngaw gir mi, dingem ke i ndi se’n ɗarinè nga è ngawi lé ta. Tam ke i tam ede nè: Ngaw’m goto nga è kum kerɔte kuwe.

¹⁹ Dinye nè nga tel ede Jésu ede nè: – Dingem, m’an titeke i njèribe-dè-tà ke tà Nube’t.

²⁰ Kà jé jè dooge ke Samarie nga kété ɔji tà se Nube dè mbal’t nè. Nè sei Juipge ɓaa, i tami edi nè: Jérusalem kuwe karé á kei kɔje tà se Nube tò tutu.

²¹ Jésu tel ile dinye nè dè’t ede nè: – Dinye, um kêmi dè tà’t le’m, kàde’n ree kade awi dè mbal’t nè éké Jérusalem tá a kɔji tà se Nube tutu lé.

²² Sei dooge ke Samarie nga, i ɗɔyi Nube i geri nin lé. Nè jè Juipge ɓaa, jè ɗɔi Nube ke jè ger’n tede kaje in ra jé jè Juipge’t.

²³ Kàde kade Nube ule se Ndil ree ɗarinè ɓá. Ngarankum njé ɗɔi Nubege à ɗɔyi Bɔ’m Nube takul tɔgmong le Ndil-Kêmnda ta titeke Ngonn’n tɔje’n de rebe’n ke get. Njé ke ɗɔyi Bɔ’m Nube titeke bè á è sang de.

²⁴ Nube è Ndil, gir’n ke nè á njé ke ɗɔyi nin nga, gar-gar à ɗɔyi nin se go tɔgmong le Ndil-Kêmnda a, se ngarankum tà a tɔ.

²⁵ Dinye nè nga tel ede Jésu ede nè: – M’ger titeke Messie ke dé ɓar’n Krist nga à ree. Loo ke à ree ɓaa, à ɔrgir nyange malang kade jè dooge ke Samarie.

²⁶ Jésu tel edé ede nè: – Man ke m’nda m’tam sei tà nè kuwe á man m’ee Krist nga.

²⁷ Ke loon’t nè kuwe njékuwe-gir-Jésuge reei teei pan. Tà ige de sêl tede kan ke an-in nin nda ɔje tà se dinye nè nga. Nè né è bè géa doo karé dann de’t tel deje’n ede nè: «Ké ri á i sang ra dinye nè?» éké «Tà ri á ɔje se’n wa?» bè lé.

²⁸ Ke loon’t nè kuwe dinye nè inye ku mann le’n nang, è tel aw ɓéee ede dooge ede nè:

²⁹ – I reei an-in dingem karé ke ɔrgir nyan ramge malang ke m’ra kété nga ndát-ndát. Ké dingem nè è Krist nga lé ɓai wa?

³⁰ Dooge undei loo kêm ɓee-bò’t teei dik-dik awi ke ra Jésu’t.

³¹ Loo ke nja de nain rebe ɓai-ɓaa, njékuwe-gir-Jésuge awi se’n kabr-kabr edi nè: – Ngar, use nyan ndêin ɓita.

³² Nè è ede de ede nè: – Man m’aw se nyankuse’m laa nè sei á i geri lé.

³³ Njékuwe-gir-Jésuge deji nan edi nè: – Ké nan ree se nyankuse ade n’use gugu laa wa?

³⁴ Jésu tel ile de dè’t ede nè: – Ra nyan ke kêm njèkule’m ndige a, kɔr son kule le’n ke um jim’t a tɔ á è mur le’m man.

³⁵ Ɗarinè nan sa ko nain sɔ ta, ké i tami bè lé wa? Nè man m’ede sei: Unni kum si an-in koge idi kum sa ɓá ta.

³⁶ Njè sa ko inge nyan kuge dè ji’n ɓá a, è kebe njar nyan ke ɔje dè ndikumgajer se non a tɔ. Titeke bè á njè dubu nyan se njè sa nyan ali ra de nan’t mbak.

³⁷ Gostà ke dé tam d’ede nè: «Njèndɔr è karé nè njékusege bulei» nga, è kum kerɔte kuwe.

³⁸ Man m’ule sei kêm ndɔr ke sei ulei ra si ndibe tutu lé. Njé ke rang á ulei ra de ndibe tutu ɓita sei ubei maje’n ɓai.

³⁹ Dooge bule ke kêm ngonn ɓee ke Sychar ɓeekon ke Samarie umi kêm de dè Jésu’t tede tà ke dinye tam ede nè: «Dingem nè nga ɔrgir nyan ramge malang ke m’ra kété ndát-ndát.»

⁴⁰ Loo ke dooge ke ɓeekon ke Samarie reei teei ra Jésu’t ɓaa, ei deji nin le kade ndi se de ndêin ɓita in aw rang ɓai. E ndi se de ndɔ joo ɓita in aw kété ɓai.

⁴¹ Dooge ke rang ngain kêm ɓeekon ke Samarie umi kêm de dè Jésu’t tede tà le’n ke ei ooi se mbi de.

⁴² Dooge ke reei ra Jésu’t nga edi dinye nè edi nè: – Jè j’um kêm jé dènn’t tede tà tami nga lé ta. Nè j’um jé dènn’t tede tà tam’n ke jè kuwe j’oo se mbi jé. Jè ger titeke è nga è njé kaje dooge dè nang nè kerɔte kuwe.

Jésu aje ngonn le njèkan dè njérɔge

⁴³ Loo ke Jésu ra ndɔ joo kêm ɓee ke Sychar nè ɓaa, è tel aw kêm ɓeekon ke Galilée gugu.

⁴⁴ E Jésu kuwe ndɔ ke tam se tà’n ede nè: «Njèribe-dè-tà ke tà Nube’t nga, d’a d’ile koje dènn’t kêm ɓee kojenn’t lé.»

⁴⁵ Nè né è bè géa, loo ke è ree tee kêm ɓeekon ke Galilée ɓá ɓaa, njé ke Galilée uwei nin ke ra de’t. Ei rai titeke bè tede ndɔ ke ei géa awi loo ra nan’t Jérusalem an-in nyange malang ke ndɔ ke Jésu ra se kum de.

⁴⁶ Jésu tel ree kêm ɓee ke Cana ɓeekon ke Galilée ke ndɔ ke kété è ade mann tel yibe nduu tutu nga. Njèkan dè njérɔge le ngar karé bè ndi kêm ɓee-bò ke Capernaum. Ra ngonn’n ke dingem tur’n ngain.

⁴⁷ Loo ke doo nè oo titeke Jésu in kêm ɓeekon ke Judée ree kêm ɓeekon ke Galilée ɓaa, è aw rann’t deje’n le kade ree aje ngonn’n ke tò tà yo’t.

⁴⁸ Jésu tel ede’n ede nè: – Ke nè á sei an-in nyankɔbege se nyange ke dum kan lé ɓaa a undei kêm si dèm’t lé.

⁴⁹ Njèkan dè njérɔge le ngar tel ede Jesu ede nè: – Kuwe-ɓee i ree pa ɓita ade tà ngonn’m tête ɓai.

⁵⁰ Jésu ede doo nè nga ede nè: – Ɔte aw, ngonni ndi kumgajer ɓai. Doo nè nga um kêm’n dè tà ke Jésu ede’n ɓaa ɔte aw.

⁵¹ Loo ke è ɔte à aw ɓai ɓaa, ngann njéndige le’n tilei non’n edi nin edi nè:

⁵² – Ngonni ndi kumgajer ɓai. E deje de ede nè: – Ké kàde ke bain á ra’n ke taa por làm-làm nga inye’n wa? Dé tel d’ile’n dè’t d’ede nè: – Ra’n ke taa por làm-làm nga, inye’n tagela se kàde ke ɔte ra’n ɓêtch.

⁵³ Bɔ ngonn nè nga ger titeke è kàde ke Jésu ede’n ede nè: «Ngonni ndi kumgajer karè.» E se njékêm kei le’n malang undei kêm de dè Jésu’t.

⁵⁴ E ke nè á è nyankɔbe ke njékon’t joo ke Jésu ra loo ke ndɔ ke in-in’n kêm ɓeekon ke Judée ree’n beekon ke Galilée.