Jean 19 - Nouveau Testament en Gulay 2004

¹ Pilate unn ndu’n ade d’aw se Jésu d’unde’n se ndêin maru.

² Njérɔge ojoi jɔkɔ konn tite jɔkɔ ngar bè ulei dè Jésu’t, taɓai ulei nin kubu ke ker perm-perm.

³ Dé ree ngɔr ke rann’t d’ede’n d’ede nè: – Lapya ta ngar le Juipge. Dé tunde mbɔr’n se ji de njanm-njanm tɔ.

⁴ Pilate tel unde loo tee aw nata ra Juipge’t ede de ede nè: – An-in! man m’ade d’ade ree se Jésu nata ra si’t le kade i geri titeke man m’an tà karé ke uwe dè’n lé.

⁵ Go’t gugu, Jésu unde loo tee se jɔkɔ konn ke tite jɔkɔ ngar bè dènn’t a, se kubu ke ker perm-perm ke bòi yul rann’t a tɔ. Pilate ede de ede nè: – An-in! doo nga!

⁶ Loo ke maw njékuje nyan-mesege se pajage le de an-in Jésu pan ɓaa, ei rai nyan wuu edi nè: – I ɓeré kade kage-ke-dese’t! I ɓeré kàde kage-ke-dese’t! Pilate tel ede de ede nè: – Sei kuwe i taai n’ee awi i ɓeri n’ee kàde kage-ke-dese’t tede man ɓaa, m’an tà karé ke uwe dèyé lé.

⁷ Juipge teli ilei Pilate dè’t edi nè: – J’aw se gute-ndu karé. Se go gute-ndu le jé nè nga ɓaa, d’a tɔlé gar-gar. Tede n’ee nga n’ra rayé ke Ngonn Nube kuwe njing.

⁸ Loo ke Pilate oo tà nè nga bè ɓá ɓaa, ɓel ra’n ke kété-kété.

⁹ E tel aw kêm kei kɔg-loo gangtà’t le’n gugu, è deje Jésu ede nè: – Ké i nga girkà lei è nan wa? Nè Jésu tel ile Pilate dè tà’t lé sár.

¹⁰ Pilate tel deje Jésu ede nè: – Ké man kuwe á ile’m dè tà’t lé wa? Ké i ger titeke m’aw se tɔgmong le kinyei dɔ éké le kade dé ɓeri kàde kage-ke-dese’t lé wa?

¹¹ Jésu tel ilé dè’t ede nè: – Ke nè á ndɔ ke Nube adi tɔgmong lé ɓaa, ayé ra se’m nyan karé bè lé. Gir’n ke nè á, è ke njè kade d’uwe’m d’ule’m jii’t nga, tà uwe dè’n dum lei ɓai.

¹² Unn gir ke loon’t nè kuwe, Pilate sang rebe le kinye Jésu dɔ, nè Juipge rai nyan wuu edi nè: – Ke nè á inye doo nyan le doo nè nga dɔ ɓaa, i made César lé. Nanan ke ra ra’n ngar ɓaa, è njèkɔse tà se César.

¹³ Loo ke Pilate oo tàge nè bè ɓaa, è ade dé tee se Jésu d’aw se’n nata. Pilate al aw ndi dè ɗinger loo gangtà ke d’ube se her. Loo nè nga ri’n ke se tà hébreu è «Gabbatha.»

¹⁴ E Ndɔ kuwe dè nja nyan ra nan Paque. Kàde nda dann ɓee bɔp. Pilate ede Juipge ede nè: – An-in! ngar le si nga!

¹⁵ Juipge teli rai nyan wuu edi nè: – I tɔlé ke tɔl kuwe bè! I ɓeré kàde kage-ke-dese’t ade kumé udu kɔke. Pilate tel deje de ede nè: – Ké ngar le si nga kuwe edi nè gar-gar se m’ɓer’n kàde kage-ke-dese’t wa? Maw njékuje nyan-mesege edi nè: – Ngar le jé ke rang goto nè César kuwe karé bere.

¹⁶ Pilate ule Jésu ji Juipge’t le kade njérɔge awi se’n ɓeri nin kàde kage-ke-dese’t. Njérɔge uwei Jésu awi se’n.

Njérɔge ɓeri Jésu kàde kage-ke-dese’t

¹⁷ Jésu kuwe unn kage-ke-dese le’n oto. E unde loo tee’n kêm ɓee-bò ke Jérusalem aw’n ngang loo’t nata. E loo «Ngó-non-dooge» ke dé ɓar’n «Golgotha» se tà hébreu.

¹⁸ E loo nè á Juipge adi njérɔge ɓeri Jésu tutu se dooge ke rang joo se’n ade ilei nin danné.

¹⁹ Pilate ndang tà kêm begre-nyan’t ade dé ɓer kàde kage-ke-dese’t dɔ dè Jésu’t ede nè: «Jésu ke Nazareth ngar le Juipge.»

²⁰ Loo ke dé ɓer Jésu kàde kage-ke-dese’t tutu nga, è ngɔr se ɓee ke Jérusalem. Gir’n ke nè á, Juipge ngain asikum tutei tà ke Pilate ndang ade dé ɓer dɔ dè Jésu’t nè nga. Tà nè nga, è ndang se tà hébreu a, se tà latin a, se tà grec a tɔ.

²¹ Maw njékuje nyan-mese le Juipge naji se Pilate edi nè: – Ḿ-m̀, i ndang ngar le Juipge lé, nè, i ndang ede nè: «Doo nyan le doo nè nga tam ede nè n’ee ngar le Juipge.»

²² Pilate tel ile de dè’t ede nè: – Nyan ke m’ndang ɓá nga, à tò bè kuwe.

²³ Loo ke njérɔge ɓeri Jésu kàde kage-ke-dese’t ɓá ɓaa, ei ɔyi kubuge le’n kayai danné loo sɔ adi ɔje dè de karé-karé. Njérɔge unni kubu le Jésu ke bòi yul ke kum kur’n goto nga tɔ. Kubu nè nga d’ojo ke kojo d’in-in’n dɔ sár dé ree’n nang.

²⁴ Njérɔge edi nan edi nè: – Adi jè tili kubu ke bòi yul nè nga lé, nè adi jè turi jala dè’t j’an-in, ké nan kubu nè à è le’n wa? Titeke bè á tà ke dé ndang kêm magtub’t kété nga aw loon’t deĵ. Dé ndang d’ede nè: «Dé kai nan kubuge le’m, nè kubu le’m ke bòi yul ɓaa, dé tur jala dè’t.» E á è nyan ke njérɔge rai titeke bè.

²⁵ Kon Jésu se ngokon’n Marie, dinye le Clopas, se Marie ke ɓee le’n è Magdala ndai ngɔr kɔte kage-ke-dese’t le Jésu.

²⁶ Jésu tête kum’n an kon’n. Kon’n nda ngɔr se njèkuwe-gir’n ke è tár’n ngain. Jésu ede kon’n ede nè: – Dinye, an ngonni.

²⁷ Go’t gugu, è ede njèkuwe-gir’n nè nga ede nè: – An koin. Unn gir kêm kàdenn’t nè kuwe, njèkuwe-gir-Jésu nè aw se kon Jésu ɓee rann’t ngonm’n.

Tà Jésu tête nyonk

²⁸ Jésu ger titeke ɗarinè gir nyan malang gang ɓá. Gir’n ke nè á è tam ede nè: – Kunde mann ra’m. E tam titeke bè le kade tà ke tò kêm magtub ke tò se ninn’n aw’n loon’t deĵ.

²⁹ Mann nduu ke mase rusu jó karé bè. Njérɔge ulei kann njan tà kage ninnge’t ulei kum mann nduu ke mase’t nè nga awi ulei tà Jésu’t.

³⁰ Loo ke Jésu njibe mann nduu ke mase nè nga ɓá ɓaa, è tam ede nè: – Gir’n nyan malang gang ɓá ta. Ke loon’t nè kuwe tànn’t tête nyonk ade dè’n tel oso ragm.

Njèrɔ karé ɔse kade Jésu se ninge

³¹ Ndɔ taa kebe ke nè nga, è ndɔ taa kebe ke bò tede tò gai se madege. E ndɔ kuwe dè nja nyan ra nan Paque. Juipge ɓeli kêm de’t kade ninn Jésu se dooge ke joo ke dé ɓer de se’n nan’t tooi kàde kage-ke-dese’t, tede è ndɔ taa kebe. Gir’n ke nè á Juipge awi deji Pilate le kade ade dé tête nja Jésu se dooge ke dé ɓer de se’n kàde kage-ke-dese’t ɓita dé tɔr ninn de nang ɓai.

³² Nè dooge joo ke njérɔge ɓeri de nan’t se Jésu á dé tête nja de. Njérɔge têti nja è ke karé pa ɓita têti le è ke njèkon madenn’t joo ɓai.

³³ Nè loo ke dé ree ra Jésu’t ɓaa, d’an titeke wei ɓá. Gir’n ke nè á dé tête’n nja’n lé.

³⁴ Nè né è bè géa, njèrɔ karé dann madennge’t ɔse kêl kade Jésu se ninge dap. Ke loon’t nè kuwe, mese se mann ubei tà’t tir-tir.

³⁵ Doo ke njèkɔrgo tà nè kede sei nga an nyange nè se kum’n. Tà ke è ɔrgo nga è ngarankum tà. Doo nè nga ger titeke è tam ngarankum tà le kade sei géa undei kêm si dè Jésu’t tɔ.

³⁶ Nyange nè teei titeke bè tede kade tà ke Magtub ke tò se ninn’n tam kété nga aw’n loon’t deĵ. Dé ndang kêm magtub’t d’ede nè: «D’a tête kinge’n karé bè géa dann madege’t lé.»

³⁷ Dé ndang kêm magtub ke rang’t d’ede nè: «E ke d’ɔse kàde’n se ninge nga, d’a d’an’n se kum de ndɔ ke rang ɓai.»

Joseph ke ɓee le’n è Arimathée dubu ninn Jésu

³⁸ Go nyange ke teei’t nè nga, Joseph ke ɓee le’n è Arimathée aw deje Pilate kade inye loo ade ɔr ninn Jésu. Pilate ndige se’n dè’t. Joseph aw ɔr ninn Jésu kàde kage-ke-dese’t. Joseph nè nga, kété è njèkuwe-gir Jésu se go ngein tede è ɓel kum Juipge.

³⁹ Nicodème, ke ndɔ ke aw inge Jésu dann ndɔɔ nga géa ree tɔ. E ree se wubu ke ri’n nè myrrhe ke pɔti nan’t se wubu ke ri’n nè aloès ase kilo kɔr-mute-gidé-joo jinn’t.

⁴⁰ Joseph se Nicodème unni ninn Jésu awi ɓiri se tà kubu a, têti wubu ke ete ngain ke ri’n nè aromate dènn’t se go nyangirkà le Juipge loo dubu nan’t le de.

⁴¹ Loo ke dé ɓer Jésu kàde kage-ke-dese’t tutu nga, è ngɔr se loo man-kagege. Dé son bolè mbal ke kige kàde mbal’t kêm loo man-kagege’t nè nga. Bolè mbal nè nga dé dubu ninn doo tutu nja karé ndan lé ɓai.

⁴² Joseph se Nicodème unni ninn Jésu awi undei kêm bolè mbal ke dé son, tede è ngɔr se loo ke dé ɓer’n kàde kage-ke-dese’t. E ndɔ kuwe dè nja nyange malang ɔje dè ndɔ taa kebe le Juipge tede nain ngɔr ɓaa, kàde le ndɔ taa kebe à ase. Gir’n ke nè á d’unn’n ninn Jésu le dubu kɔke.