Jean 13 - Nouveau Testament en Gulay 2004

Jésu togo nja njékuwe-girnge

¹ Kété ɓita kade ndɔ ra nan Paque ase ɓai nga, Jésu ger titeke kàde ndɔte ɓee dè nang nè tel ke ra Bɔn’t nga ase ɓá. Njé ke le’n ke kinge’n ke ayé ndii dè nang nè ɓai nga, è tár de ngain. E tár de ade al dè loo’n.

² Loo ke Jésu se njékuwe-girnge ndii tà nyankuse’t ɓaa, sú ree dubu tà kunn dè Jésu kêm ɓengre Judas Iskariot ngonn Simon.

³ Jésu ger titeke Bɔ’n um nyange malang jinn’t. E ger titeke in ra Bɔ’n Nube’t a, à tel kaw rann’t gugu a tɔ.

⁴ Jésu ɔse nang in tà nyankuse’t, ɔr kubu le’n ke bòi yul kàdenn’t ɓaa, unn kubu ra kule dɔ’n ɓede’n.

⁵ Go’t gugu è kai mann kêm nyan’t togo’n nja njékuwe-girnge ɓita bɔr se tà kubu ke dɔ’n ɓede’n ɓai.

⁶ Loo ke Jésu ree à tee dè Simon Pierre’t ɓaa, Pierre ede’n ede nè: – Ké i Kuwe-ɓee kuwe a i togo nja’m wa?

⁷ Jésu ede Pierre ede nè: – Nyan ke m’ndi m’ra ɗarinè nga, i ger gir lé ɓai. Nè go’t gugu ɓita a i ger gir ɓai.

⁸ Pierre ede Jésu ede nè: – Ḿ-m̀, i a i togo nja’m ndan lé. Jésu ede Pierre ede nè: – Ke nè á m’togo njai lé ɓaa, tà bande le jé jè sei à gang nan’t lé njing ta.

⁹ Pierre tel ede Jésu ede nè: – Kuwe-ɓee, ke nè á è bè ɓaa, i togo nja’m se kar’n lé ta, nè maje kade i togo jimge se dè’m nan’t bere mbak ta.

¹⁰ Jésu tel ede Pierre ede nè: – Doo ke ndogo mann ɓá nga, aw ndoo togo nja’n kuwe karé bere tede ra’n bere mbak è ke unju nyang-nyang ɓá. Sei nga ra si unju ɓá, nè unji malang lé.

¹¹ Jésu ger doo ke ayé kunn dè’n nga mbak. Gir’n ke nè è tam’n ede nè: «Sei nga unji malang lé.»

¹² Loo ke è togo nja de gir gang ɓá ɓaa, è tel unn kubu le’n ke bòi yul ule rann’t gugu, tel aw ndi tà nyankuse’t. Jésu deje njékuwe-girnge ede nè: – Nyan ke m’ra se si nga, ké i geri gir’n kuwe wa?

¹³ Sei ɓari man njèndó dooge nyan a, Kuwe-ɓee a tɔ. Sei ɓari man loon’t kuwe tede man nga m’ee njèndó dooge nyan a, man Kuwe-ɓee a tɔ.

¹⁴ Man ke m’ee Kuwe-ɓee a, njèndó dooge nyan nga, ke nè á m’togo nja si ɓaa, gar-gar sei géa è tà le si le kade i togoi nja nan titeke bè tɔ.

¹⁵ E nyan-tɔje á m’tɔje sei tede kade sei géa i rai titeke man m’ra’n se si bè tɔ.

¹⁶ Kerɔte kuwe, man m’ede sei ndàt, ngonn njèndi à bòi dum dè kuwe’n lé a, ngonn njèkule à dum dè njèkule’n lé a tɔ.

¹⁷ Ɗarinè sei geri nyange nè nga ɓá. Ke nè á i rai de se ndɔ si-ndɔ si ɓaa, ra si à nel sei kuwe.

¹⁸ Tà ke m’tam nè nga m’ɔje’n dè si malang lé. Njé ke man kuwe m’tɔr de nga m’ger de mbak. Nè nyan nè nga tee titeke bè tede kade tà ke Magtub ke tò se ninn’n tam ede nè: «E ke use se’m mapa nan’t nga kuwe à tel kɔr nja’n kube’m» nga, aw loon’t deĵ.

¹⁹ Ɗarinè, man m’ede sei tà nè nga kété ɓita kade nyan’n tee ɓai. Titeke bè á loo ke nyan’n à tee ɓaa, sei a kundei kêm si dèm’t titeke man Ngonn doo nga, m’ee Krist kerɔte kuwe.

²⁰ Kerɔte kuwe, man m’ede sei ndàt, nanan ke uwe doo ke m’ule’n ke rann’t ɓaa, è man kuwe á uwe’m ke rann’t. Nanan ke uwe’m ke rann’t ɓaa, è njèkule’m kuwe á è uwe’n ke rann’t non.

Jésu ede njékuwe-girnge titeke Judas à unn dè’n

²¹ Loo ke Jésu tam tà nè bè ɓaa, kêm’n tò kekek ade tam tàkum njékuwe-girnge’t mbeng ede nè: – Kerɔte kuwe, man m’ede sei ndàt, doo karé dann si’t à unn dè’m kade dé tɔl’m.

²² Njèkuwe-girnge an-in kum nan-nan anje ger doo ke è tam tà ɔje’n dè’n.

²³ Njèkuwe-gir-Jésu karé ke è tár’n ngain ndune ra’n kàdenn’t.

²⁴ Simon Pierre tuge dè’n ade è ke Jésu tár’n ngain nga ede nè: – I dejé, ké n’tam tà nè nga n’ɔje’n dè nan wa?

²⁵ Njèkuwe-gir-Jésu ke Jésu tár’n ngain nga ile dè’n kàdenn’t tá deje’n ede nè: – Kuwe-ɓee, ké è nan wa?

²⁶ Jésu tel ile’n dè’t ede nè: – Doo ke man m’a m’tête mapa kule kum tar’t kade’n ɓaa, è è nga kuwe. Loo ke Jésu tam tà nè nga bè ɓaa, go’t gugu è tête mapa ule kum tar’t ade Judas Iskariot ngonn Simon.

²⁷ Loo ke Judas taa mapa nè use làng ɓaa, njèkêmyêr ree ur kêmn’t. Ke loon’t nè kuwe, Jésu ede’n ede nè: – Nyan ke a i ra nga, i ra kalang.

²⁸ Dann njékuwe-gir-Jésuge malang ke ndii se’n tà nyankuse’t nga, doo karé bè ke ger gir nyan ke ade tam’n se Judas tà nè titeke bè goto.

²⁹ Judas è njè ngonm mbu nar nyankuse ke dé tann. Dooge ke nange giri edi nè: Jésu ede’n kade aw ndogo nyan ke awi ndoo’n le ra’n nan Paque. Njé ke nange giri edi nè: Jésu ede’n le kade nobo njéndooge nyan.

³⁰ Loo ke Judas taa gaje mapa nè use làng ɓá ɓaa, ke loon’t nè kuwe unde loo tee nata. Loo tuge ndul bigm ɓá ta.

Ndukunn ke kige

³¹ Loo ke Judas unde loo tee nata ɓá ɓaa, Jésu tam ede nè: – Ɗarinè d’ule ndubra dè’m man Ngonn doo’t ɓá ta. Nube géa d’ule ndubra dènn’t takul’m man Ngonn doo a tɔ.

³² Ke nè á d’ule ndubra dè Nube’t takul Ngonn doo nga ɓaa, Nube kuwe géa à ule ndubra dènn’t tɔ. Nube à ule ndubra dèm’t ngɔr ta.

³³ Jésu ede njékuwe-girnge ede nè: – Ngannemge, m’a m’nain se si dè nang nè mbɔr ɓai. Ndɔn’t a i sangi man par-par. Ndɔ ke m’ede Juipge kété m’ede nè: Loo ke m’ndi m’aw ke tutu nga, sei asi kawi tutu lé. Sei géa, ɗarinè m’ede sei tà nè nga titeke bè tɔ.

³⁴ Man m’ade sei ndukunn ke kige. I tári nan titeke man géa m’tár’n sei bè tɔ.

³⁵ Ke nè á i tári nan ɓaa, dooge malang à geri sei ke njékuwe-girmge kerɔte.

Jésu ede Pierre ede nè a i naje se rai dèm’t

³⁶ Simon Pierre deje Jésu ede nè: – Kuwe-ɓee ké à aw ke ra wa? Jésu tel ile’n dè’t ede nè: – Loo ke m’ndi m’a m’aw ke tutu nga, i asekum kunn rebe goom’t ɗarinè lé ɓai, nè ndɔ ke rang ɓita a unn rebe goom’t ɓai.

³⁷ Pierre tel deje Jésu ede nè: – Ké m’a m’ase k’unn rebe gooi’t ɗarinè lé tede ri wa? Ma m’ile ra’m kɔke tede lei.

³⁸ Jésu tel deje Pierre ede nè: – Ké a ile rai kɔke tede’m wa? Kerɔte kuwe, man m’edi ndàt, a i naje se rai dèm’t nja mute ɓita kuren kunje à non kɔkerɔ kon ɓai.