Jean 12 - Nouveau Testament en Gulay 2004

Marie tête wubu ke ete sununn nja Jésu’t

¹ Jésu aw kêm ɓee ke Béthanie, ra ndɔ mute-mute ɓita ndɔ ra nan Paque ase deje ɓai. Béthanie nga, è ɓee le Lazare ke ndɔ ke Jésu ade tɔse ndel in gir yo’t.

² Dé ra nyankuse se ri Jésu. Marthe è njè kai dooge nyankuse. Lazare géa è nan’t se dooge ke ndi à usei nyan se Jésu.

³ Marie unn wubu ke dé ra se walé nyan karé ke ri’n nè nard. E ree se wubu ke nar’n è ngain nè nga ngɔr se litre karé, ɔr tà tête nja Jésu’t, taɓai bɔr nja Jésu se bin dè’n. Kete wubu nè nga taa loo ke kêm kei nè pel-pel.

⁴ Wong ra Judas Iskariot njèkuwe-gir-Jésu ke karé dann madennge’t ke ayé kunn dè’n. Judas tam ede nè:

⁵ – Ké bain á d’ige wubu itir nè nga kum nar kule ke ndɔ aru mute le kai nar’n njéndooge lé wa?

⁶ Judas nga usu’n nyan dè njéndooge’t lé, nè è tam tà nè nga titeke bè tede k’ee ke è njè koto mbu nar nyankuse ke dé tann d’ade ngonm. E mêndé nar nè nga ndêin-ndêin.

⁷ Jésu ede nè: – Inyé ade n’tête wubu nè nga dèm’t kété ɓita ndɔn’t dé dubu’m ɓai.

⁸ Njéndooge nga à ndii se si se ndɔge malang. Nè man ɓaa, m’a m’ndi se si se ndɔ’m-ndɔ’m lé.

Juipge ɔri nan tà dè Lazare’t le tɔl’n

⁹ Juipge bule ngain ooi titeke Jésu ndi kêm ɓee ke Béthanie. Ei reei som-som tede le kan Jésu á se kar’n lé. Nè ei reei le kan-in Lazare ke Jésu ade tɔse ndel in gir yo’t nga tɔ.

¹⁰ Unn gir kêm ndɔn’t nè nga, maw njékuje nyan-mesege ɔji njáng le kade dé tɔl Lazare kɔke.

¹¹ E tede tà le Lazare nè á Juipge bule inyei go maw njékuje nyan-mesege ɓaa undei kêm de dè Jésu’t tá ta.

Jésu aw kêm ɓee-bò ke Jérusalem tite ngar bè

¹² Jésu ree loo ra nan’t kêm ɓee-bò ke Jérusalem. Barè lookar’n kuwe doobulege ooi tà ree le’n.

¹³ Dooge têti balkum kage marge ji de’t kêl-kêl tilei kum’n gide ɓee-bò’t nata. Dé ra nyan bòi beng-beng d’ede nè: – I ɗɔyi Nube! Ngar le Israel ke ree se ri Kuwe-ɓee nga, maje kade dè’n mong kang-kang.

¹⁴ Jésu inge ngonn koro al ndi dènn’t se go tà ke dé ndang kêm Magtub’t d’ede nè:

¹⁵ «Sei dooge ke kêm ɓee-bò ke Sion i ɓeli lé! An-in! Ngar le si al ngonn koro à ree’n non.»

¹⁶ Nyan ke Jésu ra nè nga, njékuwe-girnge geri gir ke loon’t nè lé ɓai. Nè ndɔ ke d’ule ndubra dènn’t pa ɓita kêm de à olé dè’t titeke tà nè nga dé ndang d’ɔje’n dè’n. Unn gir kêm ndɔn’t nè nga ɓita njèkuwe-gir-Jésuge geri titeke nyange ke dooge rai se’n nga awi nan’t deĵ se tà ke dé ndang d’ɔje’n dè’n ɓai.

¹⁷ Doobulege ke ndɔ ke ei nan’t se Jésu loo ke ndɔ ke ɓar’n Lazare ade tɔse’n ndel in gir yo’t nga, ɔri ser nyan ke an-in se kum de adi dooge ke rang ooi ke kété-kété.

¹⁸ Gir’n ke nè á doobulege in-in tilei kum Jésu tede ooi ser nyankɔbe ke ndɔ ke è ra nga.

¹⁹ Pharisienge edi nan ede nè: – An-in! nyan karé bè ke soo jéi’t goto ta tede dooge malang ndɔmin nan goyé’t ɓá ta.

Grec ke nange ndigi kan-in Jésu

²⁰ Dooge reei kêm ɓee-bò ke Jérusalem loo ra nan’t tede le ɗɔi Nube. Grec ke nange ei se de tɔ.

²¹ Grecge nè nga awi ra Philippe’t ke ɓee le’n è Bethsaida, ɓeekon ke Galilée ei deji edi nè: – Dingem, jè ndige le kan Jésu.

²² Philippe in se tà nè aw’n ede André ɓita in-in nan’t joo mbak awi edi Jésu ɓai.

²³ E ile de dè’t ede nè: – Gar-gar kàde kule ndubra dè’m man Ngonn doo’t nga ase ɓá ta.

²⁴ Kerɔte kuwe, man m’ede sei ndàt, ke nè á njar ko ke doo dubu nang nga wei lé ɓaa à è kum’n ke karé bere kɔke nè kuwe. Nè ke nè á wei ɓaa, ko’n à il ngain ke kété-kété.

²⁵ Nanan ke ndige ra’n ɓaa à ile ra’n kɔke salang ɓai. Nè nanan ke an ra’n ke nyan lé tede le Nube dè nang nè ɓaa à ngonm ra’n ndii’n kumgajer se non.

²⁶ Ke nè á doo karé ndige ra nyan kade’m ɓaa, gar-gar à unn rebe goom’t. Loo ke m’ndi tutu nga, ngonn njèndi le’m géa à ndi se’m tutu tɔ. Ke nè á doo karé ra nyan ade’m ɓaa, Bɔ’m à uge dè ji’n.

Jésu tam tà ke ɔje dè kwei le’n

²⁷ Ɗarinè kêm’m tò kekek. Nè ké ri á m’a ra wa? Ké m’a deji Bɔ’m le kade taa’m tà yo’t kêm kàdenn’t nè wa? M’ree tede le kwei ɓaa, m’a m’wei kuwe.

²⁸ Bɔ’m, i kile tɔgmong lei ke nata ade dooge geri! Ke loon’t nè kuwe ndu Nube ɓar danrán ede nè: – M’kile tɔgmong le’m ke nata kété ɓá. Nè m’a m’tel kile tɔgmong le’m ke nata kade d’an nja karé ɓai.

²⁹ Doobulege ke ndai loon’t nè ooi ɓaa, njé ke nange tami edi nè: – E ndi á ndang. Njé ke rang tami edi nè: – E doo ke danrán á ɔje seyé tà.

³⁰ Jésu tel unn tà tam ede nè: – Ndu Nube ke ɓar nè nga è tede le’m man lé, nè è tede le si sei.

³¹ Tà ke Nube à gang dè dooge ke dè nang nè nga, ɗarinè unn gir’n ɓá ta. Ngar le njé ke dè nang nè nga, Nube à sure’n kile’n nata ɗarinè ta.

³² Man nga, loo ke ndɔn’t d’a d’unn’m lat kɔke dè nang nè ɓaa, m’a m’ndɔr dooge malang ke ram’t.

³³ Jésu tam tà nè nga titeke bè ɔje’n dè ɓer ke d’ayé ɓer’n kade kage-ke-dese’t.

³⁴ Doobulege ilei Jésu dè’t edi nè: – Magtub gute-ndu ede jè kété titeke Krist nga à ndi kumgajer se non dè nang nè. A ɓaa, ké bain taɓai á i tam ede nè: «Gar-gar d’a d’unn Ngonn doo nga lat kɔke dè nang nè» ɓai wa? Ké Ngonn doo nè nga è nan wa?

³⁵ Jésu ile de dè’t ede nè: – Sei awi se lookar dann si’t laa mbɔr ɓai. I njiyei awi se gir kàde m adi tilkus sebe dè si’t rebe lé. Titeke bè á tilkus à ree kube’n sei nang bɔp lé. Doo ke njiye dann tilkus’t nga ger loo ke aw ke tutu lé.

³⁶ Ɗarinè sei awi se lookar ɓai. Undei kêm si dènn’t le kade i teli ngann lookarge ke get. Loo ke Jésu tam tàge nè nga gir gang ɓá ɓaa, è ɔr ra’n jêke^ aw ɓɔyɔ ra’n ade doobulege an-in nin lé.

Kunn mbi dè tà’t le Juipge

³⁷ Jésu ra nyankɔbege ngain ade Juipge an-in kuwe. Nè né è bè géa unni mbi de dè tà’t le’n.

³⁸ Juipge rai titeke bè le kade tà ke Esaie njèribe-dè-tà ke tà Nube’t tam kété mari aw’n loon’t deĵ. E tam ede nè: «Kuwe-ɓee, ké nange á undei kêm de dè tà’t le jé nga wa? Ké nange á ndɔ ke kété Nube tɔje de tɔgmong le’n wa?»

³⁹ Esaie njèribe-dè-tà ke tà Nube’t tel ɔrgir nyan ke ade Juipge asi kundei kêm de dè Nube’t lé nga ede nè:

⁴⁰ «Kosdooge nè nga, Nube libe kum de ade an-in loo lé. E ade ngarankêm de tɔ kuju tà mbêt lé. Ke nè á kum kosdooge an loo a, ngarankêm de tɔ kuju tà a tɔ ɓaa, bainléa à ɔsi wan teli ke ra Nube’t kade aje de.»

⁴¹ Esaie tam tà nè nga titeke bè tede ndɔ ke kété an ndubra le Jésu se kum’n. Gir’n ke nè á è tam’n tà ɔje’n dè Jésu.

⁴² Nè nè bè géa, dooge ngain dann njékɔr non Juipge’t undei kêm de dè Jésu’t. Nè rai se go ngein tede rɔ ke Pharisienge à rɔi de kêm kei kebe nan’t.

⁴³ Njékɔr non Juipge rai titeke bè tede undei riɓar ke in ra dooge’t tá ngain dum riɓar ke in ra Nube’t.

Tàge le Jésu à gangtà dè njé mbatennge’t

⁴⁴ Jesu tam se ndu’n ke bòi beng ede nè: – Nanan ke unde kêm’n dèm’t ɓaa è man á unde kêm’n dèm’t lé, nè è njékule’m kuwe á è unde kêm’n dènn’t non.

⁴⁵ Nanan ke ter’m maje ɓaa, è an njékule’m nga ɓá ta.

⁴⁶ Man nga m’ee lookar ke m’ree dè nang nè. Nanan ke unde kêm’n dèm’t ɓaa à ndi dann tilkus’t se ndɔ’n-ndɔ’n lé.

⁴⁷ Ke nè á doo karé oo tàge le’m á an go sêw-sêw lé ɓaa, è man á m’a m’gangtà dènn’t lé. Man ɓaa, m’ree tede gangtà dè dooge ke dè nang nè lé, nè tede kaje de.

⁴⁸ Nanan ke ute’m mbeng taa tàge le’m lé ɓaa, njègangtà dènn’t ndi tutu ɓá ta. Tà le’m ke m’tam nga kuwe à gangtà dènn’t ndɔ ke ngeinn’t.

⁴⁹ E man kuwe á m’in se dè ra’m m’tam tàge nè nga lé, nè Bɔ’m ke njèkule’m kuwe á unn ndu’n ade’m ɔje dè tàge ke kum tam se kile mber’n a tɔ.

⁵⁰ Man m’ger titeke ndukunn le’n nga, è ndikumgajer se non. Tà ke m’ndi m’tam nga, è gute-ndu Bɔ’m kuwe á m’tam.