Jean 10 - Nouveau Testament en Gulay 2004

Gostà ke ɔje dè batege se njèkul de

¹ Kerɔte kuwe, man m’ede sei ndàt, doo ke ree se tà rebe gar batege lé, nè al se tà rebe ke rang tá ree’n go batege ɓaa, è njèɓog a, è gon-ɓog a tɔ.

² Nè doo ke aw kei go batege se tà rebe gar batege nga, è njèkul batege kuwe.

³ Njè ngonm tà rebe gar batege teen tà rebe ade’n. Batege uri mbi de ooi ndu njèkul de nga. Batege ke ei lennge nga, è ɓar de se ri de karé-karé tee se de nata.

⁴ Loo ke è tee se batege ke kinge’n malang nata ɓá ɓaa, è oso non de’t kété. Batege geri ndu’n. Gir’n ke nè á umi nan goon’t.

⁵ Doo ke in rang ke batege geri ndu’n lé nga, à umi nan goon’t ndan lé. Nè loo an-in doo ke in rang ɓaa, à an-in nan kawi ndai heb se’n, tede dooge ke in-in rang nga ei mbage m dé ger ndu de lé.

⁶ Jésu ede Pharisienge tà nè nga se gos titeke bè, nè geri gir tà ke è ede de nga lé.

Jésu è njèkul batege ke get

⁷ Jésu tel ede de ede nè: – Kerɔte kuwe, man m’ede sei ndàt, man nga m’ee tàbit kei rebe gar batege.

⁸ Njé ke reei kété nonm’t malang ei njéɓog-ge se gon-ɓogege a tɔ. Nè batege uri mbi de ooi ndu de lé.

⁹ Man nga m’ee tàbit kei rebe. Ke nè á doo ree se rebe ke ram’t ɓaa, d’a d’aje’n. Doo nè nga à aw kei a, à unde loo tee nata a tɔ. Taɓai doo nè nga à inge nyan kul ra’n a tɔ.

¹⁰ Njèɓog nga ree tede ɓoge batege a, tɔl de a, le tuju de a tɔ. Nè man ɓaa, m’ree le kade dooge se batege ndii kumgajer adi ase de nák-nák.

¹¹ Man m’ee njèkul batege ke get. Njèkul batege ke get ile ra’n kɔke tede batege le’n.

¹² Doo ke batege ei le’n lé nga, è ul de tede kinge’n nar karè. Loo ke an heng à ree ɓaa, inye batege an-in aw, ade heng ree yal batege karé-karé.

¹³ E tee an-in tede è njèkul batege lé.

¹⁴ Man m’ee njèkul batege ke get. Man m’ger batege le’m a, batege le’m géa geri man a tɔ.

¹⁵ Bɔ’m ger’m tede man géa m’ger’n a tɔ. Gir’n ke nè m’ile’n ra’m kɔke tede le batege le’m.

¹⁶ M’aw se batege ke rang ke ndai kêm gar’t nè nga lé ɓai. Dé nè nga, gar-gar è tà le kade m’ɔse nja de nan’t tɔ. D’a d’oo ndu’m, d’a dé kos batege ke karé luk-luk, njèkul de géa à è karé luk-luk a tɔ.

¹⁷ M’ile ra’m kɔke ɓila nè m’a m’tel ndi kumgajer gugu ɓai. Gir’n ke nè á Bɔ’m tár’m ngain.

¹⁸ Doo karé ke asekum tɔl’m se dè ra’n goto, nè man kuwe m’inye ra’m m’ade yo. M’aw se tɔgmong le kinye ra’m kade yo a, m’aw se tɔgmong le tel ndi kumgajer gugu a tɔ. E ke nè á è nyan ke Bɔ’m unn’n ndu’n ade’m le kade’m m’ra.

¹⁹ Tà tin nan oso dann Juipge’t tede tàge ke Jésu tam ɗarinè nga.

²⁰ Njè ke nange bule dann de’t tami edi nè: – N’ee nga, kumen tò kêmé’t a, bile rayé a tɔ. Ké uri mbi si ooi ta leyé tede ri wa?

²¹ Njé ke rang tami edi nè: – Tàge nè nga è tà tam doo ke bile ra’n lé. Ké doo ke njè bile ase kum kade njékumtɔge an-in loo wa?

Juipge mbati kundei kêm de dè Jésu’t

²² Kei le Nube ke tò kêm ɓee-bò ke Jérusalem nga, dé ra nan’n. E nan ke ɔje dè kɔr kei nè a, se ɗinger loo nyankuje-mese gonm a tɔ. Dé ra nan nè nga tà kuli.

²³ Jésu ringe gile kei’t le Nube ke dé ɓar’n pal le Salomon.

²⁴ Juipge an-in dè Jésu girm ulei nan’t ɓaa, deji nin edi nè: – Ké ndɔ ke ra a ade kêm jé à oso nang pon wa? Ke nè á i Krist nga ɓaa, ede jè ndàt ade j’oo.

²⁵ Jésu ile de dè’t ede nè: – Tà nè nga m’ede sei kété ɓá, nè unni mbi si dè’t. Nyankɔbege ke Bɔ’m ade’m m’ra se ri’n nga, ɔri go tàge le’m titeke m’ee Krist nga kuwe.

²⁶ Nè sei undei kêm si dè’t lé, tede sei dann batege’t le’m nga lé titeke m’tam’n kété.

²⁷ Batege le’m nga uri mbi de ooi ndu’m. Man m’ger de mbak, à umi nan goom’t a tɔ.

²⁸ Man m’ade à ndii kumgajer se non m à weii ndan lé sár doo karé bè géa asekum kuwe de hont kɔr de jim’t lé a tɔ.

²⁹ Bɔ’m ke njè kade’m se de nga, tɔgmong le’n dum dè le dooge malang. Doo karé bè ke asekum nanr de taa de jinn’t goto.

³⁰ Man se Bɔ’m jè karé.

³¹ Juipge teli ɔyi kuberi her raw le tilei Jésu tɔlii kɔke.

³² Jésu tel ile de dè’t ede nè: – M’ra nyange ke maje bule se tɔgmong le Bɔ’m m’ade an-in ɓá. Ké è tede è ke ra taɓai á a i tilei man se kuberi her tɔli man wa?

³³ Juipge teli ilei Jésu dè’t edi nè: – E tede nede ke i nede Nube. Taɓai i i doo ndul karè, nè i ra rai ke Nube. Gir’n ke nè á jè ndige tilei se kuberi her tɔli m è tede nyan rai ke maje nga lé.

³⁴ Jésu tel deje de ede nè: – Kété kuwe man m’ede sei m’ede nè: «Sei sei kum gute tà Nube.» Ké dé ndang tà nè nga kêm Magtub mann-ra le si ke mari’t lé wa?

³⁵ Njé ke tà le Nube oso mbi de’t nga, loo ke nange Magtub mann-ra ke mari ɓar de kum gute tà Nube. Tà ke tò kêm Magtub ke tò se ninn’n nga, doo asekum kɔr kile kɔke tuju’n lé.

³⁶ Man nga, Bɔ’m Nube ɔr’m unde’m se ninn’n kété ɓita ule’m dè nang nè ɓai. Ké bain á m’ede nè man Ngonn’n ɓaa sei tami edi nè m’nede’n taɓai wa?

³⁷ Ke nè á m’ra nyange se tɔgmong le Bɔ’m lé ɓaa, undei kêm si dèm’t lé.

³⁸ Ke nè á undei kêmi si dè’m man’t lé géa, undei kêm si dè nyange ke ndɔ ke m’ra se tɔgmong le Bɔ’m. Titeke bè á a i geri nja karé ke ngang’n titeke Bɔ’m um se’m nan’t bɔk a, man géa m’um se’n nan’t bɔk a tɔ.

³⁹ Nja karé ɓai, Juipge teli sangi le kuwei Jésu kuwe ɓai, nè è tee dann de’t njêl aw.

Jésu tel aw gugu gide ba ke Jourdain

⁴⁰ Jésu tel aw gugu gide ba ke Jourdain nú ndi tutu. E loo ke ndɔ ke kété Jean unn gir kule dooge manné njonm tutu.

⁴¹ Dooge ngain reei ra Jésu’t edi nin edi nè: – Jean nga ndɔ ke ra nyankɔbe karé bè lé. Nè tàge malang ke ndɔ ke tam ɔje’n dèi i Jésu nga, è ngarankum tà kerɔte.

⁴² Dooge ngain ke gide ba ke Jourdain undei kêm de dè Jésu’t.