Jean 1 - Nouveau Testament en Gulay 2004

Jean ndang tà ɔje’n dè Jésu Ngonn Nube

¹ Kété ɓita kade Nube unde nang nè nga, tà ndi tutu. Tà nè ndi nan’t se Nube kété mari. Tà nè nga kuwe è Nube a tɔ.

² E ndi nan’t se Nube loo kunde gir nang’t.

³ Nube ra nyange malang se takul’n. Nyan karé bè ke tò se dè ra’n anje’n è goto.

⁴ Takul’n è á nyange malang ndii kumgajer. Ndikumgajer nè nga è lookar le dooge.

⁵ Lookar nè nga ade loo ar dè tilkus’t, nè tilkus ase suin tà’n lé.

⁶ Nube ule doo karé bè ke ri’n nè Jean.

⁷ Doo nè ree le kɔrgo tà le lookar kade dooge malang undei kêm de dè tà ke è ɔrgo.

⁸ Jean nga è lookar lé ɓai, nè è ree le kɔrgo tà le lookar.

⁹ Lookar ke get-get nga ree dè nang nè. Nanan géa è ade loo ar dènn’t.

¹⁰ Lookar nè nga ndi dè nang nè kété mari. Nube ra nyange malang ke dè nang nè takul’n, nè né è bè géa dooge ke dè nang nè geri nin lé.

¹¹ E ree ɓéee le njé ke le’n, nè njé ke lé’n uwei nin ke ra de’t lé.

¹² Nè dooge malang ke uwei nin ke ra de’t undei kêm de dènn’t ɓaa, ade de tɔgmong le kade teli ei ngann le Nube.

¹³ Ei nè nga teli ei ngann le Nube se go girkoje le de ke dè nang nè lé. Nè girkoje le de in ra Nube’t ke njè kade de kebe ke kige.

¹⁴ Tà nè nga, tel è danra doo. E ra ɓee dann jéi’t j’an-in ndubra le’n tite ndubra le Ngonn dagi ke in ra Bɔ dooge’t. Kêmnoje se ngarankum tà taa ra’n pel-pel.

¹⁵ Jean ɔrgo tà ɔje’n dè Ngonn nè nga se ndu’n ke bòi ede nè: – An-in! è ke ndɔ ke m’tam tà le’n m’ede sei m’ede nè: «Doo karé ke è nonm’t kété à ree goom’t gugu non, tede è ndi tutu kété ɓita d’oje’m ɓai.»

¹⁶ Jèi malang j’ingei nyan-noje ɔse gonan-gonan takul nyanbaw le’n ke dum dè loo.

¹⁷ Nube ade jéi gute-ndu se rebe ke ra Moise’t, nè kêm-maje se ngarankum tà reei takul Jésu-Krist.

¹⁸ Doo karé bè géa an Nube se kum’n ndan lé ɓai. Nè Ngonn kêm’n ke dagi á ɔr gir’n ke nata ade jè geri.

Mber kile le Jean ke njèkule dooge manné njonm

¹⁹ E ke nè á è tà ke Jean ɔrgo loo ke Juipge ke kêm ɓee-bò ke Jérusalem ulei njékuje nyan-mesege se njé ke girkà’t le Lévi le kade dejii edi nè: – Ké i nga i nan wa?

²⁰ Jean ede de ndàt ede nè: – Man m’ee Krist nga lé ɓai.

²¹ Dé tel dé deje’n d’ede nè: – A ɓaa ké i nan ta wa? Ké i Elie wa? Jean ile de dè’t ede nè: – Man m’ee è lé. Dé tel dé deje’n d’ede’n nè: – A ɓaa ké i njèribe-dè-tà ke tà Nube’t wa? Jean ile de dè’t kuwe ɓai ede nè: – Ḿ-m̀, man m’ee è lé ɓai.

²² Dé tel dé deje’n kuwe ɓai d’ede nè: – A ɓaa ke gete nga ké i nan ta wa? Jè ndige le koo ke tài’t tede le tel kaw kede njé ke ulei jè. Ké tà ri á i kuwe i tam ɔje’n dèi wa?

²³ Jean ede de ede nè: – Man ɓaa m’ee ndu njèkile mber kêm dile’t. «Njèkile mber kêm dile’t nga tam ede nè: I rai rebe le Kuwe-ɓee adi nda danné jap» titeke ndɔ ke Esaie njèribe-dè-tà ke tà Nube’t tam’n kété nga.

²⁴ Dooge ke ndɔ ke d’ule de ra Jean’t nga ei Pharisienge.

²⁵ Ei deji Jean njèkule dooge manné njonm tà kum de ke kété-kété edi nè: – Ke nè á i Krist lé a, i Elie lé a, éké njèribe-dè-tà ke tà Nube’t lé a tɔ ɓaa, ké bain á i ule dooge manné njonm wa?

²⁶ Jean tel ile de dè’t ede nè: – Man ɓaa, mann á m’ule dooge tutu njonm karè. Nè doo karé ke sei gerii lé nda dann si’t laa.

²⁷ Doo nè nga à ree goom’t non, nè man m’asekum tɔr gabang’t ke njann’t lé.

²⁸ Nyange nè teei kêm ɓee ke Béthanie gide ba ke Jourdain’t. E loo nè á Jean ule dooge manné njonm tutu.

Jésu Ngonn Bate le Nube

²⁹ Barè lookar’n, loo ke Jean an Jesu à ree ke rann’t ɓaa, è tam ede nè: – An-in! Ngonn Bate le Nube ke njèkɔr kaiya dè dooge’t dè nang nè nga.

³⁰ E nè nga kété m’tam tà m’ɔje’n dè’n m’ede nè: «Doo karé ke è nonm’t kété à ree goom’t gugu non, tede è ndi tutu kété ɓita d’oje’m ɓai.»

³¹ Man géa m’ger’n kété lé, nè m’ree m’ule dooge manné njonm tede kade kum ngannkà Israel gang’n dènn’t njai.

³² Jean ɔrgo tà nè nga ede nè: – M’an Ndil-Kêmnda tò asenan se der-nda bè in danrán ree ndi dènn’t.

³³ Man m’ger’n kété lé ɓai, nè è ke njèkule’m kade m’ule dooge manné njonm nga ede’m ede nè: «E ke Ndil à in dɔ le ree ndi dènn’t nga á è njèkɔr dooge kunde de se ninn’n gai takul Ndil-Kêmnda.»

³⁴ Man m’an nyan nè nga se kum’m; gir’n ke nè á ndɔ ke m’tam’n titeke è nè nga è Ngonn Nube kerɔte kuwe.

Njékuwe-gir Jesuge ke desêin

³⁵ Barè lookar’n, Jean se pajage le’n joo teli ndai loo’t nè nga ɓai.

³⁶ Loo ke Jean tête kum’n pan an Jesu loo njiye’t ɓaa, è tam ede nè: – An-in! Ngonn Bate le Nube nga.

³⁷ Loo ke pajage le Jean ke joo nè nga ooi tà ke kété è tam nè nga ɓaa, ei unni rebe go Jésu’t.

³⁸ Jésu mer goo’n. Loo ke è an de d’unn rebe goon’t ɓaa, è deje de ede nè: – Ké i sangi ri wa? Dé tel d’ile’n dè’t d’ede nè: – Rabbi (tel se tà koje jéi ɓaa, è Kuwe jé) ké loo ndii è ra wa?

³⁹ Jesu ede de ede nè: – I reei a i an-in. Kêm ndɔn’t nè nga pajage le Jean awi se’n an-in loo ndi’n ɓaa ndii se’n. E tite kàde ke loo sɔlé bè.

⁴⁰ Pajage le Jean ke joo in-in unni rebe go Jésu’t se go tàge ke Jean tam kété nga. E ke karé è André, ngokon Simon Pierre.

⁴¹ André aw inge Simon ngokon’n ke le’n kuwe kété ede’n ede nè: – Jè j’inge Messie ke dé ɓar’n Krist nga ɓá.

⁴² E ɔr’n aw se’n ra Jésu’t. Loo ke Jésu tête kum’n pan an’n ɓaa, è tam ede nè: – I i Simon ngonn le Jean. D’a ɓari Céphas (tel se tà koje jéi è kuberi her ke mong).

Jésu ɓar Philippe se Nathanael

⁴³ Barè lookar’n, Jésu ndige tel kaw ɓeekon ke Galilée. E inge Philippe ɓaa ede’n ede nè: – Unn rebe goom’t.

⁴⁴ Philippe nga è doo ke Bethsaida ɓee le André se ngokon’n Pierre.

⁴⁵ Philippe aw inge Nathanael ede’n ede nè: – Doo ke magtub gute-ndu le Moise se magtubge le njéribe-dè-tàge ke tà Nube’t tami tà ɔjii dè’n nga, j’inge’n ɓá ta. Doo nè nga è Jésu ke Nazareth ngonn le Joseph.

⁴⁶ Nathanael tel deje Philippe ede nè: – Ké nyan ke maje à kin kêm ɓee ke Nazareth tɔ wa? Philippe tel ede Nathanael ede nè: – I kuwe i ree an se kumi.

⁴⁷ Loo ke Jésu an Nathanael à ree ke rann’t ɓaa, è tam tà ɔje’n dè’n ede nè: – An! ngonnkà Israel ke è ngarankum doo nga. E njè sú kum loo lé.

⁴⁸ Nathanael deje Jésu ede nè: – Ké i ger’m loo ke ra’t wa? Jésu tel ile’n dè’t ede nè: – Kété ɓita kade Philippe ɓari loo ke ndɔ ke i ndii’n gir kage koté’t nga, m’an-in mari bere.

⁴⁹ Nathanael tel tam ede nè: – Kuwe jé, i i Ngonn Nube a, i i Ngar le dooge ke kêm ɓeekon ke Israel a tɔ.

⁵⁰ Jésu ile Nathanael dè’t ede nè: – Ké um kêmi dèm’t tede tam ke m’tam sei kété m’ede nè m’an-in gir kage koté’t nga wa? A an nyange ke dum dè ège ke nè ɓai.

⁵¹ Jésu ede Nathanael se njé ke rang malang ede nè: – Kerɔte kuwe, man m’ede sei ndàt, unn gir’n ɗarinè kum danran à teen. Sei a kan-in dooge ke danrán le Nube à ali kawi dɔ a, à risi nang a tɔ tede rai nyan kadi man Ngonn doo.