Jacques 3 - Nouveau Testament en Gulay 2004

Ndon doo ade doo ra majelé

¹ Ngakonmge, è soo’t kade dooge bule teli ei njé ndó nyan made dege lé. Sei geri mbak titeke tà ke d’a gang dè jéi jèi njéndó nyan made jéige’t nga à tur ngain dum le dooge ke rang.

² Jèi malang jè rai nyange ke se go rebe’n lé nja bule. Ke nè á doo karé ur tà ninge’t salang lé ɓaa, è doo ke maje ɔr njêt kuwe. E doo ke asekum kule aljem̂ tànn’t kan-in’n ngang ra’n garar-garar.

³ J’ulei aljem̂ tà sindege’t kade ulei dè de adi jèi a, le tête’n de titeke kem̂ jéi ndige a tɔ.

⁴ An-in! batoge ke bò-bò. Nel bòge ɔsi de awi se de yo-yo, nè-nè. Nè né è bè géa, njè kunn de nda kem̂’n káng tête de titeke kem̂’n ndige takul màn de ke ngênênn bè.

⁵ Ndon doo géa è balkum ra’n ke ndêin bè tɔ. Nè è ti ra’n ngain a, oje nyange nyanmi-nyanmi a tɔ. An-in! kɔr por ke ndêin bè kuwe oso loo’t ɓaa, ró loo rák-rák.

⁶ Ndon doo nga géa tò asenan se por bè tɔ. Ndon doo nga è kei ndi le nyanrage ke pás-pàs. Ndon jéi nga ube dann balkum ra jéige’t, nè ra ade danra jéi bere mbak tel mine tanm-tanm. Ndon doo nga è njè tee se tàge ke majelé tuju’n dookundege le Nube titeke kɔr por oso’n loo’t ró’n bè. Tàge ke majelé ke ndon doo tuju’n dooge nga in loo ke tur ke dooge à non-in se mann non kum de’t tutu.

⁷ Dange gai-gai ke walé, helge se nyange ke agi nang se tà kem̂ de, dange ke dann ba-bò’t malang a tɔ nga, doo asekum kon dè de njanm-njanm kul de.

⁸ Nè ndon doo nga, doo karé bè géa ase kon’n njanm-njanm kade tò kɔtch loo karé lé. Keng’n ke tɔl’n doo rusu ra’n tap-tap.

⁹ Ndon jéi á jè ɗɔyi Kuwe-ɓee a, Bɔ jéi a tɔ. Ndon jéi ke karé nè kuwe á j’ubi se dooge ke Nube ra de adi taai nan se’n tcha-tcha a tɔ.

¹⁰ Tà doo ke karé bere nè kuwe tee se ndutɔr a, tee se ndu mann a tɔ. Ngakonmge, i rai titeke bè lé gar-gar.

¹¹ Kum kanran mann ke karé nga, ké mann ke sɔl se ke ate à teei kutch-kutch nan’t tutu wa?

¹² Ngakonmge, ké kage koté asekum kann ɗɔy wa? Ké kage nduu asekum kann koté wa? Kum kanran mann ke karé nga, mann ke tò kate jiim se mann ke sɔl asikum teei kutch-kutch nan’t tutu lé.

Kumkunju ke in danrán se kumkunju ke dè nang nè

¹³ Ké nan dann si’t á è njèkumkunju a, njègos nyanger a tɔ wa? Ke nè á njè kumkunju éké njègos nyanger è dann si’t ɓaa, maje kade ra nyange ke maje a, aw lom-lom a tɔ.

¹⁴ Ke nè á ra jang éké nin se naje nan tà rusu ɓengre si njin-njin ɓaa, i ti ra si dè kumkunju’t le si i tami tà lanm utei ngarankum tà nga mbeng lé.

¹⁵ Kerɔte kuwe, kumkunju nè nga è kumkunju ke in danrán lé. Kumkunju nè nga è kumkunju ke in ra doo ke dè nang nè a, in ra njè kem̂ majelé’t a tɔ.

¹⁶ Oiyo, Tede loo ke rara ke ra nan jang éké ra nan nin se naje nan tà tooi tutu nga, dooge awi dè nan’t kutri a, nyanrage ke majelé gai-gai in-in dè made’t ke kété-kété a tɔ.

¹⁷ Nè kumkunju ke in danrán nga à ade doo unju nyang-nyang a, à ade doo à ee’n njèkem̂lom a, njè kaw lom-lom a tɔ. Kumkunju ke in danrán nga à ade doo à è njè kile koje a, kem̂kanm à taa ra’n pel-pel a, à è njè ra nyan ke maje a, à è njè kum tà go doo karé’t lé a, à è njèkede gos lé a tɔ.

¹⁸ Dooge ke dubi kem̂lom dann made dege’t nga a ingei kann nyanra ke ɔje dè nyanra ke se dè naje’n nga tɔ.