Hebreuge 7 - Nouveau Testament en Gulay 2004

Melkisédec è ngar a, è njèkuje nyan-mese a tɔ

¹ Melkisédec nè nga, ndɔ ke è ngar ke kem̂ ɓee ke Salem. E njèkuje nyan-mese le Nube ke njè dum dè nyange malang. Loo ke ndɔ ke Abraham tête rɔ ngarge tel à ree ke ɓéee ɓaa, Melkisédec tile non’n se rebe tɔr ndu’n dènn’t.

² Nyan malang ke Abraham in’n loo rɔ’t nga, ke nè á è dɔg ɓaa è ɔr tà karé-karé ade Melkisédec. Melkisédec nga tel se tà koje jéi è «ngar ke njè ra nyan se dè naje’n». Melkisédec è ngar ke kem̂ ɓee ke Salem. Salem nga, kɔr gir’n se tà koje jéi ɓaa è «ngar ke njè kade dooge kem̂lom».

³ Melkisédec nga, Magtub ke tò se ninn’n tam tà ɔje’n dè bɔ’n se kon’n éké girkà le’n ade j’ooi lé. Jè geri ndɔ koje’n éké ndɔ kwei’n lé a tɔ. E tò asenan se Ngonn le Nube. E njèkuje nyan-mese se ndɔge malang a, se ɓal-ɓal a tɔ.

⁴ An-in! Melkisédec nga è doo ke bò. Kà jéi Abraham ndɔ ke tɔr tà nyange ke maje-maje ke in’n loo rɔ’t karé-karé ade’n. Ke nè á nyan è dɔg ɓaa, è ɔr tà karé ade Melkisédec.

⁵ Girkoje le Lévi ke ei girkà njékuje nyan-mesege nga géa, magtub gute-ndu ede de le kade ke nè á nyan le kosdooge ke Israel è dɔg ɓaa, ei deji de kade tɔri tà’n karé-karé. Ei rai titeke bè se kosdooge ke Israel ke ei ngakon dege ke girkà’t le Abraham kuwe mbain.

⁶ Melkisédec nga è girkà le Lévi lé. Nè né è bè géa, ke nè á nyan è dɔg ji Abraham’t ɓaa, è unn tà karé ade’n. Abraham è doo ke ndɔ ke Nube unn ndu’n ade’n ɓá. Nè né è bè géa, Melkisédec tɔr ndu’n dènn’t.

⁷ Kerɔte kuwe, loo n’aje’n goto. Doo ke tɔr ndu’n de madenn’t nga, è doo ke bòi dum dè made’n nè nga kuwe.

⁸ Ngannkà Lévige ke ei girkà njékuje nyan-mesege nga, ke nè á nyan è dɔg ɓaa d’unn tà karé d’ade de. Ei dooge ke yo ra ɓee kem̂ de’t kade à gotoi ndɔ karé ɓai. Melkisédec géa, ke nè á nyan è dɔg ɓaa d’unn tà’n karé d’ade’n tɔ. Nè Melkisédec ɓaa è doo ke njèndi kumgajer sár se non titeke Magtub ke tò se ninn’n tam’n nga.

⁹ Titeke Abraham ra’n, nyan è dɔg ɓaa è unn tà karé ade. Lévi kuwe géa ra titeke bè tɔ. Tede ngannkànnge géa, ke nè á nyan è dɔg ji kosdooge ke Israel ɓaa, ei unni tà karé-karé adi de.

¹⁰ Loo ke ndɔ ke Melkisédec an-in ngɔde tile kum Abraham nga, d’oje Lévi lé ɓai. Abraham è kà dɔg Lévi.

¹¹ Kem̂ magtub gute-ndu ke ɔr non kosdooge ke Israel nga, è ngannkà Lévige á d’ɔr de ke njékuje nyan-mesege. Ei njékuje nyan-mesege tite Aaron bè. Ke nè á ndɔ ke dooge asi maji kɔri njêt se go nyankuje-mese le ngannkà Lévi ɓaa, né d’a d’aw ndoo njèkuje nyan-mese ke rang ke tanan se Melkisédec lé ta.

¹² Ke nè á rebe ra nyankuje-mese tel tur tò gai ɓaa, Nube à tur magtub gute-ndu nga kade tò gai tɔ.

¹³ Krist ke dé tam tàge nè d’ɔje’n dè’n nga, è girkà ke rang’t ta. Doo karé bè ke girkà’t le’n ra kule loo ɗinger loo nyankuje-mese’t nga ndan lé.

¹⁴ Dooge malang geri njai titeke Kuwe-ɓee le jéi Jésu nga d’oje’n girkà’t le Juda. Ndɔ karé bè géa Moise tam tà ɔje’n dè girkà nè titeke ei njékuje nyan-mesege bè lé.

Jésu è njèkuje nyan-mese tite Melkisédec bè

¹⁵ Gute-ndu ke ɔje dè nyankuje-mese ke dé tur gir rang nga, è nyan ke tò nata ndái-ndái. D’ɔr njèkuje nyan-mese karé ke rang ke tite Melkisédec d’unde’n ɓá.

¹⁶ Njèkuje nyan-mese ke rang ke d’ɔr’n d’unde’n nè nga è se go ndukunnge le girkà dooge lé, nè è se go tɔgmong le njèndi kumgajer sár se non.

¹⁷ E njèkuje nyan-mese ke dé tam tà d’ɔje’n dè’n kem̂ Magtub ke tò se ninn’n d’ede nè: «I i njèkuje nyan-mese sár se non se go ra’n le Melkisédec bè.»

¹⁸ Ndukunn ke kété desêin nga dé tuju’n kɔke tede tɔg’n goto ade tel è nyan ke raikarè.

¹⁹ Gute-ndu le Moise ase kade doo ra nyan ke maje ɔr njêt tàkum Nube’t lé. Nè ɗarinè Nube ade jèi nyan kundekem̂ tchên dè’t ke maje dum madege malang. Takul’n è á j’agi ngɔr ke ra Nube’t.

²⁰ Kɔr ke Nube ɔr Krist unde’n ke njèkuje nyan-mese nga, Nube mann ra’n. Njékuje nyan-mesege ke rang ɓaa, d’unde de karè anje mann-ra.

²¹ Nè loo ke Nube ɔr Jésu unde’n ke njèkuje nyan-mese nga, è ede’n ndàt ede nè: «Kuwe-ɓee mann ra’n. E mann-ra ke à tò sár m è à tur ndu’n rang ndan lé: I a i Njèkuje nyan-mese sár se non.»

Jésu è der gir mann-ra ke maje dum

²² Gir’n ke nè á Jésu tel ee’n der gir mann-ra ke maje dum madege nè nga.

²³ Njékuje nyan-mesege ke rang bulei ngain taai gute nan-nan tede yo on ɓee dè de’t ɔge de ndii kumgajer.

²⁴ Nè Jésu ɓaa, è njèkuje nyan-mese ke doo à taa gute’n lé, tede è njèndi kumgajer sár se non.

²⁵ Gir’n ke nè á njé ke reei ra Nube’t se takul Jésu ɓaa, è ase kaje de nja karé bere ke ngang’n. Jésu nga ndi kumgajer sár se non. E ɔje tà se Nube dɔ-dɔ tede le de.

²⁶ Jésu nga è maw njèkuje nyan-mese ke j’awi ndoo’n. E tò se ninn’n gai, tà karé géa uwe dè’n lé a, nyan ke mine karé géa ɓar ri’n lé a tɔ. E ɔr ra’n ndi mbeng se njé ra majelége a, Nube unn’n unde’n dɔ mbeng dè nyange’t malang a tɔ.

²⁷ Jésu è tite maw njèkuje nyan-mesege ke rang lé. E aw ndoo kunn nyankuje-mesege kade kuge’n dè majelége le’n se le dooge ke rang se ndɔ karé-karé lé. Nè è unn ra’n è kuwe ade ke nyankuje-mese uge’n dè majelé le dooge nja karé bere luk-luk ke ngang’n.

²⁸ Gute-ndu ɔr dooge ke yo on ɓee dè de’t unde de ke njékuje nyan-mesege. Nè tà mann-ra le Nube ree utu go gute-ndu. Tà mann-ra nè ɔr Ngonn kem̂ Nube unde’n ke maw njèkuje nyan-mese ke maje ɔr njêt.