Hebreuge 6 - Nouveau Testament en Gulay 2004

¹ Bè ɓaa, ade j’inyei go nyan-ndóge ke desêin ke dé ndó jèi ɔje dè kundekem̂ dè Krist’t nga ɓaa, ade j’awi kum jéi ke kété dè nyan-ndó ke maje ɔr njêt le dooge ke tɔgi káng-káng. Ade jè teli dè nyan-ndó ke desêin’t lé ta. Nyan-ndó ke desêin nga ɔje dè kinye go nyanrage ke majelé ke à awi se jéi kile jèi tà yo’t a, ɔje dè kundekem̂ dè Nube’t a tɔ.

² Nyan-ndó ke ɔje dè kule doo manné njonm éké kile ji dè doo’t éké kunde loo tee dann njé ke koo’t éké gangtà ke se non ke a tò sár se non nga, dé ndó sei kété ɓá m j’à tel ke dè’t ɓai-ɓai lé ta.

³ Ke nè á Nube inye loo ade jè ɓaa, j’à ndó sei nyan ke ɔje dè dooge ke tɔge tá ta.

⁴ Doo ke nange ke teli osoi dann majelé’t nga, ei dooge ke ingei lookar le Nube ɓá. Ei dooge ke nan-in nyan-noje le Nube geri nel’n ɓá a, ingei Ndil-Kem̂nda ɓá a tɔ.

⁵ Dooge nè nga nan-in tà le Nube geri maje’n ɓá a, an-in nyankɔbege ke ɔje dè Konɓee le Nube ke ndi à ree nga ɓá a tɔ.

⁶ Nè né è bè géa, ei teli ɔsi kundekem̂ le de pater nali osoi gide loo’t nata. Dooge nè nga, loo tel tur hal de dum de bang ta. E dooge nè á tɔli Krist Ngonn le Nube ɓeri nin kàde kage-ke-dese’t a, ilei rasɔl dènn’t tàkum dooge’t nata ndái-ndái a tɔ.

⁷ Loo ke nang njibe mann ndi ke ede dɔ-dɔ á go’t gugu tee se kam nyange ke maje ade njéndɔrge ɓaa, Nube tɔr ndu’n dè nang’t a tɔ.

⁸ Nè né è bè géa, nang nè ade konnge se tiroge tá kujei nan hakl-hakl ɓaa, tel è nyan ke karè. Mbɔr ɓaa Nube à mann’n a, ndêin-ndêin ɓaa d’ade ró’n se por rák-rák kɔke a tɔ.

⁹ Kotárge le jé, ke nè á jè tam tàge nè nga bè géa, jè ger kem̂ jé’t mbak titeke sei umi nja si rebe ke maje ke à tee se si dè kaje’t.

¹⁰ Nube è njè banm doo lé. Kem̂’n à wei nal dè nyan ke sei rai tede tà le’n nga lé. Sei i ndii rai se njétaakem̂-Kristge ke rang kum si ke kété ɓai tede tár ke i tári Nube nga. Kem̂ Nube à wei nal dè ra ke i rai se de nga lé.

¹¹ Nè jè ndige kade nanan géa dann si’t ute ra’n kalang titeke kété sár kade è an’n nyan ke è unde kem̂’n tchên dè’t nga se kum’n ndɔ ke rang.

¹² I teli njérakatege lé ta. I ndaji kum dooge ke orèi tà de nják-nják dè kundekem̂’t le de á ingei nyan-ndube ke Nube unn ndu’n ade de nga.

Nube nda njáng dè kunn-ndu’t le’n

¹³ Ndɔ ke Nube unn’n ndu’n ade Abraham. Doo karé ke rang ke bòi dum dè Nube kade ubu ra’n se ri’n ade Abraham goto.

¹⁴ E Nube kuwe á ubu ra’n ade Abraham ede nè: «Kerɔte kuwe, man tɔr ndu’m dèi’t kade ngannkàige bulei ɗik-ɗik ke kété-kété.»

¹⁵ Ndɔ ke Abraham ile kem̂’n pon ngine’n titeke bè ɓita Nube ade’n nyan ke ndɔ unn’n ndu’n le kade nga ɓai.

¹⁶ Dooge ubi ra de se ri doo ke bòi dum dè de. Kubu ra è tà ke tɔl gang tà najege le de malang.

¹⁷ Ndɔ ke Nube ra se Abraham titeke bè tɔ. Ngannkà Abrahamge ayé kingei nyange ndɔ ke Nube unn’n ndu’n ade’n. Nube ndige kade ngannkà Abraham geri njai titeke kunn-ndu le’n n’ee Nube nga, è kunn-ndu ke tò njáng. Gir’n ke nè á è tɔl’n tà’n se kubu ra.

¹⁸ Kunn-ndu le Nube se kubu ra le’n nga ei nyange joo ke à tooi njáng. Nyange ke joo nè nga tɔji jèi titeke Nube tam tà lanm ndan lé. Nube sɔl kem̂ jéi se nyange ke joo nè nga. Gir’n ke nè á j’ubei go nyange malang j’inyei jè paberii nyan ke j’undei kem̂ jéi tchên dè’t ke Nube à ade jèi nga.

¹⁹ Kundekem̂ tchên nè nga tò asenan se nar nyan dɔɔ bato nang ke ngiring ngiring-ngiring ke jè tɔi ra jéi’t. Kundekem̂ tchên nè nga aw sár al gide kubu gang gile loo ke tò se ninn’n.

²⁰ Gile loo ke tò se ninn’n nè nga, Jésu kuwe è doo le jéi ke desêin ke ur lêbêt aw tutu tede tà le jéi. E tel è maw njèkuje nyan-mese tite Melkisédec sár se non.