Hebreuge 5 - Nouveau Testament en Gulay 2004

¹ Maw njèkuje nyan-mese ke rara géa d’ɔr’n dann dooge’t d’unde’n kade ra kule non Nube’t tede le de. E ndi le kunn nyan-noje se nyankuje-mese kade Nube tede majelé le dooge.

² Maw njèkuje nyan-mese nga géa, è njè ra majelé tite dooge nga tɔ. Gir’n ke nè á è ase kile’n kem̂’n pon dè njé ke geri nyan lé a, dè njé ke ndemi’t a tɔ.

³ Maw njèkuje nyan-mese nga è doo ke majelé ule’n poré tite dooge ke rang bè tɔ. Gir’n ke nè á è unn’n nyankuje-mese ade Nube uge’n dè majelé le dooge á se kar de lé, nè è uge’n dè majelége le’n è kuwe tɔ.

⁴ Doo karé ase kin se dè’n è kuwe ɓar ra’n maw njèkuje nyan-mese lé. Nè doo ke è Nube kuwe ɓar’n titeke ndɔ ke ɓar’n Aaron tá asekum kinge riɓar ke ɔje dè maw njèkuje nyan-mese nga ɓai.

⁵ Krist géa, le’n è titeke bè tɔ. E kuwe in se dè’n naje riɓar ke ɔje dè maw njèkuje nyan-mese lé. Nè è Nube kuwe á ede’n ede nè: «I i Ngonn kem̂’m, unn gir ɓila man m’ee bɔi.»

⁶ Nube tam tà ɔje dè Krist loo karé ke rang’t ɓai ede nè: «I i njèkuje nyan-mese sár se non tite le Melkisédec.»

⁷ Krist nga, loo ke ndɔ ke è ndi se dè’n dɔ dè nang nè ɓai nga, è ɔje tà se Nube a, è ndête’n se mann non kumn’t se ndu’n ke bòi beng a tɔ. Nube asekum taa Krist tà yo’t tede koje ke è ile dènn’t.

⁸ Krist nga è Ngonn kem̂’m Nube kuwe. Nè né è bè géa, è unn gir ndó kile koje dè bɔn’t dann nyankem̂kon malang ke ndɔ ke ra’n.

⁹ Nube tel’n ke doo ke maje ɔr njêt. Krist tel è njè kade dooge malang ke ilei koje dènn’t ndii kumgajer sár se non.

¹⁰ Kerɔte kuwe, ndɔ ke Nube ɓar Krist beng ede nè: E è maw njèkuje nyan-mese tite Melkisédec.

I rai rakate dè kundekem̂’t le si lé

¹¹ J’aw se tàge ngain le kede sei dè eige ke nè ɓai. Nè loo kɔrgir nyange nè nga ɗêi-ɗêi tur se jé tede sei i teli i rai rakate dè koo girtà kɔr sonn’t.

¹² Kò si tò ngain kade né gar-gar ɓila sei njéndó nyan made sige ta. Nè ɗarinè, sei awi ndoo kade dé tel dé ndó sei nyange le Nube titeke dé ndó’n sei nyange desêin kuwe ɓai-ɓai. Sei teli tooi asinan se ngannge ke awi ndoo mbà se mur ke mɔré tá bè.

¹³ Nanan ke ndi à ɔdenan kil mbà ɓai nga, è asekum ger gir nyan ke maje se nyan ke majelé lé tede è ngonn ke kide ɓai.

¹⁴ Nè dooge ke tɔgi káng-káng ɓaa, mur ke mɔré lé á ɔje dè de. Mur ke mɔré lé nga ɔje dè njé ke tɔge ke asi kɔri kum nyan ke maje se nyan ke majelé se ndɔ de, ndɔ de.