Hebreuge 3 - Nouveau Testament en Gulay 2004

Jésu Krist dum dè Moise

¹ Gir’n ke nè á, ngakonmge, sei ke i tooi se ninn si ke Nube ɓar sei nga, i giri dè Jésu’t. Jésu nga Nube ule’n ade è maw njèkuje nyan-mese ɔje dè kundekem̂ ke jè ndi j’ile mber’n.

² Moise nga, ndɔ ke è ke maje-kule ke ra kule le’n se ngonn koje kem̂ kei le Nube bere mbak. E Nube kuwe á ndɔ ke ɓar’n ade’n kule nè. Jésu géa ra kule ke Nube um jinn’t se ngonn koje titeke ndɔ ke Moise ra’n nga tɔ.

³ Doo ke njè kunde kei nga, d’ile riɓar dènn’t dum danra kei ɓai. Jésu nga géa d’ile riɓar dènn’t dum le Moise ɓai.

⁴ Kei ke ra ra géa, njè kunde’n ndi non. Nè njè kunde nyange malang nga è Nube.

⁵ Moise nga ndɔ ke ra kule le’n se ngonn koje kem̂ kei’t le Nube bere mbak. Nè né è bè géa, è ngonn njèndi ke Nube ade tam tà le nyange ke ndɔn’t n’ee Nube kuwe n’ayé tam tà’n ɓai nga.

⁶ Nè Krist ɓaa, è Ngonn ke ase; è á Nube ɔr’n unde’n ke njèkan dè loo kem̂ kei le’n. E ra kule le’n se ngonn koje. Ke nè á jè ndai kem̂ jéi káng dè kundekem̂ tchên ke jè ndii jè pitii ra jéi’t nga ɓaa, j’à jè kei le Nube kuwe.

Loo taa kebe le kosdooge le Nube tò non

⁷ Gir’n ke nè á Ndil-Kem̂nda tam’n ede nè: «Ke nè á ɓila ooi ndu Nube ɓaa,

⁸ adi kem̂ si nder titeke ndɔ ke kà sige rai wong in-in ilei kate kum Nube’t kem̂ dile’t nga lé ta.

⁹ Kem̂ ndɔn’t nè kà sige an-in kule ramge ke ndɔ ke m’ra ase ɓal kɔr-sɔ, nè né è bè géa, ei in-in ilei kate kum’t le nain man kan-in.

¹⁰ Gir’n ke nè á wong ra’m dè de’t kem̂ ɓaln’t nè ade m’tam’n m’ede nè: Tàgir le de ke dè ɓengre de’t aw yo-yo, nè-nè se ndɔge malang ade geri rebe nyange le’m karé bè lé.

¹¹ Kerɔte kuwe, wong ra’m ngain ade m’unn ndu’m m’ede nè: D’a d’ile nja de bè géa loo taa kebe’t le’m nga ndan lé.»

¹² Ngakonmge, undei kumkunju dè ra si’t le kade doo karé bè géa dann si’t ndi se kem̂ majelé éké kunn mbi dè tà’t tede kade ɓengre’n tel tur gide’n ade Nube ke njèndi kumgajer nga lé ta.

¹³ Nè sei kuwe i ndeji nan sár-sár adi ndɔ ke dé ɓar’n «ɓila» nga tee’n. I rai titeke bè se ndɔ si-ndɔ si tede kade majelé libe kum doo karé dann si’t ade tel è njè kem̂ nder lé ta.

¹⁴ Ke nè á jè ndai njáng dè kundekem̂’t le jéi ke desêin sár ndɔ ke ngeinn’t ɓaa, j’à j’oréi nan se Krist dè nyanbawge’t le’n kerɔte kuwe.

¹⁵ Magtub ke tò se ninn’n ede jèi ede nè: «Ke nè á ɓila ooi ndu Nube ɓaa, adi ɓengre si nder titeke ndɔ ke kà sige rai wong in-in ilei kate kum Nube’t kem̂ dile’t nga lé ta.»

¹⁶ Ké nange á ndɔ ke ooi tà le Nube mbak kuwe rai wong in-in ilei kate kumn’t wa? Ké è njé ke ndɔ ke Moise ɔr de malang kem̂ ɓeekon ke Egypte tee se de nga lé wa?

¹⁷ Ké è njé ke ra á ndɔ ke wong ra Nube dè de’t ase ɓal kɔr-sɔ nga wa? Ké è njé ke ndɔ ke rai majelé adi ninn de too’n rabak-rabak kem̂ dile’t nga lé wa?

¹⁸ Ké è njé ke ra á ndɔ ke Nube unn ndu’n ede nè: «A ilei nja de loo taa kebe’t le’m nga ndan lé» wa? Ké Nube tam tà nè nga ɔje’n dè njé ke ndɔ ke ali tà tànn’t nga lé wa?

¹⁹ Jéi j’an-in titeke ndɔ ke d’asekum kile nja de loo taa kebe’t le Nube nga ndan lé tede kunn mbi dè tà’t le de.