3 Jean 1 - Nouveau Testament en Gulay 2004

Jean ɔrgir ra’n

¹ Man ngatɔge doo nga, m’ndang magtub nè m’ade kotár le’m Gaius ke m’tár’n ke kerɔte kuwe.

² Kotár le’m, m’ndinge kade aw maje ke kété-kété ɔje dè nyange malang. M’ndinge kade danrai aw maje ke kété titeke ngarankum rai aw’n maje nga bè tɔ.

³ Ra’m nel’m ke dum tede njétaakem̂-Kristge ke nange reei edi man titeke i liger lagr-lagr dè ngarankum tà’t nga ɓai. Taɓai, ei edi man titeke i njiye se go ngarankum tà nè nga ɓai a tɔ.

⁴ Ranel le’m ke bò ngain ɓaa, è koo ke m’oo titeke ngannemge njiyei dann ngarankum tà’t se ndɔge malang.

Jean pite Gaius dè kule ra ke maje’t

⁵ Kotár le’m, i ra nyan ke maje se kem̂nda káng tede le njétaakem̂-Kristge ke ei mbage.

⁶ Dé nè nga, d’ɔrgo ser tár ke i tár de non njékebe nange’t le Nube. I ra se de dé mbage ke d’a d’aw, tede kade ile riɓar dè Nube’t.

⁷ E tede ri Jésu-Krist á dé tee d’aw’n anje kinge nyan ji njé ke geri Nube’t lé.

⁸ Dooge ke titeke bè nga, gar-gar adi j’ɔsi gir de loo kile mber ngarankum tà’t nga. Ke nè á jè rai titeke bè ɓaa, jèi njémade kulege le de kerɔte kuwe.

Diotrèphe se Démétrius

⁹ M’ndang tà karè bè ke ase loon’t m’ade njékebe nange le Nube. Diotrèphe ke ndige k’ee ngawtà de nga ute tà le jé mbeng.

¹⁰ Gir’n ke nè á loo ke ndɔn’t m’a m’aw ɓaa, m’a m’ede’n nyange ke majelé ke ra nga ndàt. Taɓai, m’a m’ede’n tàge ke majelé ke è tam ɔje’n dè jé. E ke nè kuwe ase’n lé ɓai, è mbate kuwe njétaakem̂-Kristge ke rann’t. Dooge ke ndigi kuwei de ke ra de’t géa, ɔge de dè’t a, rɔ de kɔke dann njékebe nange’t le Nube a tɔ.

¹¹ Kotár le’m, i ndaje nyanra ke majelé lé, nè i ndaje nyanra ke maje tá. Doo ke ra nyan ke maje nga è le Nube. Doo ke ra nyan ke majelé nga an Nube lé.

¹² Dooge malang ɔri go tà le Démétrius ke maje. Ngarankum tà nga kuwe géa ɔrgo tà le’n ke maje a tɔ. Nè jè géa, j’ɔrgo tà le Démétrius ke maje tɔ. I Gaius, i ger mbak titeke tà ke jè tam nga è ngarankum tà kuwe.

Lapya ke ngeinn’t

¹³ M’aw se tàge ngain le ndang kadi. Nè m’ndige le ndang tà’n kem̂ magtub’t lé.

¹⁴ M’unde kem̂’m tchên le kaw kan-in ngɔr kade j’ɔje’n nan tà se tà jé njan-njan.

¹⁵ Maje kade kem̂lom nain sei. Basa madige rai nin lapya ngain. I ra lapya made jége ke nú karé-karé se ri de-ri de ade jè tɔ.