2 Jean 1 - Nouveau Testament en Gulay 2004

Jean ɔr gir ra’n

¹ Man ngatɔge doo nga, m’ndang magtub nè m’adi i Kyria se ngannige. I nga i dinye ke d’undei se ninn’n gai. I se ngannige malang nga, m’tár sei kerɔte kuwe. E man á m’tár sei se kar’m lé, nè dooge malang ke geri ngarankum tà nga géa tári sei tɔ.

² Jè tár sei tede ngarankum tà ke urkei kem̂ jéi’t ɗarinè. Ngarankum tà nè nga à nain se jéi sár se non.

³ Maje kade kem̂noje se kem̂kanm a, se kem̂lom ke in ra Nube’t se ra Ngonn’n Jésu-Krist a tɔ, nain se jéi tede kade jè tári nan kerɔte kuwe.

Njiye dann ngarankum tà’t se tár nan

⁴ Ra’m nel’m ngain dè kinge ke m’inge ngannige njiyei dann ngarankum tà’t titeke Bɔ jéi unn’n ndu’n ade jèi.

⁵ Kyria, ɗarinè m’ra ndoo rai’t: ade jè tári nan. E ndukunn ke ndɔ ke j’ingei kété mari ke desêin nga kuwe á m’ndang m’adi m è ke kige lé.

⁶ Ke nè á jè tári Nube kerɔte ɓaa, ade jè tári nan. E ke nè á è ndukunn le Nube ke ndɔ ke j’ede sei tà’n.

Undei kumkunju dè ra si’t ɔje dè njé tam tà lanmge

⁷ Njé tam tà lanm sú’n dooge kade ndemi bule ngain undei loo teei ɗarinè ɓá ta. Njé lanmge nè nga mbati tami ndàt titeke Jésu-Krist ree dè nang nè se danra’n. Doo ke tam ndàt ede nè Jésu-Krist ree se danra’n dè nang nè lé nga, è njè tà lanm a, è njè kɔse tà se Krist a tɔ.

⁸ Undei kumkunju dè ra si’t tede kade kule ke jè ra nga tɔ ra jéi’t karè lé, nè le kade ingei nyankuge dè ji si tá.

⁹ Nanan ke nda njáng dè nyan-ndó’t le Krist lé á unn tà ke rang karè ile dè’t ɓaa, um se Nube nan’t bɔk lé. Nanan ke nda njáng dè nyan-ndó’t le Krist ɓaa, um nan’t bɔk se Nube a, se Ngonn’n a tɔ.

¹⁰ Ke nè á doo karé ree ra si’t á ree se nyan-ndó le Krist nè nga lé ɓaa, uwei nin ke ra si’t kem̂ kei le si lé a, edi nin edi nè: «I ree se maje’n» lé a tɔ.

¹¹ Ke nè á edi nin edi nè: «I ree se maje’n» ɓaa, sei umi se doo nè nan’t bɔk dè kule rannge ke majelé nga ɓá ta.

Ngei tàge le Jean

¹² M’aw se nyange bule ngain le ndang kade sei. Nè m’ndige le ndang tà’n kem̂ magtub’t lé. Nè m’unde kem̂’m tchên le kaw ra si’t kɔje se si tà se tà’m njan-njan. Titeke bè á dè ranel le jéi à maje kɔr’n njêt.

¹³ Ngann le ngokoin ke dinye ke Nube ɔr’n unde’n se ninn’n gai nga, rai nin lapya ngain.