1 Timothee 5 - Nouveau Testament en Gulay 2004

Nyange ke kum ra tede le njétaakem̂-Kristge

¹ In se bɔ dingem i ndáng’n ɓej-ɓej lé, nè i ndeje’n tite bɔi bè. I ndeje basa titeke i ndeje’n ngakoinge bè.

² I ndeje kon dinyege asenan se koinge bè a, i ndeje dinyege ke nain-in mande ɓai titeke i ndeje’n kon nannige bè se tàgir ke unju nyang-nyang.

³ Ngarankum njékei-kingege nga, ile koje dè de’t.

⁴ Ke nè á njèkei-kinge karé aw se ngannenge éké ngannkànnge ndii tutu ɓai ɓaa, è tà le de ei kuwe kété le ndó kile koje dè njékem̂keige le de. D’a ra titeke bè tede kɔr’n kure koto ke ndɔ ke njékoje dege éké kà dege otoi de nga. E ke nè á è nyan ke maje tàkum Nube’t.

⁵ Ngarankum njèkei-kinge ke ndi se kar’n nga, unde kem̂’n tchên dè Nube’t. E liger lagr-lagr dè kɔje se’n tà’t a, dè ndête’n ɓɔk-ɓɔk kada a, ndɔɔ a tɔ.

⁶ Nè njèkei-kinge ke ndi tede ranel le danra nga, né ndi kumgajer ɓai géa, è nain ke doo ke wei ɓá ta.

⁷ Ede de tà dè nyange’t nè nga ndàt-ndàt tede kade doo karé bè ile’n tà dè de’t lé.

⁸ Ke nè á doo karé tɔse kum’n dè njénojege’t le’n éké dè njékem̂-keige le’n kuwe mbain sêw-sêw lé ɓaa, è doo ke naje se ra’n dè kundekem̂’t le’n. E tel majelé ngain dum doo ke unde kem̂’n dè Nube’t lé ɓai.

⁹ Njèkei-kinge ke ɓal’n ase kɔr-mute-mute lé ɓai nga, è tà le ndang ri’n kem̂ magtub ke ɔje dè njékei-kingege nga lé; ke nè á ɓal’n ase kɔr-mute-mute géa, gar-gar maje kade ndɔ ke è njè taa ngaw gir karé bere m è njè taa ngaw kage ke kété-kété lé.

¹⁰ Gar-gar, njèkei-kinge à è doo ke d’ɔrgo nyanra’n ke maje a, à è njè koto ngannenge maje a, à è njè ra mba a, à è njè togo nja dooge le Nube a, à è njè ra se njé ke ndii dann nyantosowurge’t a, à è njè ra kulege ke maje malang se ndɔ’n-ndɔ’n a tɔ.

¹¹ Nè njékei-kingege ke nain-in mande ɓai nga, i ndang ri de go njékei-kingege’t lé. Kerɔte kuwe, loo ke ngur nyange ule por kem̂ de’t ɓaa, ke loon’t nè kuwe dé ndige tur gide de kade Krist le tel taa ngaw.

¹² Loo ke ei rai titeke bè nga, Nube gangtà dè de’t tede kinye ke ei inyei go ndukunn le de ke desêin ke unni adi Krist nga.

¹³ Dé njékei-kingege ke titeke bè nga kule ra de ke get goto, nè d’ase loo nák-nák se tà kei, tà kei. E ke nè á se kar lé ɓai, nè dé njé kɔje tà neng-neng-ge a, se njé kal bal kur dann nyange ke ndête de’t lé a tɔ. Tà ke kum tam lé géa, dé tam a tɔ.

¹⁴ Gir’n ke nè á m’ndige kade njékei-kingege ke nain-in mande ɓai teli taai ngaw oji ngannge a, an-in go loo ke kem̂ kei le de sêw-sêw a tɔ. Titeke bè á njèban à inge’n loo kile’n rasɔl dè jéi’t lé.

¹⁵ Kerɔte, njékei-kingege ke nange tɔi pum go Njè sú dooge’t ɓá ta.

¹⁶ Ke nè á njètaakem̂-Krist karé ke dinye éké ke dingem aw se njékei-kingege dann njénojege’t le’n éké kem̂ kei le’n ɓaa, maje kade ra se de. Titeke bè á dè njékebe nange le Nube à ɔlé’n pêl tede kade rai se ngarankum njékei-kingege.

¹⁷ Ngatɔgege ke ɔri non njékebe nange le Nube maje nga, è soo’t kade d’ile riɓar dè de’t nja joo. Nè njé ke ulei ra de ndibe dè kule kɔrgir tà’t éké dè kule ndó dooge nyan’t kuwe mbain á ei dooge ke maje kile riɓar dè de’t nja joo.

¹⁸ Kerɔte kuwe, Magtub ke tò se ninn’n tam ede nè: «Dig mang ke ade njiye dè ko’t tal njar’n nga, i a kule ɗêng tànn’t kɔge’n kuse lé.» Magtub le Nube tam ɓai ede nè: «Njèkule asekum kinge nyan dè ji’n kuwe.»

¹⁹ Maje kade njékɔrgo tàge joo éké mute tá ilei tà dè ngatɔge’t. Ke nè á è bè lé ɓaa, i taa tà nè nga lé ɓai.

²⁰ Njé ke rai majelé kum de ke kété-kété nga, in se de dè’t tàkum njékebe nange’t le Nube malang tede kade njétaakem̂-Kristge ke rang ɓeli rai kaiya.

²¹ Man m’ndeji tàkum Nube’t a, tàkum Jésu-Krist a, se tàkum dooge ke danrán le Nube a tɔ: an dè nyange nè nga sêw-sêw anje ndête éké kɔr kum doo a tɔ.

²² In kalang ile ji dè doo’t tede kum’n kule kɔr non njékebe nange le Nube jinn’t lé. Um nan’t se doo ke rang dè majelége’t le’n lé. I kuwe an go rai sêw-sêw.

²³ I nga ratur rai dɔ-dɔ. Ebe rai kain mann ke karè kuwe njing-njing. An-in mann nduu ndêin bè tede kem̂i ke rai se ndɔ karé-karé nga.

²⁴ Kaiya ra dooge ke nange tò nata ndái-ndái kété pa ɓita dé gangtà dè de’t ɓai. Nè njé ke nange ɓaa, majelége le de tooi sár ɓita kilei ra de ke nata ɓai.

²⁵ Kule rage ke maje nga géa tooi nata ndái-ndái tɔ. Kule rage ke majelé nga asikum ɓɔyɔi ra de sár-sár ndan lé a tɔ.