1 Pierre 5 - Nouveau Testament en Gulay 2004

I tɔsi kum si dè bate kosge le Nube

¹ M’ndeje ke ngatɔgege ke dann si’t, tede man géa m’ee ngatɔge made de tɔ. Man nga m’ee njèkɔrgo nyankem̂kon ke ra Krist. Ndɔ ke Krist à tel ree ɓaa, man m’oré se’n nan dè ndubra’t le’n.

² Uli bate kosge le Nube ke um de ji si’t nga se kem̂nda káng. Adi doo unde dè si tá lé, nè i tɔsi kum si dè de’t se kem̂nda káng titeke Nube ndige’n. I rai se kem̂nda káng m i rai tede kinge’n nar tá lé.

³ Njé ke Nube kai de um de ji si’t nga, on-in de njanm-njanm tite ngarge bè lé; nè maje kade i teli sei nyan-tɔjege le bate kosge.

⁴ Titeke bè á loo ke ndɔn’t maw njèkul bate kosge à tel kunde loo tee pan ɓaa, à ingei jɔkɔ kunn banga le riɓar ke à ndis ndan lé.

⁵ Sei basage géa, maje kade ulei dè si adi ngatɔgege. Maje kade sei malang i rai ra si ke ngann njékulege le nan tede Nube ute njé ti rage mbeng, nè è uwe noje se njé kule dè dege.

⁶ Ulei dè si gir tɔgmong’t le Nube tede kade è kuwe unn sei unde sei dɔ mbeng kem̂ ndɔ ke è ɔje.

⁷ Nyange malang ke ade kem̂ si olé bɔt-bɔt nga, i risi undei dè Nube’t tede è tɔse kum’n dè si’t.

⁸ I ndii kum si karè, ɔgi kum si ɓi. Sú ke è njèban le si nga uje rɔ ringe’n tite toboi bè. E sang doo ke le kuwe’n kuse’n.

⁹ Ilei rɔ adi nin. I ndai dè kundekem̂’t le si njáng tede sei geri mbak titeke nyankem̂konge nè nga kété teei dè ngakon sige’t dè nang nè ɓá ta.

¹⁰ Nyankem̂konge ke à rai sei nga, kò’n à tò mbɔr lé. Nè Nube ke ɓar sei nga, nyan-nojege malang in rann’t. E ɓar sei le kade oréi nan se’n dè ndubra’t le’n ke à tò sár se non takul kum ke sei umi nan’t bɔk se Krist. Nube kuwe à tel gɔl sei kade i teli i ndai dè nja si’t njáng anje tɔ pum.

¹¹ Maje kade tɔgmong è le’n kuwe sár se non. Maje kade è titeke bè kuwe.

Lapya ke ngeinn’t le Pierre

¹² Man m’an Silas ke ngokon jéi ke get. Takul’n è á m’ndang’n magtub ndêin bè m’ade sei le kule’n dingem kem̂ si’t, le kede’n sei ngarankum noje ke Nube uwe se si nga kade i ligri tutu lagr-lagr.

¹³ Njé ke tooi se ninn de ke kem̂ ɓee-bò ke Babylone rai sei lapya. Dé nga, Nube ɓar de titeke ɓar’n sei bè tɔ. Ngonn’m Marc géa ra sei lapya tɔ.

¹⁴ Uwei nan kàde si’t sem̂, i rai nan lapya. I tári nan. Sei malang ke umi nan’t bɔk se Krist nga, maje kade kem̂lom nain se si.