1 Pierre 1 - Nouveau Testament en Gulay 2004

Pierre ɔr gir ra’n a, ra de lapya a tɔ

¹ Man Pierre, njèkawkule le Jésu-Krist, m’ndang magtub nè m’ade njé ke Nube ɔr de unde de se ninn de ke ei njé nanmge ke sanrin nan awi ndii kem̂ ɓeekonge ke Pont, Galatie, Cappadoce, Asie a, se Bithynie a tɔ.

² Sei nga Bɔ jéi tɔr sei kété mari ke desêin se go gos nyanger le’n. E ɔr sei unde sei se ninn si gai ke kosdooge le’n takul Ndil-Kem̂nda. Nube ra titeke bè tede kade ilei koje dè Jésu-Krist’t a, tede kade mese’n ɔr’n kaiyage le si ndát-ndát a tɔ. Maje kade kem̂noje se kem̂lom oji nan ra si’t nyanmi-nyanmi.

Kundekem̂ tchên dè kaje’t

³ Bɔ Kuwe-ɓee le jéi Jésu-Krist nga, maje kade dè’n mong káng-káng. E tel oje jèi kige se go kem̂kanm le’n ke al dè loo takul kunde ke è ade Jésu unde loo tee dann njé ke koo’t. Gir’n ke nè á j’undei kem̂ jéi tchên dè ndikumgajer’t.

⁴ Jè ndii jè nginei nyan-majege ke Nube uwe dè nja unde konn tede njé ke le’n. E nyan-majege ke à jɔri lé a, à mite lé a, a ndolè lé a tɔ. Nyan-majege nè nga Nube uwe dè nja unde konn tede le si kem̂ Konɓee ke danrán nú.

⁵ Sei nga tɔgmong le Nube an-in ngang si garar-garar takul kundekem̂ le si. E an-in ngang si titeke bè tede kaje ke è uwe dè nja tede le si nga, nain ngɔr ɓaa à kile ra’n ke nata ndɔ ke ngeinn’t.

⁶ Nyantosowurge gai-gai nan-in sei ɗarinè mbɔr. Nè né è bè géa, i rai ranel ɔje dè kaje ke Nube uwe dè nja unde konn tede si nga.

⁷ Nyantosowurge nè nga nan-in kundekem̂ le si ke gate’n dum nar-ɔr ɓai nga le kan, ké kundekem̂ le si nga è kundekem̂ ke get kuwe wa? Nar-ɔr è nyan ke à tuju a, à goto ɓai a tɔ. Nè nè bè géa, d’ule poro dé nan’n d’an. Kundekem̂ le si nga géa d’ade nan’n le kan tɔ. Ke nè á è kundekem̂ ke get ɓaa, d’a pite’n sei a, a ingei ndubra se riɓar a tɔ, ndɔ kunde loo tee pan’t le Jésu-Krist.

⁸ Jésu-Krist nga, sei an-in nin lé ɓai nè sei tári nin. Ɗarinè sei an-in nin lé ɓai nè sei undei kem̂i si dènn’t a tɔ. Gir’n ke nè á sei ndii dann bò ranel ke maje ɔr njêt’t.

⁹ Kem̂ si ke undei dè Jésu-Krist’t nga, loo tɔl tà’n ɓaa à aji ngarankum ra si.

¹⁰ Kaje nè nga, njéribe-dè-tàge ke tà Nube’t sangi gir ke get se ngang’n lêr-lêr a, nderi gir uyi tete undei. Noje ke Nube ayé kuwe se si nga, ei tami tà’n kété mari ke desêin.

¹¹ Ndil Krist ndi kem̂ de’t ede tà nyankem̂konge ke ayé ra Krist se ndubra ke ayé kutu go nyankem̂kon nè nga kade ooi. Dé ter loo le ger ké ndɔ ke ra á nyan nè nga à tee wa? Njéribe-dè-tàge ke tà Nube’t teri loo le geri ké nyan nè nga à tee titeke bain wa?

¹² Nyange ke njéribe-dè-tàge ke tà Nube’t ribei dè kété nga, Nube tee se gir ade geri titeke nyange ke è ade dé ribe dè nga ɔje dè de lé, nè ɔje dè si sei. Nyange ke njéribe-dè-tàge ke tà Nube’t ribei dè kété mari nga, ɗarinè njékile mber Tà ke Majege ilei mber’n adi sei se go Ndil-Kem̂nda ke d’ule’n danrán d’ade de. Dooge ke danrán kuwe géa, ngur ter nyange nè nga ra de pênn-pênn.

Ndi se ra ke unju nyang-nyang dè kundekem̂’t

¹³ Bè ɓaa, adi tàgir le si ndikum a, i ndii kum si karè. Undei kem̂ si tchên dè noje ke d’a d’uwe se si ndɔ tel ree’t le Jésu-Krist.

¹⁴ Ilei koje dè Nube’t. Inyei go nyanrage ke majelé ke kété i rai loo ke ndɔ ke i geri Krist lé ɓai nga kɔke ta.

¹⁵ Nube è ke njè ɓar sei nga tò se ninn’n gai. Bè ɓaa, sei géa adi nyanra si tò se ninn’n gai a tɔ,

¹⁶ tede dé ndang kem̂ Magtub ke tò se ninn’n d’ede nè: «I tooi se ninn si tede man nga m’tò se ninn’m gai.»

¹⁷ Nube ke njè ndête kum doo lé nga á ke njègangtà dè nanan géa se go kule ra’n-ra’n nga, sei ɓari nin Bɔ si. Bè ɓaa, i ɓeli ndil’n loo ke sei i nain-in ke mbage bè dè nang nè ɓai.

¹⁸ Sei geri mbak titeke ei nyange ke ayé tuji tite nar-ɔr éké nar-nda á Nube uge’n dè si ɔr’n sei gir hal ke raikarè ke kà sige telii adi sei nga lé.

¹⁹ Nè Nube uge dè si se mese Krist ke nar’n ur kugu. Krist nga tò asenan se ngonn bate ke gel’n goto a, ra’n ɔr ɓál lé a tɔ.

²⁰ Krist nga Nube ɔr’n ke njè kuge dè dooge kété mari ke desêin ɓita unde nyange malang ke dè nang nè ɓai. Nè ɗarinè è kile ra’n ke nata kem̂ ndɔge ke ngeinn’t nè tede tà le si.

²¹ E takul’n è Krist á sei undei kem̂ si dè Nube’t ke njè kade unde loo tee dann njé ke koo’t a, ke njè kule ndubra dènn’t a tɔ. Gir’n ke nè á sei undei kem̂ si dè Nube’t a, kem̂ si too’n tchên ke dènn’t a tɔ.

²² Koje ke sei ilei dè ngarankum tà’t nga á i telii sei dooge ke unji nyang-nyang le tár’n njétaakem̂-Kristge se kem̂nda káng. I tári nan ngain dè ɓengre si’t.

²³ Sei nga dé tel d’oje sei kige. Koje ke d’oje sei kige nè nga in ra kà sige ke njékweige lé; dé tel d’oje sei gugu kige takul tà le Nube ke njèndi kumgajer sár se non.

²⁴ Magtub ke tò se ninn’n tam ede nè: «Danra dooge malang tò tite walè bè a, riɓar le de malang tò asenan se putu kage bè a tɔ. Walè tutu a, putu gein nang a tɔ.

²⁵ Nè tà le Kuwe-ɓee tò sár se non.» Tà nè nga è Tà ke Maje ke d’ile mber’n d’ade sei ɓá.