ગીતશાસ્ત્ર 52 - પવિત્ર બાઇબલ OV Reference Bible (BSI)

ઈશ્વરનું ન્યાયશાસન અને કૃપા

મુખ્ય ગવૈયાને માટે દાઉદનું માસ્કીલ:દોએગ અદોમીએ આવીને શાઉલને ખબર આપી કે, દાઉદ અહીમેલેખને ત્યાં આવ્યો છે, તે વખતનું.

¹ અરે જુલમગાર, તું ભૂંડાઈનું અભિમાન કેમ કરે છે? ઈશ્વરની કૃપા સર્વદા [ટકે છે].

² તારી જીભ દુષ્ટતા કરવાની યોજના કરે છે; પાણીદાર અસ્ત્રાની જેમ તે છેતરે છે.

³ તું ભલાઈ કરતાં ભૂંડાઈને વધારે ચાહે છે, અને ન્યાયીપણું બોલવા કરતાં જૂઠું બોલવું તને વધારે ગમે છે. (સેલાહ)

⁴ અરે કપટી જીભ, તું સર્વ વિનાશકારી વાતો ચાહે છે.

⁵ ઈશ્વર તારું સત્યાનાશ વાળશે, તને પકડીને તે તને તારા તંબુમાંથી ખેંચી કાઢશે, અને પૃથ્વીમાંથી તને ઉખેડી નાખશે. (સેલાહ)

⁶ વળી ન્યાયીઓ તે જોશે અને બીશે, અને તેને હસી કાઢીને [કહેશે કે,]

⁷ “જે પુરુષે ઈશ્વરને પોતાનો આશ્રય ન કર્યો, પણ પોતાના ઘણા ધન પર ભરોસો રાખીને પોતાનાં દુષ્કર્મોને વળગી રહ્યો તે તે આ રહ્યો.”

⁸ પણ હું તો ઈશ્વરના મંદિરના લીલા જૈતવૃક્ષ જેવો છું. હું ઈશ્વરની કૃપા પર સદાકાળ ભરોસો રાખું છું.

⁹ તમે એ કર્યું છે, માટે હું તમારી આભારસ્તુતિ સદા કરીશ; અને તમારું નામ ઉત્તમ છે એવું હું તમારા સંતોની સમક્ષ પ્રગટ કરીશ.