ગીતશાસ્ત્ર 25 - પવિત્ર બાઇબલ OV Reference Bible (BSI)

માર્ગદર્શન અને રક્ષા માટે પ્રાર્થના

દાઉદનું [ગીત].

¹ હે યહોવા, હું તમારામાં મારું અંત:કરણ લગાડું છું.

² હે મારા ઈશ્વર, મેં તમારા પર ભરોસો રાખ્યો છે, મારી લાજ રાખજો. મારા શત્રુઓ મારા પર જયજયકાર ન કરે.

³ તમારી વાટ જુએ છે તેઓમાંનો કોઈ લજવાશે નહિ. જેઓ વગર કારણે કપટ કરે છે તેઓની લાજ જશે.

⁴ હે યહોવા, તમારા માર્ગ મને બતાવો; તમારા રસ્તા વિષે મને શીખવો.

⁵ તમારા સત્‍યમાં મને ચલાવો, અને તે મને શીખવો; કેમ કે તમે મારા તારણના ઈશ્વર છો; હું આખો દિવસ તમારી રાહ જોઉં છું.

⁶ હે યહોવા, તમારી રહેમ તથા તમારા વાત્સલ્યનું સ્મરણ કરો. કેમ કે તેઓ સનાતન છે.

⁷ મારી જુવાનીનાં પાપ તથા મારા અપરાધોનું સ્મરણ ન કરો. હે યહોવા, તમારી ભલાઈ અને તમારી કૃપા પ્રમાણે મને સંભારો.

⁸ યહોવા ઉત્તમ અને ન્યાયી છે, માટે પાપીઓને તે [પોતાનો માર્ગ] બતાવશે.

⁹ નમ્રને તે ન્યાયમાં દોરશે; અને તેને તે પોતાને માર્ગે ચલાવશે.

¹⁰ જેઓ તેમનો કરાર તથા તેમની આજ્ઞા પાળે છે તેઓને માટે યહોવાના સર્વ માર્ગો કૃપા તથા સત્યતા [થી ભરેલા] છે.

¹¹ હે યહોવા, તમારા નામની ખાતર મારા અન્યાયની ક્ષમા કરો, કેમ કે તે ઘણા છે.

¹² જે યહોવાથી બીએ છે તે કયું માણસ છે? કયો માર્ગ પસંદ કરવો તે તેને તે શીખવશે.

¹³ તેનો જીવ સુખમાં રહેશે; તેનાં સંતાન દેશનો વારસો પામશે.

¹⁴ યહોવાનો મર્મ તેમના ભક્તોની પાસે છે. તેઓને તે પોતાનો કરાર જણાવશે.

¹⁵ મારી દષ્ટિ સદા યહોવાની તરફ છે; તે મારા પગ ફાંદામાંથી કાઢશે.

¹⁶ તમે મારી તરફ ફરો, ને મારા પર દયા કરો; કેમ કે હું નિરાશ્રિત અને દુ:ખી છું.

¹⁷ મારા મનનું દુ:ખ વધી ગયું છે. તમે મને મારાં સંકટમાંથી છોડાવો.

¹⁸ મારાં દુ:ખ તથા વેદના તરફ જોઈને મારાં સર્વ પાપની ક્ષમા કરો.

¹⁹ મારા શત્રુઓને જુઓ, કેમ કે તે ઘણા છે; અને તેઓ ઘાતકીપણે મારો દ્વેષ કરે છે.

²⁰ મારા આત્માને સંભાળો અને મને છોડાવો; મારી લાજ જવા દેતા નહિ, કેમ કે હું તમારા પર ભરોસો રાખું છું.

²¹ પ્રામાણિકપણું તથા ન્યાયીપણું મારું રક્ષણ કરો, કેમ કે હું તમારી રાહ જોઉં છું.

²² હે ઈશ્વર, ઇઝરાયલને તેનાં સર્વ સંકટમાંથી છોડાવી લો.