ગીતશાસ્ત્ર 121 - પવિત્ર બાઇબલ OV Reference Bible (BSI)

પ્રભુજીનાં રખવાળાં

ચઢવાનું ગીત.

¹ હું પર્વતો તરફ મારી આંખો ઊંચી કરીશ; મને ક્યાંથી સહાય મળે?

² જે યહોવાએ આકાશ તથા પૃથ્વી ઉત્પન્‍ન કર્યાં છે, તેમની તરફથી મને સહાય મળે છે.

³ તે તારા પગને ડગવા દેશે નહિ; તારા રક્ષક ઊંઘી જનાર નથી.

⁴ જુઓ, ઇઝરાયલના જે રક્ષક છે તે ઊંઘતા નથી અને નિદ્રાવશ થતા નથી.

⁵ યહોવા તારા રક્ષક છે; યહોવા તારે જમણે હાથે તને છાયા કરશે.

⁶ દિવસે સૂર્ય કે રાત્રે ચંદ્ર તને ઉપદ્રવ કરશે નહિ.

⁷ સર્વ દુ:ખથી યહોવા તારું રક્ષણ કરશે; તે તારા આત્માની સંભાળ રાખશે.

⁸ હમણાંથી તે સર્વકાળ માટે તારી સર્વ હિલચાલમાં યહોવા તારું રક્ષણ કરશે.