ગીતશાસ્ત્ર 118 - પવિત્ર બાઇબલ OV Reference Bible (BSI)

વિજય માટે આભારસ્તુતિ

¹ યહોવાનો આભાર માનો; કેમ કે તે ઉત્તમ છે; તેમની કૃપા સર્વકાળ [ટકે છે].

² ઇઝરાયલ, તું એમ જ કહેજે, “તેમની કૃપા સર્વકાળ [ટકે છે] ”

³ હારુનપુત્રો, તમે કહેજો, “તેમની કૃપા સર્વકાળ [ટકે છે] ”

⁴ યહોવાના ભક્તો, તમે પણ કહેજો, “તેમની કૃપા સર્વકાળ [ટકે છે] ”

⁵ સંકટમાં મેં યહોવાને વિનંતી કરી, એટલે યહોવાએ મને ઉત્તર આપીને વિશાળ જગામાં [બેસાડ્યો].

⁶ યહોવા મારા પક્ષમાં છે; હું બીવાનો નથી! માણસ મને શું કરી શકશે?

⁷ યહોવા મારા પક્ષમાં છે; તે મારા સહાયકારી છે, માટે હું મારા દ્વેષીઓ પર [મારી ઇચ્છા પૂરી થયેલી] જોઈશ.

⁸ માણસનો ભરોસો કરવા કરતાં યહોવા પર આધાર રાખવો સારો છે.

⁹ રાજાઓ પર ભરોસો રાખવા કરતાં યહોવા પર આધાર રાખવો સારો છે.

¹⁰ સર્વ વિદેશીઓએ મને ઘેરી લીધો હતો; પણ યહોવાને નામે મેં તેઓને કાપી નાખ્યા.

¹¹ તેઓએ મને ઘેરી લીધો હતો; હા, ખરેખરે ઘેરી લીધો હતો; પણ યહોવાને નામે મેં તેઓને કાપી નાખ્યા.

¹² તેઓએ મધમાખીઓની જેમ મને ઘેરી લીધો હતો; પણ તેઓ સળગેલા કાંટાની જેમ હોલવાઈ ગયા છે; યહોવાને નામે મેં તેઓને કાપી નાખ્યા.

¹³ મને પાડી નાખવાને તેં મને ભારે ધક્કા માર્યા; પણ યહોવાએ મને મદદ આપી.

¹⁴ યહોવા મારું સામર્થ્ય તથા મારું ગીત છે; તે મારું તારણ થયા છે.

¹⁵ ન્યાયીઓના તંબુઓમાં હર્ષ તથા તારણના‍ ધ્વનિ [સંભળાય છે] ; યહોવાનો જમણો હાથ પરાક્રમ કરે છે.

¹⁶ યહોવાનો જમણો હાથ ઊંચો થયેલો છે; યહોવાનો જમણો હાથ પરાક્રમ કરે છે.

¹⁷ હું મરી નહિ જઈશ, પણ જીવતો રહીશ, અને યહોવાનાં કૃત્યોને પ્રગટ કરીશ.

¹⁸ યહોવાએ મને ભારે શિક્ષા કરી; પણ તેમણે મને મરણને સોંપી દીધો નહિ.

¹⁹ મારે માટે ન્યાયનાં દ્વાર ઉઘાડો; તેઓમાં થઈને હું જઈશ, અને યાહનો આભાર માનીશ.

²⁰ યહોવાનું દ્વાર આ છે; એમાં થઈને ન્યાયીઓ અંદર પેસશે.

²¹ હું તમારો આભાર માનીશ, કેમ કે તમે મને ઉત્તર આપ્યો છે. અને તમે મારું તારણ થયા છો.

²² ઘર બાંધનારાઓએ જે પથ્થર બાતલ કર્યો હતો, તે જ ખૂણાનો મુખ્ય પથ્થર થયો છે.

²³ આ [કાર્ય] યહોવાથી થયું છે; આપણી દષ્ટિમાં તે આશ્ચર્યકારક છે.

²⁴ આ દિવસ યહોવાએ આપણને આપ્યો છે; તેમાં આપણે આનંદોત્સવ કરીએ.

²⁵ હે યહોવા, તમે હવે દયા કરીને તારણ આપો; હે યહોવા, હવે તમે દયા કરીને ક્ષેમકુશળ રાખજો.

²⁶ યહોવાને નામે જે આવે છે તેને ધન્ય છે; યહોવાના મંદિરમાંથી અમે તમને આશીર્વાદ આપ્યો છે.

²⁷ યહોવા તે જ ઈશ્વર છે, તેમણે આપણને અજવાળું આપ્યું છે; વેદીનાં શિંગોની સાથે દોરડાંથી બલિદાનને બાંધો.

²⁸ તમે મારા ઈશ્વર છો, હું તમારો આભાર માનીશ; તમે મારા ઈશ્વર છો, હું તમને મોટા માનીશ.

²⁹ યહોવાનો આભાર માનો; કેમ કે તે ઉત્તમ છે. તેમની કૃપા સર્વકાળ [ટકે છે].