ગણના 34 - પવિત્ર બાઇબલ OV Reference Bible (BSI)

દેશની સરહદો

¹ અને યહોવાએ મૂસાને કહ્યું

² “ઇઝરાયલી લોકોને આજ્ઞા કરીને કહે કે, જ્યારે તમે કનાન દેશમાં પહોંચો, (એટલે જે કનાન દેશ તેની સીમાઓ પ્રમાણે તમને વારસા તરીકે મળવાનો છે, )

³ ત્યારે તમારો દક્ષિણ ભાગ સીનના અરણ્યથી માંડીને આગળ અદોમની સીમાની લગોલગ થાય, ને તમારી દક્ષિણ સીમા ખારા સમુદ્રના પૂર્વના છેડાથી શરૂ થાય.

⁴ અને એ તમારી સીમા વળીને આક્રાબ્બીમના ઢોળાવ તરફ આવે ને ત્યાંથી તે સીન સુધી પહોંચે. અને તેનો છેડો કાદેશ-બાર્નિયાની દક્ષિણે આવે. અને તે ત્યાંથી આગળ હસાર-આદાર સુધી જાય, ને આગળ આસ્મોન સુધી જાય.

⁵ અને તે સીમા આસ્મોનથી વળીને મિસરની નદી સુધી જાય, ને તેનો છેડો સમુદ્ર સુધી પહોંચે.

⁶ અને મોટો સમુદ્ર તથા તેનો કાંઠો એ તમારી પશ્ચિમ સીમા થાય.

⁷ અને તમારી ઉત્તર સીમા આ પ્રમાણે થાય; એ સીમા તમારે મોટા સમુદ્રથી માંડીને હોર પર્વત સુધી આંકવી:

⁸ અને એ સીમા તમારે હોર પર્વતથી માંડીને હમાથના નાકા સુધી આંકવી. અને તે સીમાનો છેડો સદાદ સુધી જાય.

⁹ અને ત્યાંથી આગળ સીમા ઝિફ્રોન સુધી પહોંચે, ને તેનો છેડો હસાર-એનાન સુધી પહોંચે. એ તમારી ઉત્તરની સીમા થાય.

¹⁰ અને તમારી પૂર્વ સીમા તમારે હસાર-એનાનથી તે શફામ સુધી આંકવી:

¹¹ અને તે સીમા શફાનથી નીચલી તરફ વળીને રિબ્લા સુધી આયિનની પૂર્વ દિશાએ જાય. અને તે સીમા ત્યાંથી નીચાણ તરફ કિન્‍નેરેથના સમુદ્ર સુધી પૂર્વ તરફ પહોંચે.

¹² અને તે સીમા ત્યાંથી ઊતરીને યર્દન સુધી જાય, ને તેનો છેડો ખારા સમુદ્ર આગળ આવે. એ દેશ તેની ચારે તરફની સીમા પ્રમાણે તમારો થશે.”

¹³ અને મૂસાએ ઇઝરાયલી લોકોને આજ્ઞા આપીને કહ્યું, “જે દેશનો વારસો તમે ચિઠ્ઠીઓ નાખીને [વહેંચી] લેશો, ને જે નવકુળોને તથા અડધા કુળને આપવાની યહોવાએ આજ્ઞા આપી છે, તે આ છે:

¹⁴ કેમ કે રુબેનપુત્રોના કુળને તેઓના પિતૃઓનાં ઘર પ્રમાણે, તથા ગાદપુત્રોના કુળને તેઓના પિતૃઓનાં ઘર પ્રમાણે, તેઓનો વારસો મળી ચૂક્યો છે, ને મનાશ્શાના અડધા કુળને પણ મળી ચૂક્યો છે:

¹⁵ [આ] બે કુળોને તથા અડધા કુળને તેઓનો વારસો યર્દન પાર યરીખો આગળ પૂર્વ તરફ, એટલે ઉગમણી તરફ મળી ચૂક્યો છે.”

દેશની વહેંચણીનું કામ સંભાળતા આગેવાનો

¹⁶ અને યહોવાએ મૂસાને કહ્યું,

¹⁷ “જે માણસો તમને દેશનો વારસો વહેંચી આપશે તેઓનાં નામ આ છે: એટલે એલાઝાર યાજક તથા નૂનનો દિકરો યહોશુઆ,

¹⁸ અને દેશનો વારસો વહંચી આપવા માટે તમારે પ્રત્યેક કુળમાંથી અકેક અધિપતિ ચૂંટી કાઢવો.

¹⁹ અને તે માણસોનાં નામ નીચે મુજબ છે: યહૂદાના કુળમાંથી યફૂનેન્‍નો દિકરો કાલેબ.

²⁰ શિમયોનપુત્રોના કુળમાંથી આમિહુદનો દિકરો શમુએલ.

²¹ બિન્યામીનના કુળમાંથી કિસ્લોનનો દિકરો અલીદાદ.

²² અને દાનના પુત્રોના કુળનો અધિપતિ યોગ્લીનો દિકરો બુક્કી.

²³ યૂસફના પુત્રોના : મનાશ્શાના પુત્રોના કુળનો અધિપતિ એફોદનો દિકરો હાન્‍નીએલ.

²⁴ અને એફ્રાઈમપુત્રોના કુળનો અધિપતિ શિફટાનનો દિકરો કમુએલ.

²⁵ અને ઝબુલોનપુત્રોના કુળનો અધિપતિ પાર્નાખનો દિકરો અલીસાફાન.

²⁶ અને ઇસ્સાખારપુત્રોના કુળનો અધિપતિ અઝાનનો દિકરો પાલ્ટીએલ

²⁷ અને આશેરપુત્રોના કુળનો અધિપતિ શલોમીનો દિકરો આહીહૂદ.

²⁸ અને નફતાલીપુત્રોના કુળનો અધિપતિ આમીહૂદનો દિકરો પદાહેલ.”

²⁹ જેઓને યહોવાએ ઇઝરાયલી પ્રજાને કનાન દેશમાં વારસો વહેંચી આપવાની આજ્ઞા આપી તેઓ એ છે.