યર્મિયાનો વિલાપ 3 - પવિત્ર બાઇબલ OV Reference Bible (BSI)

¹ પ્રભુના કોપની સોટીથી જેણે દુ:ખ ભોગવ્યું છે, તે પુરુષ હું જ છું.

² તેમણે મને અજવાળામાં નહિ પણ અંધકારમાં દોરીને ચલાવ્યો છે.

³ તે ખરેખર આખો દિવસ મારી વિરુદ્ધ વારંવાર પોતાનો હાથ ફેરવે છે.

⁴ તેમણે મારું માંસ તથા મારી ચામડી જીર્ણ કરી નાખ્યા છે. તેમણે મારાં હાડકાં ભાંગી નાખ્યાં છે;

⁵ તેમણે મારી આસપાસ પિત્તળના વિષનો તથા કષ્ટનો કોટ બાંધીને મને ઘેરી લીધો છે.

⁶ તેમણે મને પુરાતન કાળન મૂએલાની જેમ અંધારાં સ્થાનોમાં વસાવ્યો છે.

⁷ તેમણે મને વાડથિ ધેર્યો છે, જેથી મારાથી બહાર નીકળાય નહિ. તેમણે મારી બેડી ભારે કરી છે.

⁸ વળી જ્યારે હું પોકારીને સહાય માગું છું, ત્યારે તે મારી પ્રાર્થના પાછી વાળે છે.

⁹ તેમણે ઘડેલા પથ્થરથી મારા માર્ગોને બંધ કર્યા છે, તેમણે મારા માર્ગો વાંકાચૂકા કર્યા છે.

¹⁰ તે મારા પ્રત્યે સંતાઈ રહેલા રીંછ જેવા, અને ગુપ્ત સ્થળમાં રહેનાર સિંહ જેવા થયા છે.

¹¹ તેમણે મારા માર્ગો મરડી નાખ્યા છે, ને મને ફાડી નાખ્યો છે. તેમણે મને નિરાધાર કર્યો છે.

¹² તેમણે પોતાનું ધનુષ્ય ખેંચ્યું છે, ને મને તીરના નિશાન તરીકે ઊભો રાખ્યો છે.

¹³ તેમણે પોતાના ભાથાનાં બાણ મારા અંત:કરણમાં ખોસ્યા છે.

¹⁴ હું મારા સર્વ લોકોની આગળ હાંસીપાત્ર થયો છું; અને તેઓ આખો દિવસ મારા રાસડા ગાય છે.

¹⁵ તેમણે મને કડવાશથી ભર્યો છે, તેમણે મને નાગદમણથી તૃપ્ત કર્યો છે.

¹⁶ વળી તેમણે મારાં દાંતોને કાંકરીથી ભાંગ્યા છે, તેમણે રાખથી મને ઢાંકી દીધો છે.

¹⁷ તમે મારો જીવ સુખશાંતિથી દૂર રાખ્યો છે; આબાદાની શું છે તે હું ભૂલી ગયો છું.

¹⁸ મેં કહ્યું, “મારું બળ ખૂટી ગયું છે, તથા યહોવા તરફથી મારી આશા નષ્ટ થઈ છે.

¹⁹ મારું કષ્ટ તથા મારું દુ:ખ, મારાં નાગદમણ તથા પિત્ત, તેઓનું સ્મરણ કર.

²⁰ મારો જીવ તેમનુમ સ્મરણ કરીને મારામાં દીન થઈ ગયો છે.

²¹ એ હું મનમાં લાવું છું, ને તેથી હું આશા રાખું છું.

²² યહોવાની કૃપાને લીધે અમે નાશ પામ્યા નથી. કેમ કે તેમની દયા અખૂટ છે.

²³ તે દર સવારે નવી થાય છે. તમારું વિશ્વાસુપણું મહાન છે.

²⁴ મારો જીવ કહે છે કે, યહોવા મારો હિસ્સો છે, તેથી હું તેમના પર આશા રાખીશ.

²⁵ જેઓ તેમની વાટ જુએ છે, ને જે માણસ તેમને શોધે છે તેઓ પ્રત્યે યહોવા ભલા છે.

²⁶ યહોવાના તારણની આશા રાખવી અને શાંતિથી તેમના આવવાની વાટ જોવી, એ સારું છે.

²⁷ યુવાવસ્થામાં ઝૂંસરી ઉપાડવી એ માણસને માટે સારું છે.

²⁸ પ્રભુએ તેના પર [ઝૂંસરી] મૂકી છે, માટે તે એકાંતમાં બેસીને છાનો રહે.

²⁹ તે પોતાનું મુખ ધૂળમાં નાખે, કદાચિત [તેને] આશા ઉત્પન્‍ન થાય.

³⁰ જે તેને મારે છે તેની તરફ તે પોતાનો ગાલ ધરે; તે અપમાનથી ભરપૂર થાય.

³¹ કેમ કે પ્રભુ કદી પણ કાઢી મૂકશે નહિ.

³² કેમ કે જો કે તે દુ:ખ દે, તોપણ પોતાની પુષ્કળ કૃપા પ્રમાણે તે દયા કરશે.

³³ કેમ કે તે રાજીખુશીથી દુ:ખ દેતા નથી, ને માણસોને ખિન્‍ન કરતા નથી.

³⁴ પૃથ્વીના સર્વ બંદીવાનોને પગ નીચે ખૂંદવા,

³⁵ પરાત્પર ઈશ્વરની સમક્ષ કોઈનો હક ડુબાડવો,

³⁶ કોઈનો દાવો બગાડવો, એ પ્રભુને યોગ્ય લાગતું નથી.

³⁷ યહોવાની આજ્ઞા ન છતાં કોના કહ્યા પ્રમાણે થાય?

³⁸ પરાત્પર ઈશ્વરના મુખમાંથી દુ:ખ તથા સુખ બન્‍ને નીકળે કે નહિ?

³⁹ જીવતો માણસ શા માટે બડબડ કરે છે, પોતાનાં પાપની સજા થવાથી તે કેમ કચકચ કરે?

⁴⁰ આપણે આપણા માર્ગોની શોધ તથા પારખ કરીએ, ને યહોવાની તરફ ફરીએ.

⁴¹ આપણે આકાશમાંના ઈશ્વરની તરફ આપણા હાથની સાથે આપણું હ્રદય પણ ઊંચું કરીએ.

⁴² અમે અપરાધ તથા બંડ કર્યાં છે; તમે ક્ષમા કરી નથી.

⁴³ તમે અમને કોપથી ઢાંકી દીધા તથા સતાવ્યા છે. તમે અમને કતલ કર્યા છે, ને અમારા પર દયા રાખી નથી.

⁴⁴ અમારી પ્રાર્થના પેલે પાર જાય નહિ, માટે તમે વાદળાથી પોતાને ઢાંકી દીધા છે.

⁴⁵ લોકોમાં તમે અમને ઉકરડા જેવા તથા કચરા સરખા કર્યા છે.

⁴⁶ અમારા સર્વ શત્રુઓએ અમારી વિરુદ્ધ પોતાનું મુખ ઉઘાડીને પહોળું કર્યું છે.

⁴⁷ ભય તથા ખાડો, પાયમાલી તથા નાશ, અમારા પર આવી પડ્યાં છે.

⁴⁸ મારા લોકોની દીકરીના નાશને લીધે મારી આંખોમાંથી આંસુની નદીઓ વહે છે.

⁴⁹ યહોવા આકાશમાંથી દષ્ટિ કરીને જુએ ત્યાં સુધી,

⁵⁰ મારી આંખમાંથી નિરંતર ચોધાર આંસુઓ વહ્યાં કરે છે.

⁵¹ મારા નગરની સર્વ દીકરીઓને લીધે મારી આંખ મારા જીવને દુ:ખીઇ કરે છે.

⁵² જેઓ વિનાકારણ મારા શત્રુ થયા છે, તેઓ કોઈ પક્ષીની પાછળ પડે તેમ મારી પાછળ પડ્યા છે.

⁵³ તેઓએ મારા જીવને કારાગૃહમાં નષ્ટ કરવાનું કર્યું છે, ને મારા પર પથ્થે ફેંક્યો છે.

⁵⁴ મારા માથા ઉપર પાણી ફરી વળ્યાં; મેં કહ્યું કે, હું મરી ગયો!

⁵⁵ હે યહોવા, મેં કારાગૃહના નીચલા ભોંયરામાંથી તમારા નામને હાંક મારી.

⁵⁶ તમે મારો અવાજ સાંભળ્યો; હું હાંફીને બૂમ પાડું, ત્યારે તમે તમારો કાન બંધ ન કરો.

⁵⁷ જે દિવસે મેં તમને હાંક મારી ત્યારે તમે મારી પાસે આવ્યા, ‘બીશ નહિ, ’ એવું તમે કહ્યું.

⁵⁸ હે પ્રભુ, તમે મારા જીવનો પક્ષ કરીને મારા તરફથી વિવાદ ચલાવ્યા છે; તમે મારા પ્રાણનો ઉદ્ધાર કર્યો છે.

⁵⁹ હે યહોવા, મારા પર જે‍‍ અન્યાય થયેલો છે તે તમે જોયો છે; તમે મારો ન્યાય કરો.

⁶⁰ તેઓએ મારા પર લીધેલું સર્વ વૈર તથા તેઓએ કરેલાં સર્વ કાવતરાં તમે જોયાં છે.

⁶¹ હે યહોવા, તેઓએ કરેલી મારી નિંદા, તથા મારી વિરુદ્ધ તેઓએ કરેલાં સર્વ કાવતરાં તમે સાંભળ્યા છે.

⁶² જેઓ મારી સામે ઊઠ્યા તેઓનાં વચન, તથા આખો દિવસ મારી વિરુદ્ધ તેમની કૂથલી તમે સાંભળી છે.

⁶³ તેઓનું બેસવું ઊઠવું જુઓ; તેઓ મારા રાસડા ગાય છે.

⁶⁴ હે યહોવા, તેઓના હાથની કરણી પ્રમાણે તેઓને બદલો આપો.

⁶⁵ તેઓનાં મન અંધકારમય કરો. તમે તેઓને શાપ આપો.

⁶⁶ કોપથી તેઓની પાછળ પડો, ને યહોવાના આકાશ નીચેથી તેઓનું નિકંદન કરો.”