અયૂબ 35 - પવિત્ર બાઇબલ OV Reference Bible (BSI)

અલિહૂ (ચાલુ)

¹ વળી અલિહૂએ કહ્યું,

² “તું એવું કહે છે કે, ‘એમાં મને શો ફાયદો થવાનો છે? મેં પાપ કર્યું હોત તો [જે મફત] તેના કરતાં હાલ મને વધારે શો નફો મળશે?

³ શું એવું ધારવું તને ઘટે છે? [અથવા] શું તું એમ કહે છે કે, ઈશ્વરના કરતાં મારું ન્યાયીપણું અધિક છે?

⁴ હું તને તથા તારા સાથીઓને ઉત્તર આપીશ.

⁵ આકાશ તરફ નજર કરીને જો; તારા કરતાં ઊંચા અંતરિક્ષને નિહાળ.

⁶ જો તેં પાપ કર્યું હોય, તો તેથી તેમની વિરુદ્ધ તું શું કરે છે? જો તારા અપરાધો વધી જાય તો તેથી તેમનું તું શું [નુકસાન] કરે છે?

⁷ જો તું ન્યાયો હોય, તો તું તેમને શું આપે છે? અથવા તે તારા હાથથી શું પામે છે?

⁸ તારી દુષ્ટતાથી તારા જેવા માણસને તો [ઇજા થાય] ; અને તારી નેકીથી તો મનુષ્યને [નફો થાય].

⁹ જુલમથી વૃદ્ધિના કારણથી તેઓ કકળી ઊઠે છે. બળવાનના જુલમથી તેઓ મદદને માટે બૂમ પાડે છે.

¹⁰ પણ કોઈ એમ નથી કહેતું, ‘જે મને રાત્રે ગાયન કરાવે છે,

¹¹ જે આપણને પૃથ્વીનાં પશુઓના કરતાં વધારે શીખવે છે, અને જે આપણને ખેચર પક્ષીઓના કરતાં વિશેષ જ્ઞાની કરે છે, તે મારા સરજનહાર ઈશ્વર ક્યાં છે?’

¹² ત્યાં તેઓ બૂમ પાડે છે, પણ દુષ્ટ માણસના અહંકારને લીધે કોઈ તેમને ઉત્તર આપતું નથી.

¹³ ખરેખર ઈશ્વર દંભીઓનું સાંભળશે નહિ, અને સર્વશક્તિમાન તેઓને લેખવશે નહિ.

¹⁴ જ્યારે તું કહે છે, ‘હું તેમને જોતો નથી, ’ ત્યારે તે નહિ [સાંભળશે] એ કેટલું વિશેષ સંભવિત છે! પણ [તારો] દાવો તો તેમની આગળ છે, માટે તું તેમની વાટ જો.

¹⁵ પણ હવે, તેમણે કોપાયમાન થઈને શિક્ષા કરી નથી, અને ઉદ્ધતાઈને તે ઝાઝી લેખવતા નથી;

¹⁶ માટે અયૂબ પોતાને મોઢે વ્યર્થ વાતો કરે છે, અને જ્ઞાન વિના બકવાદ કરે છે.”