અયૂબ 16 - પવિત્ર બાઇબલ OV Reference Bible (BSI)

અયૂબ

¹ ત્યારે અયૂબે પ્રત્યુત્તર આપ્યો,

² “મેં એવી ઘણી વાતો સાંભળી છે. તમે સર્વ કંટાળો ઊપજે એવો દિલાસો આપનારા છો.

³ શું નકામા શબ્દોનો અંત આવે? કે ઉત્તર આપવાને તને શું ઉશ્કેરે છે?

⁴ તમારી જેમ હું પણ બોલી શકું છું; જો તમારો આત્મા મારા આત્માની જગાએ હોત, તો હું તમારી સાથે દલીલ કરત, અને તમારી સામે મારું માથું ધુણાવત.

⁵ [પણ] મારા મુખથી હું તમને હિમ્મત આપત, અને મારા હોઠોનો દિલાસો ઠંડક વાળત.

⁶ જો કે હું બોલું છું, તોપણ મારો ખેદ ઠંડો થતો નથી; અને જો કે હું સહન કરું, તોપણ મને કેવી રીતે આરામ થાય?

⁷ હવે તેમણે મને વ્યાકુળ કર્યો છે; મારો બધો સંગાથ તેં ઉજ્જડ કર્યો છે.

⁸ તેં મને કરમાવી નાખ્યો છે, એ જ [મારી વિરુદ્ધ] સાક્ષી છે. અને મારી દુર્બળતા મારી વિરુદ્ધ ઊઠીને મારે મોઢે ચઢીને સાક્ષી પૂરે છે.

⁹ તેમણે પોતાના ક્રોધમાં મને ચીરી નાખ્યો છે, અને મને સતાવ્યો છે; તેમણે મારી સામે પોતાના દાંત પીસ્યા છે; મારો વેરી પોતાની આંખો મારી સામે કરડી કરે છે.

¹⁰ તેઓએ મારી વિરુદ્ધ પોતાનું મોં પહોળું કર્યું છે; મહેણાં મારીને તેઓએ મારા ગાલ પર તમાચા માર્યા છે; તેઓ મારી વિરુદ્ધ એકત્ર થાય છે.

¹¹ ઈશ્વર મને અધર્મીઓને હવાલે સોંપી દે છે, અને મને દુષ્ટોના હાથમાં ફેંકી દે છે.

¹² હું સુખચેનમાં હતો, ત્યારે તેમણે મને કચડી નાખ્યો. હા, તેમણે મને ગરદનેથી પકડીને અફાળી ચૂરો કર્યો છે. તેમણે મારા પર પોતાનું નિશાન તાકી રાખ્યું છે.

¹³ તેમના ધનુર્ધારીઓએ મને ચારે તરફ ઘેરી લીધો છે, તે મારું હ્રદય ફાડી નાખે છે, ને દયા રાખતા નથી; તે મારું પિત્ત જમીન પર ઢોળે છે.

¹⁴ તે તોડફોડ કરીને મને ભાંગી નાખે છે. તે યોદ્ધાની જેમ મારા પર ધસે છે.

¹⁵ મેં મારા શરીર પર ટાટ સીવ્યું છે, અને મારું શિંગ ધૂળમાં રગદોળ્યું છે.

¹⁶ જો કે મારા હાથથી કંઈ બલાત્કાર થયો નથી, અને મારી પ્રાર્થના શુદ્ધ છે તોપણ,

¹⁷ રુદન કરી કરીને મારું મોં લાલચોળ થઈ ગયું છે, અને મારાં પોપચાં પર મોતની છાયા [છવાયેલી] છે.

¹⁸ હે પૃથ્વી, મારું રક્ત ન સંતાડ, અને મારી બૂમ અટકી ન પડો.

¹⁹ જુઓ, હમણાં જે મારો સાક્ષી આકાશમાં છે, અને મારો સાક્ષી ઉચ્ચસ્થાને છે.

²⁰ મારા મિત્રો મારો તિરસ્કાર કરે છે; પણ મારી આંખ ઈશ્વર આગળ આંસુઓ રેડે છે;

²¹ એ માટે કે ઈશ્વર માણસના વાજબી હકને તથા પોતાના પડોશી સાથે મનુષ્યના હકને જાળવી રાખે!

²² કેમ કે થોડાં વર્ષ વીતશે ત્યારે જ્યાંથી હું પાછો આવી શકું નહિ તે માર્ગે હું જઈશ.