ઉત્પત્તિ 11 - પવિત્ર બાઇબલ OV Reference Bible (BSI)

બાબિલનો બુરજ

¹ અને આખી પૃથ્વીમાં એક જ ભાષા તથા એક જ બોલી હતી.

² અને એમ થયું કે, તેઓ પૂર્વ તરફ રખડતા રખડતા શિનઆર દેશના એક મેદાનમાં આવી પહોંચ્યા, ને ત્યાં રહ્યા.

³ અને તેઓએ એકબીજને કહ્યું, “ચાલો, આપણે ઈંટો પાડીએ, ને તે સારી પેઢે પકવીએ.” અને પથ્થરને ઠેકાણે તેઓની પાસે ઇંટો હતી, ને છોને ઠેકાણે ડામર હતો.

⁴ અને તેઓએ કહ્યું, “ચાલો, આપણે પોતાના માટે એક શહેર બાંધીએ તથા જેની ટોચ આકાશ સુધી પહોંચે, એવો બુરજ બાંધીએ, અને એમ આપણે પોતાને માટે નામના મેળવીએ; કે આખી પૃથ્વી પર આપણે વિખેરાઈ ન જઈએ.”

⁵ અને જે નગર તથા બુરજ માણસોના દિકરાઓ બાંધતા હતા, તે જોવાને યહોવા ઊતર્યાં.

⁶ અને યહોવાએ કહ્યું, “જુઓ, આ લોકો એક છે, ને તે સર્વની ભાષા એક છે; અને તેઓએ આવું કરવા માંડયું છે: તો હવે જે કંઈ તેઓ કરવા ધારે તેમાં તેઓને અટકાવ નહિ થશે.

⁷ ચાલો, આપણે ત્યાં ઊતરીએ, ને તેઓની ભાષા ઉલગાવી નાખીએ કે, તેઓ એકબીજાની બોલી ન સમજે.”

⁸ એમ યહોવાએ તેઓને ત્યાંથી આખી પૃથ્વી પર વિખેરી નાખ્યા; અને તેઓએ નગર બાંધવાનું મૂકી દીધું.

⁹ એ માટે તેનું નામ બાબિલ [એટલે ગૂંચવણ] પડ્યું; કેમ કે યહોવાએ ત્યાં આખી પૃથ્વીની ભાષામાં ગૂંચવણ કરી નાખી. અને યહોવએ તેઓને ત્યાંથી આખી પૃથ્વી પર વિખેરી નાખ્યા.

શેમના વંશજ

¹⁰ શેમની વંશાવાળી આ પ્રમાણે છે: શેમ સો વર્ષનો હતો, ને જળપ્રલયને બે વર્ષ થયા પછી તેને આર્પાકશાદ થયો.

¹¹ અને આર્પાકશાદનો જન્મ થયા પછી શેમ પાંચસો વર્ષ જીવ્યો, ને તેને દિકરાદીકરીઓ થયાં.

¹² અને આર્પાકશાદ પાંત્રીસ વર્ષનો થયો, ત્યારે તેને શેલા થયો;

¹³ અને શેલાનો જન્મ થયા પછી આર્પાકશાદ ચારસો ત્રણ વર્ષ જીવ્યો, ને તેને દિકરાદીકરીઓ થયાં.

¹⁴ અને શેલા ત્રીસ વર્ષનો થયો, ત્યારે તેને હેબેર થયો.

¹⁵ અને હેબરનો જન્મ થયા પછી શેલા ચારસો ત્રણ વર્ષ જીવ્યો, ને તેને દિકરાદીકરીઓ થયાં.

¹⁶ અને હેબેર ચોત્રીસ વર્ષનો થયો ત્યારે તેને પેલેગ થયો.

¹⁷ અને પલેગનો જન્મ થયા પછી હેબેર ચારસો ત્રીસ વર્ષ જીવ્યો, ને તેને દિકરાદીકરીઓ થયાં.

¹⁸ અને પેલેગ ત્રીસ વર્ષનો થયો, ને તેને રેઉ થયો.

¹⁹ અને રેઉનો જન્મ થયા પછી પેલેગ બસો નવ વર્ષ જીવ્યો, ને તેને દિકરાદીકરીઓ થયાં.

²⁰ અને રે ઉ બત્રીસ વર્ષનો થયો, ને તેને સરૂગ થયો.

²¹ અને સરૂગનો જન્મ થયા પછી રેઉ બસો સાત વર્ષ જીવ્યો, ને તેને દિકરાદીકરીઓ થયાં.

²² અને સરૂગ ત્રીસ વર્ષનો થયો, ને તેને નાહોર થયો.

²³ અને નાહોરનો જન્મ થયા પછી સરૂગ બસો વર્ષ જીવ્યો, ને તેને દિકરાદીકરીઓ થયાં.

²⁴ અને નાહોર ઓગણત્રીસ વર્ષનો થયો, ને તેને તેરા થયો.

²⁵ અને તેરાનો જન્મ થયા પછી નાહોર એકસો ઓગણીસ વર્ષ જીવ્યો, ને તેને દિકરાદીકરીઓ થયાં.

²⁶ અને તેરા સિત્તેર વર્ષનો થયો, ને તેને ઇબ્રામ તથા નાહોર તથા હારાન થયા.

તેરાના વંશજ

²⁷ હવે તેરાની વંશાવળી આ પ્રમાણે છે: તેરાને ઇબ્રામ તથા નાહોર તથા હારાન થયા. અને હારાનથી લોત થયો.

²⁸ અને હારાન પોતાના પિતા તેરાની અગાઉ, પોતાના જન્મદેશમાં કાસ્દીઓના ઉર [નગર] માં મરી ગયો.

²⁹ ઇબ્રામે તથા નાહોરે પત્નીઓ કરી:ઇબ્રામની પત્નીનું નામ સારાય; અને નાહોરની પત્નીનું નામ મિલ્કા, જે હારાનની દીકરી હતીલ; તે હારાન તો મિલ્કા તથા યિસ્કાનો પિતા હતો.

³⁰ પણ સારાય વાંઝણી હતી. તેને કંઈ છોકરું ન હતું.

³¹ અને તેરા પોતાના દિકરાનો દીકરો લોત, જે હારાનનો દીકરો તેને, તથા પોતાના દિકરા ઇબ્રામની પત્ની સારાયને લઈને તેઓ સુદ્ધાં કાસ્દીઓના ઉરમાંથી, કનાન દેશમાં જવાને નીકળ્યો; અને તેઓ હારાનમાં આવીને ત્યાં રહ્યાં.

³² અને તેરાના દિવસો બસો પાંચ વર્ષ હતાં. અને તેરા હારાનમાં મરી ગયો.