નિર્ગમન 39 - પવિત્ર બાઇબલ OV Reference Bible (BSI)

યાજકોના પોશાક બનાવ્યા

¹ અને યહોવાએ મૂસાને આજ્ઞા આપી હતી તે પ્રમાણે તેઓએ પવિત્રસ્થાનમાં સેવા કરવાને માટે નીલ તથા જાંબુડા તથા કિરમજી રંગનાં ઝીણાં વસ્‍ત્ર બનાવ્યાં. તેમ હારુનને માટે પણ તેઓએ પવિત્ર વસ્‍ત્ર બનાવ્યાં.

² અને તેણે સોનાનો, નીલ, જાંબુડા તથા કિરમજી રંગનો, તથા ઝીણા કાંતેલા શણનો એફોદ બનાવ્યો.

³ અને તેમણે સોનાનાં પાતળાં પતરાં ઘડીને તેમને કાપીને તેના તાર બનાવ્યા, એ માટે કે તેમને નીલ તથા જાંબુડા તથા કિરમજી તથા ઝીણા શણની સાથે નિપુણ કારીગરીથી વણે.

⁴ તેઓએ તેને માટે ભેગી સાંધી લીધેલી સ્કંધપટીઓ બનાવી; તેની બે કોરો ભેગી સાંધી દીધેલી હતી.

⁵ અને એફોદનો ચતુરાઈથી વણેલો જે પટકો તેને બાંધવા માટે તેના પર હતો, તે તેની સાથે સળંગ હતો તથા તેવી જ બનાવટનો હતો; એટલે સોનાનો, નીલ તથા જાંબુડા તથા કિરમજી રંગનો, તથા ઝીણા કાંતેલા શણનો હતો. જેમ યહોવાએ મૂસાને આજ્ઞા આપી હતી તેમ.

⁶ અને તેઓએ ગોમેદ પાષાણો તૈયાર કરીને, તેમના પર ઇઝરાયલી કુળના નામ મુદ્રાની કોતરણીથી કોતરીને, તેમને સોનાના ચોકઠામાં બેસાડયાં.

⁷ અને યહોવાએ મૂસાને આજ્ઞા આપી હતી તે પ્રમાણે તેણે તેઓને ઇઝરાયલી લોકો માટે સ્મરણપાષાણો થવા માટે એફોદની સ્કંધપટીઓ પર લગાડયા.

ઉરપત્ર બનાવ્યું.

⁸ અને મૂસાએ એફોદના જેવી બનાવટનું તથા નિપુણ કારીગરની કારીગરીનું ઉરપત્ર બનાવ્યું; એટલે સોનાનું, નીલ તથા જાંબુડા તથા કિરમજી તથા ઝીણા કાંતેલા શણનું [બનાવ્યું].

⁹ તે ચોરસ હતું; તેઓએ ઉરપત્રને બેવડું બનાવ્યું:બેવડાની લંબાઈ એક વેંત, તથા પહોળાઈ એક વેંત હતી.

¹⁰ અને તેઓએ તેમાં પાષાણની ચાર હારો જડી:માણેક, પોખરાજ તથા લાલની હાર તે પહેલી હાર હતી.

¹¹ અને બીજી હાર લીલમ, નીલમ તથા હીરાની,

¹² અને ત્રીજી હાર શનિ, અકીક તથા યાકૂતની.

¹³ અને ચોથી હાર પિરોજ તથા ગોમેદ તથા યાસપિસની. તેઓએ તેઓનાં ઘરોમાં બેસાડીને તેમને ચોકઠામાં જડયા હતા.

¹⁴ અને પાષાણો તેઓનાં નામ પ્રમાણે એટલે ઇઝરાયલી કુળનાં નામ પ્રમાણે બાર હતા; બારે કુળોમાંના પ્રત્યેકનું નામ એકેક પાષાણ પર મુદ્રાના જેવી કોતરણીથી કોતરેલું હતું.

¹⁵ અને તેઓએ ઉરપત્ર પર ચોખ્ખા સોનાની ગૂંથેલી દોરી જેવી સાંકળીઓ બનાવી.

¹⁶ અને તેઓએ સોનાનાં બે ચોકઠાં તથા સોનાની બે કડીઓ બનાવી; અને તે બે કડીઓ તેઓએ ઉરપત્રના બે છેડા પર લગાડી.

¹⁷ અને તેઓએ તે સોનાની ગૂંથેલી બે સાંકળીઓ ઉરપત્રના છેડા આગળની બે કડીઓને લગાડી.

¹⁸ અને તે ગૂંથેલી બે સાંકળીઓના બાકીના બે છેડાને બે ચોકઠાંમાં જડીને તેઓએ તેમને એફોદના આગલા ભાગમાં તેની સ્કંધપટીઓ પર લગાડયા.

¹⁹ અને તેઓએ સોનાની બે કડીઓ બનાવીને તેઓને ઉરપત્રના બે છેડા પર, એટલે અંદરની બાજુએ એફોદ તરફની કોર પર લગાડી.

²⁰ અને તેઓએ સોનાની બીજી બે કડીઓ બનાવીને એફોદની સ્કંધપટીઓની નીચલી બાજુએ, તેના આગલા ભાગમાં તેના સાંધાની નજીક, એફોદના નિપુણ કારીગરીના પટકાનિ ઉપલી બાજુએ તેઓને લગાડી.

²¹ અને તેઓએ નીલરંગી ફીતથી ઉરપત્રને તેની કડીઓ વડે એફોદના નિપુણ કારીગરીના પટકા ઉપર રહે, ને ઉરપત્ર એફોદથી છૂટું પડી ન જાય; જેમ યહોવાએ મૂસાને આજ્ઞા આપી હતી તેમ.

યાજકોનાં અન્ય વસ્‍ત્ર બનાવ્યાં

²² અને મૂસાએ એફોદનો જામો તમામ નીલ રંગનો વણેલો બનાવ્યો.

²³ અને જામાની વચ્ચે તેનો છેદ કવચના છેદ જેવો હતો, ને તે ફાટી ન જાય માટે તેણે આસપાસથી તે ઓટી લીધો હતો.

²⁴ અને તેઓએ જામાના ઘેર પર નીલ તથા જાંબુડા તથા કિરમજી રંગનાં તથા કાંતેલા શણનાં દાડમ બનાવ્યાં.

²⁵ અને તેઓએ ચોખ્ખા સોનાની ઘૂઘરીઓ બનાવી, અને તે ઘૂઘરીઓ જામાના ઘેરને ફરતી દાડમની વચ્ચે વચ્ચે લગાડી;

²⁶ એટલે પહેરીને સેવા કરવા માટે, જામાના ઘેરને ફરતી એક ઘૂઘરી ને એક દાડમ, એક ઘૂઘરી ને એક દાડમ, એમ લગાડયાં; જેમ યહોવાએ મૂસાને આજ્ઞા આપી હતી તેમ.

²⁷ અને તેઓએ હારુનને માટે તથા તેના દીકરાઓને માટે ઝીણા વણેલા શણના અંગરખા,

²⁸ તથા ઝીણ શણની પાઘડીઓ, તથા ઝીણા શણનાં સુશોભિત ફાળિયાંમ તથા ઝીણા કાંતેલા શણની ઇજારો [બનાવ્યાં].

²⁹ તથા ઝીણા કાંતેલા શણનો, તથા નીલ જાંબુડા તથા કિરમજી રંગનો, ભરત ભરનારની કારીગરીનો કમરપટો બનાવ્યો; જેમ યહોવાએ મૂસાને આજ્ઞા આપી હતી તેમ.

³⁰ અને તેઓએ ચોખ્ખા સોનાનું પવિત્ર મુગટનું પતરું બનાવ્યું, ને તેના પર, ‘યહોવાને માટે પવિત્ર, ’ એવો લેખ, મુદ્રાના જેવી કોતરણીથી કોતર્યો.

³¹ નઅએ તેને પાઘડીની ટોચે બાંધવા માટે તેઓએ તેને નીલ રંગની ફીત લગાડી; જેમ યહોવાએ મૂસાને આજ્ઞા આપી હતી તેમ.

બધાં કામ પૂર્ણ થયાં

³² મુલાકાતમંડપના માંડવાનું બધું કામ એ પ્રમાણે પૂરું થયું; અને યહોવાએ મૂસાને આપેલી સર્વ આજ્ઞા પ્રમાણે ઇઝરાયલી લોકોએ કર્યું.

³³ અને તેઓ મંડપ મૂસા પાસે લાવ્યા, એટલે મંડપ તથા તેનો સર્વ સામાન, તેના ચાપડા, તેનાં પાટિયાં, તેની ભૂંગળો, તથા તેના સ્તંભો, તથા તેની કૂંભીઓ;

³⁴ તથા મેંઢાનાં રાતાં રંગેલા ચામડાનું આચ્છાપન તથા સીલ [માછલાં] નાં ચામડાંનું આચ્છાદન તથા અંતરપટ;

³⁵ કરારકોશ તથા તેના દાંડા તથા દયાસન;

³⁶ મેજ, તેનાં સર્વ પાત્રો, તથા અર્પેલી રોટલી;

³⁷ શુદ્ધ દીપવૃક્ષ તથા તેના દીવા, એટલે [તે પર] ગોઠવવાના દીવા, તથા તેનાં સર્વ પાત્રો, તથા રોશનીને માટે તેલ;

³⁸ તથા સોનાની વેદી, તથા અભિષેક કરવાનું તેલ, તથા ખુશબોદાર ધૂપ, તથા મંડપના દરવાજાનો પડદો;

³⁹ પિત્તળની જાળી, તેના દાંડા, તથા તેનાં સર્વ પાત્રો, હોજ તથા તેનું તળિયું;

⁴⁰ આંગણાના પડદા, તેના સ્તંભ, તથા તેની કૂંભીઓ, તથા આંગણાના દરવાજાનો પડદો, તેની દોરીઓ, તથા તેની ખીલીઓ, તથા મુલાકાતમંડપને માટે માંડવાની સેવાનાં સર્વ પાત્રો;

⁴¹ પવિત્રસ્થાનમાં સેવા કરવાને ઝીણાં વણેલાં વસ્‍ત્રો, તથા યાજકપદ બજાવવા માટે હારુન યાજકને માટે પવિત્ર વસ્‍ત્રો, તથા તેના દીકરાઓને માટે વસ્‍ત્રો [તે બધું તેઓ લાવ્યા].

⁴² જે આજ્ઞા યહોવાએ મૂસાને આપી હતી, તે સર્વ પ્રમાણે ઇઝરાયલી લોકોએ સર્વ કામ કર્યું.

⁴³ અને મૂસાએ બધું કામ જોયું, તો જુઓ, તેઓએ તે પૂરું કર્યું હતું; જેમ યહોવાએ આજ્ઞા આપી હતી તે જ પ્રમાણે તેઓએ તે કર્યું હતું; અને મૂસાએ તેમને આશીર્વાદ આપ્યો.