૧ કાળવૃત્તાંત 16 - પવિત્ર બાઇબલ OV Reference Bible (BSI)

¹ તેઓએ ઈશ્વરના કોશને અંદર બાંધેલા મંડપની વચ્ચે તેને મૂક્યો. તેઓએ ઈશ્વરની આગળ દહનીયાર્પણો તથા શાંત્યર્પણો ચઢાવ્યાં.

² જ્યારે દાઉદ દહનીયાર્પણો તથા શાંત્યર્પણો ચઢાવી રહ્યો, ત્યારે તેણે યહોવાને નામે લોકોને આશીર્વાદ આપ્યો.

³ તેણે ઇઝઃરાયલના દરેક માણસને, પુરુષને તથા સ્ત્રીને, અકેક ભાખરો, [માંસનો] કટકો તથા સૂકી દ્રક્ષાનો અકેક ઝૂમખો વહેંચી આપ્યાં.

⁴ યહોવાના કોશની આગળ સેવા કરવા માટે તથા ઈઝરાયલના ઈશ્વર યહોવાના સંભારણાના ગીત ગાવા, તેમનો આભાર માનવા તથા તેમની સ્તુતી કરવા માટે કેટલાક લેવીઓને તેણે નીચે પ્રમાણે નીમ્યા.

⁵ એટલે મુખ્ય આસાફ તથા તેની ઊતરતે દરજ્જે ઝખાર્યા, યઝીએલ, શમિરામોથ, યહીએલ, માતિથ્યા, એલિયાબ બનાયા, ઓબેદ-અદોમ તથા યેઈએલ હતા. તેઓ સિતાર તથા વીણા વગાડતા, આસાફ ઝાંઝ લઈને મોટેથી વગાડતો હતો.

⁶ બનાયા તથા યાહઝીએલ યાજકો રણશિંગડાં લઈને ઈશ્વરના કરારકોશની આગળ નિયમિત [રહેતા હતા.]

⁷ પછી યહોવાનું સ્તવન કરવાનો વિધિ તે દિવસે પહેલવહેલાં આસાફ તથા તેના ભાઈઓની મારફતે દાઉદે શરૂ કર્યો.

સ્તુતિગાન

⁸ યહોવાનો આભાર માનો, તેમનો મહિમા ગાઓ; લોકોમાં તેમનાં કૃત્યો જાહેર કરો.

⁹ તેમનાં ગુણગાન કરો, તેમની સ્તુતિનાં ગીત ગાઓ; તેમનાં સર્વ અદ્‍ભુત કામોનું મનન કરો.

¹⁰ તમે તેમના પવિત્ર નામનું અભિમાન રાખો; યહોવાના ભક્તોનાં હ્રદયો આનંદમાં રહો.

¹¹ યહોવાને તથા તેમના સામર્થ્યને તમે શોધો; સદાસર્વદા તેમના મુખને શોધો.

¹² જે અદ્‍ભુત કામો તેમણે કર્યા છે તે યાદ રાખો; તેમના ચમત્કાર તથા તેમના મુખનાં ન્યાયવચનો [યાદ રાખો] ;

¹³ હે તેમના સેવક ઇઝરાયલનાં સંતાન, હે યાકૂબના પુત્રો, તેમના પસંદ કરેલા, [તેમને તમે યાદ રાખો].

¹⁴ તે આપણા ઈશ્વર યહોવા છે. તેમની સત્તા આખી પૃથ્વી પર છે.

¹⁵ તેમનો કરાર તમે સદાકાળ યાદ રાખો, એટલે હજારો પેઢીઓ સુધી કાયમ રાખવાનું જે વચન તેમણે આપ્યું;

¹⁶ ઈબ્રાહિમની સાથે જે કરાર તેમણે કર્યો, અને ઇસહાકની સાથે જે પ્રતિજ્ઞા તેમણે લીધી;

¹⁷ એ જ વચન યાકૂબને માટે નિયમ તરીકે, અને ઇઝરાયલને માટે સદાકાળના કરાર તરીકે સ્થાપ્યું:

¹⁸ તેમણે કહ્યું, “આ કનાન દેશ હું તને આપીશ, તે તારા વારસાનો ભાગ થશે.”

¹⁹ તે વખતે તમે સંખ્યામાં થોડાં જ, હા, છેક થોડાં જ, ને વળી તેમાં મુસાફર હતાં;

²⁰ તેઓ એક દેશથી બીજે દેશ, એક રાજ્યમાંથી બીજા રાજ્યમાં ફર્યા કરતાં હતાં.

²¹ તમણે તેઓ પર કોઈને જુલમ કરવા દીધો નહિ; હા, તેમને લીધે તેમણે રાજાઓને શિક્ષા કરી;

²² [એમ કહીને કે] “મારા અભિષિક્તોને આડશો નહિ, અને મારા પ્રબોધકોને ઉપદ્રવ કરશો નહિ.”

²³ હે સર્વ પૃથ્વી [વાસીઓ] યહોવાના ગુણગાન કરો; દિનપ્રતિદિન તેમનો વિજય પ્રગટ કરો.

²⁴ વિદેશીઓમાં તેમનો મહિમા, સર્વ લોકોમાં તેમના ચમત્કારો જાહેર કરો.

²⁵ કેમ કે યહોવા મોટા તથા ઘણા સ્તુત્ય છે; વળી સર્વ દેવો કરતાં તે ભય યોગ્ય છે.

²⁶ કેમ કે લોકોના સર્વ દેવો મૂર્તીઓ જ છે; પણ યહોવાએ તો આકાશો બનાવ્યાં.

²⁷ તેમની સંમુખ ગૌરવ તથા મહિમા છે; તેમના મંદિરમાં સામર્થ્ય તથા આનંદ છે.

²⁸ હે લોકોનાં કુળો, તમે યહોવાને, હા, યહોવાને જ, ગૌરવ તથા સામર્થ્ય [નું માન] આપો.

²⁹ યહોવાના નામને ઘટિત ગૌરવ આપો. અર્પણ લઈને તેમની હજૂરમાં આવો; પવિત્ર વસ્ત્ર પહેરીને યહોવાની આગળ નમો.

³⁰ આખી પૃથ્વી તેમની આગળ ધ્રૂજે; જગત પણ એવી રીતે સ્થપાયેલું છે કે, તેને હલાવી શકાય નહિ.

³¹ આકાશો આનંદ કરે, ને પૃથ્વી હરખાય; અને વિદેશીઓ મધ્યે એવું કહેવાય કે, “યહોવા રાજ કરે છે.”

³² સમુદ્ર તથા તેમાં જે છે તે ગર્જના કરે; ખેતરો તથા તેઓમાં જે છે, તે સર્વ ઉત્સાહ કરે;

³³ ત્યારે વનનાં વૃક્ષો યહોવાની આગળ હર્ષનાદ કરશે, કેમ કે તે પૃથ્વીનો ન્યાય કરવા આવે છે.

³⁴ યહોવાનો આભાર માનો, કેમ કે તે કૃપાળુ છે; કેમ કે તેમની દયા સદાકાળ ટકે છે.

³⁵ બોલો, “હે અમને તારણ આપનાર ઈશ્વર તમારો ઉદ્ધાર કરો, તમારા પવિત્ર નામનો આભાર માનવાને, તથા તમારી સ્તુતિનો જયજયકાર કરવાને અમને એકત્ર કરો, ને વિદેશીઓના હાથમાંથી અમને છોડાવો.

³⁶ ઇઝરાયલના ઈશ્વર યહોવા અનાદિકાળથી તે અનંતકાળ માટે સ્તુત્ય થાઓ.” સર્વ લોકે ‘આમેન’ કહીને યહોવાની સ્તુતિ કરી.

યરુશાલેમ અને ગિબ્યોનમાં ભજનભક્તિ

³⁷ ત્યાર પછી દાઉદે ત્યાં યહોવાના કરારકોશની આગળ આસાફને તથા તેના ભાઈઓને, કોશની આગળ રોજના કામની જરૂરિયાત પ્રમાણે નિત્ય સેવા કરવા માટે રહેવા દીધા.

³⁸ તેમ જ યદૂથૂનનો પુત્ર ઓબેદ-અદોમ તથા હોસા ને તેઓના અડસઠ ભાઈઓને દ્વારપાળો તરીકે [નીમ્યા].

³⁹ અને સાદોક યાજકને તથા તેના સાથી યાજકોને ગિબ્યોનમાંના ઉચ્ચસ્થાનમાં યહોવાના મંડપ આગળ

⁴⁰ યહોવાએ ઇઝરાયલને ફરમાવેલા નિયમશાસ્ત્રમાં જે સર્વ લખેલું છે, તે પ્રમાણે દરરોજ સવારે તથા સાંજે દહનીયાર્પણની વેદી પર યહોવાને દહનીયાર્પણો ચઢાવવા માટે [નીમ્યા.]

⁴¹ તેઓની સાથે તેણે હેમાન તથા યદૂથૂન તથા બાકીના પસંદ કરેલા કે, જેઓ નામવાર નોંધાયેલા હતા, તેઓને યહોવાએ જેમની કૃપા સર્વકાળ સુધી ટકે છે તેમની આભારસ્તુતિ કરવા માટે [નીમ્યા] ;

⁴² તેઓને મોટેથી વગાડવા માટે રણશીંગડા, ઝાંઝ તથા ઈશ્વરનાં ગીતોને માટે વાજિંત્રો આપવામાં આવ્યાં; અને યદૂથૂનના પુત્રોને દ્વારપાળો [નીમ્યા].

⁴³ પછી સર્વ લોક વિદાય થઈને પોતપોતાને ઘેર ગયા, અને દાઉદ પોતાના કુટુંબના માણસોને આશીર્વાદ આપવા માટે પોતાના મહેલમાં પાછો ગયો.