ઝખાર્યા 6 - પવિત્ર બાઇબલ C.L.

ચાર રથનું સંદર્શન

¹ મને એક બીજુ સંદર્શન થયું. આ વખતે મેં તાંબાના બે પર્વતો વચ્ચેથી નીકળી આવતા ચાર રથ જોયા.

² પહેલા રથને ખેંચનાર ઘોડાઓ લાલ, બીજાને ખેંચનાર ઘોડાઓ કાળા,

³ ત્રીજાને ખેંચનાર ઘોડા શ્વેત અને ચોથા રથને ખેંચનાર ઘોડાઓ કાબરચીતરા હતા.

⁴ પછી મેં દૂતને પૂછયું, “મુરબ્બી, આ રથોનો શો અર્થ છે?”

⁵ તેણે જવાબ આપ્યો, “આ તો ચાર વાયુ છે; તેઓ હમણા જ આખી પૃથ્વીના પ્રભુની સમક્ષતામાંથી આવ્યા છે.”

⁶ કાળા ઘોડાઓએ જોડેલો રથ ઉત્તરમાં બેબિલોન તરફ જતો હતો; શ્વેત ઘોડાઓ પશ્ર્વિમ તરફ અને કાબરચીતરા ઘોડાઓ દક્ષિણમાં આવેલા દેશ તરફ જતા હતા.

⁷ કાબરચીતરા ઘોડા તો જેવા બહાર આવ્યા કે તેઓ પૃથ્વીનું નિરીક્ષણ કરવા જવા અધીરા બની ગયા. દૂત બોલ્યો, “જાઓ, જઈને પૃથ્વીનું નિરીક્ષણ કરો.”

⁸ પછી દૂતે મને બૂમ પાડીને કહ્યું, “બેબિલોન તરફ ગયેલા ઘોડાઓએ પ્રભુનો રોષ શમાવી દીધો છે.”

યહોશુઆનો અભિષેક પ્રભુએ મને આ સંદેશો આપ્યો.

^9-10 તેમણે કહ્યુ, “દેશનિકાલીમાંથી આવેલા હેલ્દાય, ટોલિયા અને યદાયાએ આપેલી ભેટો લઈને સત્વરે સફાન્યાના પુત્ર યોશિયાને ઘેર જા. તેઓ સૌ બેબિલોનના બંદીવાસમાંથી પાછા ફર્યા છે.

¹¹ તેમણે આપેલા સોનારૂપામાંથી મુગટ બનાવીને યહોસાદાકના પુત્ર, પ્રમુખ યજ્ઞકાર યહોશુઆને માથે મૂક.

¹² તેને કહે કે સર્વસમર્થ પ્રભુ આમ જણાવે છે: “અંકુર તરીકે ઓળખાતો પુરુષ તેના સ્થાનમાં આબાદ થશે અને તે પ્રભુનું મંદિર ફરીથી બાંધશે.

¹³ તે જ તેને બાંધશે અને રાજાને છાજતું માન તેને મળશે અને તે પોતાના લોકો ઉપર રાજ કરશે. તેના રાજ્યાસનની પડખે યજ્ઞકાર ઊભો રહેશે અને તેઓ બન્‍ને શાંતિ અને સહકારથી ક્મ કરશે.

¹⁴ હેલ્દાય, ટોલિયા, યદાયા અને સફાન્યાના પુત્ર યોશિયાના માનમાં એ મુગટ પ્રભુના મદિરમાં સ્મારક બની રહેશે.”

¹⁵ દૂરદૂર વસતા લોકો આવીને પ્રભુનું મંદિર બાંધશે. જ્યારે તે બંધાઈ જાય ત્યારે તમે જાણશો કે પ્રભુએ મને મોકલ્યો છે. તમે તમારા ઈશ્વર પ્રભુની આજ્ઞાઓ સંપૂર્ણપણે પાળશો તો એ બધું પરિપૂર્ણ થશે.