ગીતશાસ્ત્ર 98 - પવિત્ર બાઇબલ C.L.

પૃથ્વીના શાસક ઈશ્વર

¹ પ્રભુની સંમુખ કોઈ નવું ગીત ગાઓ. કારણ, પ્રભુએ અજાયબ કાર્યો કર્યાં છે. તેમના જમણા હાથે અને તેમના પવિત્ર ભુજે વિજય મેળવ્યો છે.

² પ્રભુએ પોતાના આ વિજયની ઘોષણા કરી છે. તેમણે પ્રજાઓ સમક્ષ પોતાની ઉદ્ધારક શક્તિ પ્રગટ કરી છે.

³ તેમણે પોતાના ઇઝરાયલ લોક પ્રત્યે, પોતાનો પ્રેમ અને વિશ્વાસુપણું દર્શાવવાનું યાદ રાખ્યું છે; પૃથ્વીની સીમા સુધીના સર્વ લોકોએ આપણા ઈશ્વરનો ઉદ્ધાર જોયો છે.

⁴ હે પૃથ્વીના સર્વ લોકો, પ્રભુની સમક્ષ હર્ષનાદ કરો; જોશપૂર્વક જયજયકાર કરો અને ગીતો ગાઓ.

⁵ વીણા સાથે પ્રભુની સ્તુતિ ગાઓ, વીણા અને મધુર સંગીત સાથે ગીતો ગાઓ.

⁶ તૂરી અને રણશિંગડાના નાદ સાથે, આપણા રાજા પ્રભુની હજુરમાં હર્ષનાદ કરો.

⁷ પ્રભુની સમક્ષ સમુદ્ર અને તેનાં મોજાં ગર્જના કરો; પૃથ્વી અને તેના સર્વ નિવાસીઓ ગાજી ઊઠો;

⁸ પ્રવાહો તાળી પાડો, પર્વતો એક સાથે જયજયકાર કરો;

⁹ કારણ, પ્રભુ પૃથ્વીનો ન્યાય કરવા આવે છે; તે નેકીથી જગતનો અને નિષ્પક્ષપાતપણે સર્વ પ્રજાઓનો ન્યાય કરશે.