ગીતશાસ્ત્ર 91 - પવિત્ર બાઇબલ C.L.

ઈશ્વર આપણા રક્ષણહાર ભક્તની સાક્ષી અને ખાતરી

¹ સર્વોચ્ચ ઈશ્વરના આશ્રયસ્થાનમાં જે વસે છે અને સર્વસમર્થની છાયામાં જે નિવાસ કરે છે;

² તે કહે છે, “પ્રભુ મારા શરણસ્થાન અને દૂર્ગ છે, મારા ઈશ્વર પર હું ભરોસો રાખું છું.”

³ એકલા તે જ તને શિકારીના ફાંદાથી અને જીવલેણ મરકીથી બચાવશે.

⁴ પક્ષી પોતાનાં બચ્ચાંને પીંછાથી ઢાંકે તેમ તે તેને ઢાંકશે અને તેમની પાંખો નીચે તને આશ્રય મળશે. તેમનું વિશ્વાસુપણું ઢાલ અને બખ્તર સમાન રક્ષણ આપશે.

⁵ રાત્રિનાં જોખમો અને દિવસે ફેંકાનાર તીરથી,

⁶ અંધકારમાં ફેલાતી મરકીથી, અને ભર બપોરે પ્રસરતી મહામારીથી તું ડરીશ નહિ.

⁷ તારી ડાબી બાજુએ હજાર માણસો અને તારી જમણી બાજુએ દશ હજાર પડશે; છતાં તે મહામારી તને સ્પર્શશે નહિ.

⁸ તું તારી આંખોથી માત્ર તે વિનાશ જોશે, અને દુષ્ટોને મળતી સજા નિહાળશે.

⁹ તેં માત્ર પ્રભુનું જ શરણ સ્વીકાર્યું છે, અને સર્વોચ્ચ ઈશ્વરનો આશ્રય લીધો છે;

¹⁰ તેથી તારા પર કશી આપત્તિ આવી પડશે નહિ, અને મરકી તારા નિવાસ નિકટ આવી શકશે નહિ.

¹¹ કારણ, તારા સર્વ માર્ગોમાં તારી રક્ષા કરવા, ઈશ્વર પોતાના દૂતોને આજ્ઞા આપશે.

¹² તેઓ પોતાના હાથમાં તને ઉઠાવી લેશે; જેથી તારા પગ પથ્થરો સાથે અફળાય નહિ.

¹³ તું સિંહો અને સર્પોને છૂંદશે; યુવાન સિંહોને અને અજગરોને તું કચડી નાખશે.

ઈશ્વરનું વચન

¹⁴ ઈશ્વર કહે છે, “તે મને પ્રેમથી વળગી રહે છે માટે હું તેને બચાવીશ, તે મારું નામ કબૂલ કરે છે તેથી હું તેની રક્ષા કરીશ.

¹⁵ તે મને પોકારશે ત્યારે હું તેને ઉત્તર આપીશ, સંકટમાં હું તેની સાથે રહીશ; હું તેને મુક્ત કરીને સફળતાથી સન્માનિત કરીશ.

¹⁶ હું તેને દીર્ઘાયુષ્યથી તૃપ્ત કરીશ, અને હું તેને મારા ઉદ્ધાર દેખાડીશ.”