ગીતશાસ્ત્ર 90 - પવિત્ર બાઇબલ C.L.

ચોથો ખંડ ( 90—106 ગીતો) શાશ્વત ઈશ્વર અને મર્ત્ય માનવી

(ઈશ્વરભક્ત મોશેની પ્રાર્થના)

¹ હે પ્રભુ, તમે વંશાનુવંશ અમારું આશ્રયસ્થાન બન્યા છો.

² પર્વતો ઉત્પન્‍ન થયા તે પહેલાં અરે, તમે વિશ્વ તથા પૃથ્વી રચ્યાં તે પહેલાં; એટલે અનાદિકાળથી અનંતકાળ સુધી, તમે સાર્વકાલિક ઈશ્વર છો.

³ તમે આજ્ઞા કરો છો: “હે માનવપુત્રો, જ્યાં હતા ત્યાં પાછા ફરો,” અને પછી માનવીને પાછો ધૂળમાં મેળવી દો છો.

⁴ તમારી દષ્ટિમાં અમારા હજાર વર્ષ, વીતી ગયેલ ગઈકાલના જેવાં ટૂંકાં છે; અરે, તમારે મન તે રાત્રિના એક પ્રહર સમાન છે.

⁵ તમે તેમને પાણીના પૂરની જેમ તાણી જાઓ છો. તેઓ તો નિદ્રા સમાન છે. તેઓ સવારમાં ઊગતા ઘાસ જેવા છે.

⁶ ઘાસ સવારે ઊગે છે અને વૃદ્ધિ પામે છે; સાંજે તે સુકાઈને ચીમળાઈ જાય છે.

⁷ તમારા ક્રોધથી અમે ભસ્મીભૂત બની જઈએ છીએ અને તમારા રોષથી અમને ત્રાસ થાય છે.

⁸ કારણ, તમે અમારા અન્યાય જોઈ શકો છો. બલ્કે, અમારાં ગુપ્ત પાપો પણ તમારી વેધક દષ્ટિથી છુપાં નથી.

⁹ અમારા સર્વ દિવસો તમારા રોષમાં વીતી જાય છે. નિસાસાની જેમ અમારાં આયુષ્યનો અંત આવે છે.

¹⁰ અમારાં આયુષ્યનાં વર્ષો કદાચ સિત્તેર જેટલાં હોય, અથવા શક્તિને લીધે કદાપિ એંસી વર્ષ જેટલાં પણ થાય; તો પણ તે અમારે માટે મુશ્કેલી અને દુ:ખથી ભરેલાં છે; જિંદગી ઝડપથી પૂરી થાય છે અને અમે ઊડી જઈએ છીએ.

¹¹ તમારા ક્રોધની ઉગ્રતા કોણ જાણે છે? એવા રોષ માટે કેટલો ભય રાખવો ઘટે!

¹² હે પ્રભુ, અમને અમારા આયુષ્યના અલ્પ દિવસો ગણતાં શીખવો; જેથી અમને જ્ઞાનવાળું હૃદય પ્રાપ્ત થાય.

¹³ હે પ્રભુ, પાછા આવો; ક્યાં સુધી તમારો રોષ રહેશે? તમારા આ ભક્તો પર અનુકંપા દર્શાવો.

¹⁴ દર સવારે તમારા પ્રેમથી અમને તૃપ્ત કરો, જેથી અમે અમારા સર્વ દિવસો હર્ષાનંદમાં ગુજારીએ.

¹⁵ જેટલા દિવસો તમે અમને પીડા આપી અને જેટલાં વર્ષો અમે દુ:ખી થયા, એટલો સમય અમને આનંદ પમાડો.

¹⁶ અમને, તમારા આ ભક્તોને તમારા ઉદ્ધારનાં અદ્‍ભુત કાર્યો દેખાડો, અને અમારાં સંતાનોને તમારો પ્રતાપ બતાવો.

¹⁷ હે પ્રભુ, તમારી ભલાઈ અમારા પર ઊતરો! અમારા હાથનાં કાર્યો અમારે માટે સ્થાપન કરો; હા, અમારે માટે અમારા હાથનાં કાર્યો સ્થાપન કરો.