ગીતશાસ્ત્ર 86 - પવિત્ર બાઇબલ C.L.

સંકટમાં સહાય માટે પ્રાર્થના

(દાવિદની પ્રાર્થના)

¹ હે પ્રભુ, તમારા કાન ધરો અને મને ઉત્તર આપો. કારણ, હું પીડિત અને કંગાળ છું.

² મારા પ્રાણની રક્ષા કરો; કારણ, હું તમારો ભક્ત છું, તમારા પર ભરોસો રાખનાર તમારા સેવકને બચાવો; તમે મારા ઈશ્વર છો.

³ હે પ્રભુ, મારા પર દયા કરો; કારણ, હું તમને નિરંતર પોકારું છું.

⁴ હે પ્રભુ, તમારા સેવકને આનંદિત કરો; કારણ, હું મારું અંત:કરણ તમારા પર લગાડું છું.

⁵ હે પ્રભુ, તમે ભલા અને ક્ષમાશીલ છો; તમને અરજ કરનાર સર્વ પ્રત્યે તમે અસીમ પ્રેમ દર્શાવો છો.

⁶ હે પ્રભુ, મારી પ્રાર્થના પર કાન ધરો; સહાય માટેની મારી આજીજી પર લક્ષ દો.

⁷ મારા સંકટને સમયે હું તમને પોકારું છું; કારણ, તમે મને ઉત્તર આપો છો.

⁸ હે પ્રભુ, અન્ય દેવોમાં તમારા સરખા ઈશ્વર કોઈ નથી. તમારાં કાર્યો જેવાં કાર્યો પણ કોઈનાં નથી.

⁹ હે પ્રભુ, તમે સર્વ પ્રજાઓ સર્જી છે; તેઓ તમારી સમક્ષ આવીને પ્રણામ કરશે, અને તમારા નામનો મહિમા ગાશે.

¹⁰ તમે સાચે જ મહાન છો અને અજાયબ કાર્યો કરો છો; એકમાત્ર તમે જ ઈશ્વર છો.

¹¹ હે પ્રભુ, તમે મને તમારા માર્ગ વિષે શીખવો; જેથી હું સાચે માર્ગે ચાલું. તમારા નામની ભક્તિ કરવા મારા દયને એકાગ્ર કરો.

¹² હે પ્રભુ, હું મારા પૂરા દિલથી તમારી આભારસ્તુતિ કરીશ. મારા ઈશ્વર, હું સદાસર્વદા તમારા નામનો મહિમા ગાઈશ.

¹³ તમે મારા પર અપાર પ્રેમ રાખો છો; તેથી મારા પ્રાણને તમે મૃત્યુલોક શેઓલના ઊંડાણમાંથી ઉગારશો.

¹⁴ હે ઈશ્વર, અહંકારી લોકો મારા પર હુમલો કરે છે; ક્રૂર માણસોની ટોળી મારો જીવ લેવા મથે છે; તેઓ તમારી ઉપેક્ષા કરે છે.

¹⁵ પરંતુ હે પ્રભુ, તમે રહેમી અને દયાળુ છો; કોપ કરવામાં ધીમા તેમજ પ્રેમ અને વિશ્વાસુપણાથી ભરપૂર છો.

¹⁶ મારી તરફ ફરો અને મારા પર દયા કરો. તમારા સેવકને તમારું બળ આપો, અને તમારી સેવિકાના પુત્રને બચાવો.

¹⁷ હે પ્રભુ, મને તમારી ભલાઈનું ચિહ્ન દર્શાવો કે તમે મને સહાય કરી છે તથા સાંત્વન આપ્યું છે; એ જોઈને મારા દ્વેષીઓ લજ્જિત થાય છે.