ગીતશાસ્ત્ર 80 - પવિત્ર બાઇબલ C.L.

રાષ્ટ્રના પુન:સંસ્થાપન માટે પ્રાર્થના ઉદ્ધાર માટે યાચના

(સંગીત સંચાલક માટે સૂચના. રાગ: કમલફૂલનું વચન હિબ્રૂ: શોશાન્‍નીમ - એડ્થ; આસાફનું ગીત)

¹ હે ઇઝરાયલના પાલક, અમારું સાંભળો; યોસેફના કુળને ઘેટાંના ટોળાની પેઠે દોરનાર, કાન ધરો. હે પાંખાવાળાં પ્રાણી કરૂબ પર બિરાજનાર, તમારો પ્રકાશ પાડો.

² એફ્રાઈમ, બિન્યામીન તથા મનાશ્શાનાં કુળો સમક્ષ તમારું સામર્થ્ય પ્રગટ કરો; આવીને અમારો ઉદ્ધાર કરો.

³ હે ઈશ્વર, અમને તમારી તરફ પાછા ફેરવો, અને અમારા પર તમારા માયાળુ મુખનો પ્રકાશ પાડો, એટલે અમે બચી જઈશું.

લોકોની દશાનું વર્ણન

⁴ હે સેનાધિપતિ પ્રભુ, ક્યાં સુધી તમારો કોપ સળગતો રહેશે, અને તમે તમારી પ્રજાની પ્રાર્થનાની ઉપેક્ષા કરશો?

⁵ તમે અમને દુ:ખનો ખોરાક ખવડાવ્યો છે, પીવા માટે પણ અમારાં આંસુઓનો મોટો પ્યાલો ભરી આપ્યો છે.

⁶ તમે અમને પડોશી દેશો માટે કજિયાનું કારણ બનાવ્યા છે અને અમારા શત્રુઓ અમારી ઠેકડી ઉડાડે છે.

⁷ હે સેનાધિપતિ ઈશ્વર, અમને તમારી તરફ પાછા ફેરવો, અને અમારા પર તમારા માયાળુ મુખનો પ્રકાશ પાડો, એટલે અમે બચી જઈશું.

દ્રાક્ષવેલાના ઉદાહરણ દ્વારા દેશના ઇતિહાસ પર દષ્ટિપાત

⁸ તમે ઇજિપ્તમાંથી એક દ્રાક્ષવેલો કાઢી લાવ્યા, અને તમે બીજી પ્રજાઓને હાંકી કાઢીને તેમની ભૂમિમાં તેને રોપ્યો.

⁹ તમે તેને વિક્સવા માટે ભૂમિ તૈયાર કરી, તેનાં મૂળ ઊંડાં ઊતર્યાં અને તે સમગ્ર દેશ પર પથરાઈ ગયો.

¹⁰ તેની છાયાથી પર્વતો ઢંક્યા, અને વિશાળ ગંધતરુઓ તેની ડાળીઓથી આચ્છાદિત થયા.

¹¹ તેણે પોતાની ડાળીઓ ભૂમધ્ય સમુદ્ર સુધી, અને તેની કૂંપળો યુફ્રેટિસ નદી સુધી પ્રસારી.

¹² તો પછી તમે તેની આસપાસની વાડ કેમ તોડી નાખી છે કે, જેથી કોઈ પણ રાહદારી તેની દ્રાક્ષ ચૂંટી લે?

¹³ જંગલી ડુક્કર તેને ભેલાડે છે, અને વનપશુઓ તેને ચરી ખાય છે.

સહાય માટે યાચના

¹⁴ હે સેનાધિપતિ ઈશ્વર, કૃપા કરી પાછા આવો, આકાશમાંથી દષ્ટિ કરો, અને એ દ્રાક્ષવેલાની સંભાળ લો.

¹⁵ આવો, અને જે દ્રાક્ષાવેલાને તમારા જમણા હાથે રોપ્યો હતો અને જે નાના રોપને તમે મજબૂત બનાવ્યો હતો તેનું રક્ષણ કરો.

¹⁶ શત્રુઓએ તેને કાપી નાખીને કચરાની જેમ બાળ્યો છે. તેઓ તમારા મુખની ધમકીથી નષ્ટ થાઓ.

¹⁷ જેને તમે સત્તા અને સન્માન બક્ષ્યાં છે, તે રાજાનું રક્ષણ કરો; જેને તમે પસંદ કર્યો છે, તે માનવપુત્રને સંભાળો.

¹⁸ અમે ફરી કદી તમારાથી વિમુખ થઈશું નહિ, અમને નવજીવન આપો, એટલે અમે તમારે નામે પ્રાર્થના કરીશું.

¹⁹ હે સેનાધિપતિ ઈશ્વર પ્રભુ, અમને તમારી તરફ પાછા ફેરવો, અને અમારા પર તમારા માયાળુ મુખનો પ્રકાશ પાડો, એટલે અમે બચી જઈશું.