ગીતશાસ્ત્ર 77 - પવિત્ર બાઇબલ C.L.

દુ:ખમાં દિલાસો સહાય માટે પોકાર

(સંગીત સંચાલક માટે સૂચના: યદૂથૂન રાગ પ્રમાણે, આસાફનું ગીત)

¹ હું મદદ માટે ઈશ્વરને પોકારું છું; હું ઉદ્વેગમાં તેમને મોટેથી પોકારું છું કે તે મારું સાંભળે.

² સંકટને સમયે હું પ્રભુને શોધું છું; રાતભર થાકયા વગર હું પ્રાર્થનામાં મારા હાથ જોડી રાખું છું; મારા પ્રાણે પણ સાંત્વન સ્વીકારવાની ના પાડી.

³ ઈશ્વરનું સ્મરણ કરતાં કરતાં હું ઊંડા નિસાસા નાખું છું; મનોમંથન કરતાં મારો આત્મા બેહોશ બની જાય છે. (સેલાહ)

ભક્તની દશાનું વર્ણન

⁴ તમે મને મારી આંખો પણ મીંચવા દેતા નથી, વ્યાકુળતાને કારણે હું બોલી શક્તો નથી.

⁵ હું આગલા દિવસોનો વિચાર કરું છું, અને વીતેલાં વર્ષોનું પણ સ્મરણ કરું છું.

⁶ રાત્રે મને મારા ગાયેલા ગીતના શબ્દો સાંભરે છે. હું મનન કરું છું ત્યારે મારા આત્મામાં પ્રશ્ર્ન ઉદ્ભવે છે કે,

⁷ શું પ્રભુ સદાને માટે આપણને તજી દેશે? શું તે ફરી કદી પ્રસન્‍ન નહિ થાય?

⁸ શું તેમના પ્રેમનો અંત આવ્યો છે? શું તેમનું વચન સદાને માટે રદબાતલ થશે?

⁹ શું ઈશ્વર દયા દર્શાવવાનું વીસરી ગયા છે? કે ક્રોધને લીધે તેમણે અનુકંપા અટકાવી દીધી છે? (સેલાહ)

¹⁰ ત્યારે મેં કહ્યું, “મને એ વાતનું ભારે દુ:ખ છે કે સર્વોચ્ચ ઈશ્વરનો જમણો હાથ હવે અમને સાથ દઈ રહ્યો નથી.”

ઈશ્વરનાં મહાન કાર્યો

¹¹ હે યાહ, અમારા પ્રભુ, હું તમારાં મહાન કાર્યોનું સ્મરણ કરીશ; હું પુરાતન કાળના તમારા ચમત્કારો સંભારીશ.

¹² હું તમારાં સર્વ કામો વિષે ચિંતન કરીશ, અને તમારાં પરાક્રમી કૃત્યો પર મનન કરીશ.

¹³ હે ઈશ્વર, તમારો માર્ગ પવિત્ર છે! અમારા ઈશ્વર જેવા મોટા ઈશ્વર કોણ છે?

¹⁴ તમે તો ચમત્કારો કરનાર ઈશ્વર છો; તમે પ્રજાઓને તમારું સામર્થ્ય પ્રગટ કર્યું છે.

¹⁵ તમારા ભુજથી તમે તમારા લોકને, એટલે, યાકોબ અને યોસેફના વંશજોને મુક્ત કર્યા છે.(સેલાહ)

¹⁶ હે ઈશ્વર, પાણી તમને જોઈને સ્તબ્ધ થઈ ગયાં; ઊંડાણો પણ ધ્રૂજી ઊઠયાં.

¹⁷ વાદળોએ વરસાદ વરસાવ્યો; આકાશોએ ગર્જના કરી; ચારે દિશાઓમાં વીજળી ચમકી ઊઠી.

¹⁸ તમારી ગર્જનાનો કડાકો વાવંટોળમાં હતો; વીજળીના ઝબકારાઓએ પૃથ્વીને પ્રકાશિત કરી; પૃથ્વી કાંપી અને ડોલી ઊઠી.

¹⁹ તમે સમુદ્રમાં થઈને માર્ગ કર્યો; તમે મહાજળ પસાર કર્યું, પરંતુ તમારાં પગલાં જોઈ શક્યાં નહિ.

²⁰ ઘેટાંપાલક ટોળાને દોરે તેમ મોશે તથા આરોન દ્વારા તમે તમારા લોકને દોર્યા.