ગીતશાસ્ત્ર 73 - પવિત્ર બાઇબલ C.L.

ત્રીજો ખંડ ( 73—89 ગીતો) ઈશ્વરના ઇન્સાફનો વિજય ગીતર્ક્તાની દ્વિધા

(આસાફનું ગીત)

¹ ઇઝરાયલી લોકોમાં શુદ્ધ દયવાળા માટે ઈશ્વર સાચે જ ભલા છે.

² પરંતુ મેં તો મારે પગે લગભગ ઠોકર ખાધી; અને મારાં પગલાં લપસી પડવાની તૈયારીમાં હતાં.

³ કારણ, મેં દુષ્ટ લોકોની આબાદી નિહાળી અને તે ઘમંડી લોકો પર મને ઈર્ષા થઈ આવી.

દુષ્ટોનું વર્ણન

⁴ દુષ્ટોનું મૃત્યુ ફાંસીએ થતું નથી; એથી ઊલટું, તેમનાં શરીર પણ તંદુરસ્ત અને મજબૂત હોય છે.

⁵ અન્ય માણસોની જેમ તેમને મુશ્કેલીઓ નડતી નથી અને બીજા માણસોની જેમ તેમનાં પર દુ:ખો આવતાં નથી.

⁶ તેથી અહંકાર દુષ્ટોના ગળાનો હાર છે અને જુલમ તેમનો પોશાક છે.

⁷ તેમની આંખો ઘમંડથી ભરેલી હોય છે, અને દુષ્ટ વિચારોથી તેમનાં મન ઊભરાય છે.

⁸ દુષ્ટો બીજાઓને ધૂત્કારે છે અને તેમના વિષે ભૂંડી વાતો કરે છે. તેઓ અહંકારપૂર્વક જુલમ ગુજારવાની ધમકી આપે છે.

⁹ દુષ્ટો તેમનું મુખ આકાશના ઈશ્વર વિરુદ્ધ ઉઠાવે છે: તેમની જીભ પૃથ્વી પર ફરી વળે છે.

¹⁰ તેથી માણસો તેમની પાછળ પાછળ જાય છે, અને દુષ્ટોની વાતો આતુરતાથી માની લે છે.

¹¹ દુષ્ટો કહે છે, “ઈશ્વર કેવી રીતે જાણી શકે? અને શું સર્વોચ્ચ ઈશ્વર પાસે કંઈ જ્ઞાન છે?”

¹² અરે, દુષ્ટો તો આવા હોય છે; તેમને સદા નિરાંત હોય છે અને તેમનું ધન વયા જ કરે છે.

ગીતર્ક્તાનો સંદેહ

¹³ મારા દયને શુદ્ધ રાખવાનો કંઈ અર્થ ખરો? અને મેં મારા હાથ નિર્દોષ રાખ્યા તેથી શો લાભ થયો?

¹⁴ હે ઈશ્વર, હું તો આખો વખત પીડા ભોગવું છું, અને દર સવારે મને શિક્ષા કરવામાં આવે છે.

¹⁵ જો મેં આવી વાતો ઉચ્ચારી હોત, તો મેં ઈશ્વરના લોકનો દ્રોહ કર્યો હોત.

¹⁶ મેં આ સમસ્યા સમજવા ઊંડો વિચાર કર્યો, ત્યારે મને એ વાત અતિ કઠિન લાગી.

દુષ્ટોનો આખરી અંજામ

¹⁷ પરંતુ કેવળ ઈશ્વરના પવિત્ર સ્થાનમાં જવાથી જ મને દુષ્ટોના આખરી અંજામ વિષે સાચી સમજ પડી.

¹⁸ સાચે જ તમે દુષ્ટોને લપસણા સ્થાનોમાં મૂકો છો, અને તમે તેમને વિનાશના ગર્તમાં ગબડાવી દો છો

¹⁹ તેઓ ક્ષણમાં જ પાયમાલીનો ભોગ બને છે અને આતંકો દ્વારા ઘસડી જવાય છે.

²⁰ જાગતાંવેંત જેમ સ્વપ્નનો આભાસ ભૂલી જવાય છે, તેમ હે પ્રભુ, તમે જાગશો ત્યારે દુષ્ટોને તમારી સ્મૃતિમાંથી દૂર કરશો.

નેકજનોની સાર્વકાલિક સલામતી

²¹ જ્યારે મારું મન ખાટું થયું હતું અને મારા અંત:કરણમાં બળતરા થતી હતી,

²² ત્યારે હું તો મૂર્ખ અને અજ્ઞાન હતો, અને તમારા પ્રત્યે પશુ સમાન જડ હતો.

²³ છતાં હું નિરંતર તમારી નિકટ છું; તમે મારો જમણો હાથ પકડયો છે.

²⁴ તમારા બોધ દ્વારા તમે મને દોરશો; અને આખરે તમારા મહિમામાં મારો અંગીકાર કરશો.

²⁵ તમારા સિવાય સ્વર્ગમાં મારું કોણ છે? અને પૃથ્વી પર મને બીજા કોઈની ઝંખના નથી.

²⁶ મારું શરીર અને મારું મન નબળાં થતાં જશે, પરંતુ ઈશ્વર મારા દયના સમર્થ સંરક્ષક છે, અને તે જ મારો સાર્વકાલિક વારસો છે.

²⁷ તમારાથી દૂર થનારા નિ:સંદેહ નાશ પામશે; તમારા પ્રત્યે બેવફા થનારાઓને તમે સમૂળગા નષ્ટ કરશો.

²⁸ પરંતુ ઈશ્વરની સમીપ રહેવામાં જ મારું કલ્યાણ છે; હે પ્રભુ પરમેશ્વર, હું તો તમારે શરણે આવ્યો છું, જેથી હું તમારાં સર્વ અજાયબ કાર્યો પ્રગટ કરું.