ગીતશાસ્ત્ર 67 - પવિત્ર બાઇબલ C.L.

ઈશ્વરની આભારસ્તુતિ

(સંગીત સંચાલક માટે સૂચના: તંતુવાદ્યોની સંગતમાં ગાવાનું ગીત, ગાયન)

¹ હે ઈશ્વર, અમારા પર કૃપા કરીને અમને આશીર્વાદ આપો, તમારા માયાળુ મુખનો પ્રકાશ અમારા પર પાડો;(સેલાહ)

² જેથી સર્વ પૃથ્વીવાસીઓ તમારો માર્ગ જાણે અને બધી પ્રજાઓ સમક્ષ તમારો ઉદ્ધાર પ્રગટ થાય.

³ હે ઈશ્વર, લોકો તમારી આભારસ્તુતિ કરે; બધી પ્રજાઓ તમને ધન્યવાદ આપે.

⁴ પ્રજાઓ આનંદિત થઈ જયજયકાર કરે; કારણ, તમે પ્રજાઓનો અદલ ઇન્સાફ કરો છો, અને પૃથ્વી પરની દરેક પ્રજાને માર્ગદર્શન આપો છો. (સેલાહ)

⁵ હે ઈશ્વર, લોકો તમારી આભારસ્તુતિ કરે, બધી પ્રજાઓ તમને ધન્યવાદ આપે.

⁶ ભૂમિએ પોતાની ઊપજ આપી છે. ઈશ્વરે, અમારા ઈશ્વરે અમને આશીર્વાદ આપ્યો છે.

⁷ ઈશ્વર અમને આશીર્વાદ આપો અને પૃથ્વીની સર્વ સીમાઓ સુધીના લોકો ઈશ્વરનો આદરયુક્ત ભય રાખો.