ગીતશાસ્ત્ર 60 - પવિત્ર બાઇબલ C.L.

રાષ્ટ્રના ઉદ્ધાર માટે પ્રાર્થના

(સંગીત સંચાલક માટે સૂચના: રાગ: કમળફૂલનું વચન ચ-હિબ્રૂ: શૂશાન - એડ્થૃ-; શિક્ષણ માટે દાવિદનું મિખ્તામ, નાહરાઈમ અને ઝોબાના અરામીઓ સાથે તેણે યુદ્ધ કર્યું અને યોઆબે પાછા વળતાં ક્ષારના ખીણપ્રદેશમાં બાર હજાર અદોમીઓને માર્યા તે સમયનું ગીત)

¹ હે ઈશ્વર, તમે અમારો ત્યાગ કર્યો છે, અને તમે અમને છિન્‍નભિન્‍ન કરી નાખ્યા છે. તમે અમારા પર કોપાયમાન થયા છો, અને અમારાથી વિમુખ થયા છો.

² તમે દેશની ભૂમિને કંપાવી છે, અને તેને ચીરી નાખી છે. તેની તિરાડોને સમારો; કારણ, ભેખડો તૂટી પડવાની અણી પર છે.

³ તમે અમને, તમારા લોકને ભારે દુ:ખના દિવસો બતાવ્યા છે; તમે અમને લથડિયાં ખવડાવનારો દ્રાક્ષાસવ પાયો છે.

⁴ તમે તમારા ભક્તોને ભયસૂચક વજા દર્શાવી છે. જેથી તેઓ ધનુર્ધારીઓનાં બાણથી નાસી છૂટે. (સેલાહ)

⁵ અમને પ્રત્યુત્તર આપો; અને તમારા જમણા હાથથી અમને વિજય પમાડો. જેથી અમે, તમારાં પ્રિયજનો ઊગરી જઈએ.

⁶ ઈશ્વરે પોતાના પવિત્રસ્થાનમાંથી આ વચન આપ્યું છે: “હું વિજયના આનંદ સાથે શખેમના પ્રદેશના ભાગ પાડીશ, અને સુક્કોથનો ખીણપ્રદેશ મારા લોકોમાં વહેંચી આપીશ.”

⁷ ગિલ્યાદનો પ્રદેશ મારો છે અને મનાશ્શાનો પ્રદેશ પણ મારો છે. એફ્રાઈમનો પ્રદેશ મારો શિરતાજ છે, અને યહૂદિયાનો પ્રદેશ મારો રાજદંડ છે.

⁸ મોઆબનો પ્રદેશ મારા હાથપગ ધોવાના પાત્ર સમાન બનશે. માલિકીની નિશાની તરીકે હું અદોમ પર મારું પગરખું નાખીશ પલિસ્તી પ્રદેશ પર હું જયઘોષ કરીશ.

⁹ હે ઈશ્વર, મને કિલ્લેબંધ નગરમાં કોણ લઈ જશે? અદોમ સુધી મને કોણ પહોંચાડશે?

¹⁰ હે ઈશ્વર, શું તમે સાચે જ અમારો ત્યાગ કર્યો છે? શું તમે અમારાં સૈન્યો સાથે કૂચ કરવાના નથી?

¹¹ શત્રુઓ વિરુદ્ધ અમને સહાય કરો. કારણ, માનવી સહાય વ્યર્થ છે.

¹² ઈશ્વર અમારે પક્ષે હોવાથી અમે વીરતાથી લડીશું; તે જ અમારા વૈરીઓને છૂંદી નાખશે.