ગીતશાસ્ત્ર 59 - પવિત્ર બાઇબલ C.L.

રક્ષણ માટે પ્રાર્થના

(સંગીત સંચાલક પ્રતિ: રાગ, અલ તારખેથ; (વિનાશ કરશો નહિ) દાવિદનું મિખ્તામ; જ્યારે શાઉલ રાજાએ મોકલેલા માણસોએ તેની હત્યા કરવા ઘરની તપાસ રાખી તે સમયનું ગીત)

¹ હે મારા ઈશ્વર, મારા શત્રુઓથી મને બચાવો. મારા પર હુમલો કરનારાઓથી મારું રક્ષણ કરો.

² અન્યાય આચરનારાઓથી મને બચાવો અને ખૂનીઓથી મને ઉગારો.

³ તેઓ મારી હત્યા કરવા છુપાઈને બેઠા છે. ઘાતકી લોકો મારી વિરુદ્ધ એકત્ર થાય છે. હે પ્રભુ, મારા કોઈ અપરાધ કે મારા કોઈ પાપને લીધે તેઓ એમ કરે છે એવું નથી;

⁴ મારો કોઈ દોષ હોવા ન છતાં તેઓ મારી સામે દોડીને લડવા તૈયાર થાય છે. હે પ્રભુ, ઊઠો, મારી મદદે આવો અને જુઓ.

⁵ હે સેનાધિપતિ પ્રભુ, તમે તો ઇઝરાયલના ઈશ્વર છો. જાગો અને સર્વ વિધર્મી રાષ્ટ્રોને સજા કરો; ભૂંડાઈ આચરનાર કોઈ પણ દેશદ્રોહી પ્રત્યે દયા દર્શાવશો નહિ.(સેલાહ)

⁶ સંયાકાળે તેઓ પાછા ફરે છે; અને કૂતરાની જેમ ધૂરક્તાં નગરમાં ભટકે છે.

⁷ જુઓ તો ખરા કે તેઓ કેવું થૂંક ઉડાડે છે! તેમની વાણી તાતી તલવાર જેવી છે; છતાં તેઓ ધારે છે કે તેમનું બોલવું સાંભળનાર કોઈ નથી.

⁸ પરંતુ હે પ્રભુ, તમે તેમને હસી કાઢશો; તમે સર્વ વિધર્મી પ્રજાઓનો ઉપહાસ કરશો.

⁹ હે મારા સામર્થ્ય, હું તમારી વાટ જોઉં છું; હે ઈશ્વર, તમે જ મારા સંરક્ષક ગઢ છો.

¹⁰ મારા ઈશ્વર પોતાના પ્રેમથી મારી વહારે આવશે; મારા શત્રુઓ પર વિજય પ્રાપ્ત કરવાની મારી આકાંક્ષાને તે પૂરી કરશે.

¹¹ હે ઈશ્વર, તેમનો સંહાર કરો, નહિ તો મારા લોક નાસીપાસ થશે. હે પ્રભુ, અમારી સંરક્ષક ઢાલ, તમારા સામર્થ્ય દ્વારા તેમને હચમચાવી નાખીને નીચે પાડો.

¹² તેમના હોઠો પર પાપ છે. તેમના શબ્દોમાં પાપ છે. તેઓ શાપ દે છે અને જૂઠ બોલે છે. તેથી તેમને પોતાના જ અહંકારમાં ફસાઈ પડવા દો.

¹³ તમારા કોપમાં તેમને ભસ્મીભૂત કરો; એકય ન બચે તેમ તેમનો પૂરો વિનાશ કરો; જેથી બધા લોકોને ખાતરી થાય કે ઈશ્વર યાકોબના દેશમાં અને પૃથ્વીની સર્વ સીમાઓ સુધી રાજ કરે છે. (સેલાહ)

¹⁴ મારા શત્રુઓ સંયાકાળે પાછા ફરે છે અને કૂતરાની જેમ ધૂરક્તાં નગરમાં ભટકે છે.

¹⁵ ખોરાકની શોધમાં આમતેમ ભટક્તા અને તૃપ્ત ન થાય તો ધૂરકિયાં કરતાં કૂતરાની જેમ તેઓ રખડે છે.

¹⁶ પરંતુ હું તો તમારા સામર્થ્યનાં ગીતો ગાઈશ. સવારે હું તમારા અવિચળ પ્રેમનો જયજયકાર કરીશ. કારણ, તમે મારા ઊંચા સંરક્ષક ગઢ બન્યા છો, સંકટ સમયે તમે મારું આશ્રયસ્થાન છો.

¹⁷ હે મારા સામર્થ્ય, હું તમારાં સ્તુતિગાન ગાઈશ. હે ઈશ્વર, તમે જ મારા ઊંચા સંરક્ષક ગઢ છો, અને મારા પર પ્રેમ દર્શાવનાર ઈશ્વર છો.