ગીતશાસ્ત્ર 57 - પવિત્ર બાઇબલ C.L.

ભયાનક શત્રુઓથી બચવા માટે પ્રાર્થના

(સંગીત સંચાલક માટે સૂચના: રાગ: હિબ્રૂ: અલ તારખેથ - (‘વિનાશ કરશો નહિ’,) દાવિદનું મિખ્તામ. તે શાઉલ રાજા પાસેથી નાસી જઈને ગુફામાં સંતાઈ રહેતો તે સમયનું ગીત.)

¹ હે ઈશ્વર, મારા પર દયા કરો, મારા પર દયા કરો, કારણ, મારો આત્મા તમારે શરણે આવ્યો છે; આ વિનાશક આંધી પસાર ન થઈ જાય, ત્યાં સુધી હું તમારી પાંખોની છાયામાં શરણ લઈશ.

² હું સર્વોચ્ચ ઈશ્વરને પોકારું છું; પોતાના ઇરાદા મારામાં પૂર્ણ કરનાર ઈશ્વરને વિનંતી કરું છું.

³ ઈશ્વર આકાશમાંથી સહાય મોકલીને મને બચાવશે. જુલમ કરનારાઓને તે પરાજયથી લજ્જિત કરશે. (સેલાહ) ઈશ્વર પોતાનાં પ્રેમ અને વિશ્વાસુપણું દાખવશે.

⁴ હું તો શત્રુઓથી ઘેરાઈ ગયો છું; તેઓ તો ક્ષુધાતુર માનવભક્ષી સિંહો જેવા છે. તેમના દાંત ભાલા જેવા ભયાનક છે અને તેમની જીભ તીક્ષ્ણ તલવાર જેવી ક્તિલ છે.

⁵ હે ઈશ્વર, તમારી મહત્તા આકાશ કરતાં ઉન્‍નત મનાઓ, અને સમસ્ત સૃષ્ટિમાં તમારું ગૌરવ વ્યાપી રહો.

⁶ મારા શત્રુઓએ મારા પગ ફસાવવા માટે જાળ બિછાવી છે, અને હું પડી ગયો છું. તેમણે મારા માર્ગમાં ખાડો ખોદ્યો, પરંતુ તેઓ પોતે જ તેમાં ગબડી પડયા છે. (સેલાહ)

⁷ હે ઈશ્વર, મારું હૃદય દઢ છે, મારું હૃદય દઢ છે, હું ગીતો ગાઈશ અને વાંજિત્રો પણ વગાડીશ.

⁸ હે મારા પ્રાણ, જાગ! મારી વીણા અને તાનપૂરા તમે પણ જાગો! હું જાતે પ્રભાતને જગાડીશ!

⁹ હે પ્રભુ, વિવિધ રાષ્ટ્રોના લોકોની વચમાં હું તમારી આભારસ્તુતિ કરીશ. હું સર્વ પ્રજાઓની વચમાં તમારાં ગુણગાન ગાઈશ.

¹⁰ તમારો પ્રેમ આકાશોથી પણ ઊંચે પ્રસરેલો છે, અને તમારું વિશ્વાસુપણું વાદળોને પણ આંબે છે.

¹¹ હે ઈશ્વર, તમારી મહત્તા આકાશ કરતાં ઉન્‍નત મનાઓ અને સમસ્ત સૃષ્ટિમાં તમારું ગૌરવ વ્યાપી રહો.