ગીતશાસ્ત્ર 54 - પવિત્ર બાઇબલ C.L.

શત્રુઓથી રક્ષણ માટે પ્રાર્થના

(સંગીત સંચાલક પ્રતિ: તંતુવાદ્યોની સાથે ગાવાને દાવિદનું માસ્કીલ. જ્યારે ઝીફ નગરના માણસોએ શાઉલ પાસે જઈને કહ્યું, “દાવિદ અમારે ત્યાં સંતાયો છે” તે સમયનું ગીત)

¹ હે ઈશ્વર, તમારી નામનાને લીધે મને બચાવો; તમારા સમર્થન વડે મને ન્યાય અપાવો.

² હે ઈશ્વર, મારી પ્રાર્થના સાંભળો, અને મારા મુખના શબ્દો પ્રત્યે કાન ધરો.

³ અહંકારીઓ મારા પર હુમલો કરે છે, ક્રૂર માણસો મારો જીવ લેવા મથે છે, તેમને ઈશ્વરની કશી દરકાર નથી. (સેલાહ)

⁴ ઈશ્વર મારા સહાયક છે, પ્રભુ જ મારા જીવનનો આધાર છે.

⁵ તે મારા વૈરીઓને તેમની ભૂંડાઈ માટે શિક્ષા કરશે; હે પ્રભુ, તમારી સચ્ચાઈ વડે તેમનો વિનાશ કરો.

⁶ હું તમને આનંદપૂર્વક બલિદાનો ચડાવીશ; હે પ્રભુ, હું તમારા નામની આભારસ્તુતિ કરીશ, કારણ, તમે ભલા છો.

⁷ તમે મને મારા સર્વ સંકટમાંથી ઉગાર્યો છે; મેં નજરોનજર મારા શત્રુઓનો પરાજય નિહાળ્યો છે.