ગીતશાસ્ત્ર 48 - પવિત્ર બાઇબલ C.L.

ઈશ્વરના નગર સિયોનની સુંદરતા અને સુરક્ષિતતા

(કોરાના પુત્રોનું ગીત)

¹ પ્રભુ મહાન છે અને તે અત્યંત સ્તુતિપાત્ર છે. તેમનો પવિત્ર સિયોન પર્વત આપણા ઈશ્વરના નગરમાં છે.

² તે અત્યંત રમણીય અને ઉન્‍નત છે, અને સમસ્ત પૃથ્વી માટે આનંદકારક છે. સિયોન પર્વત સાફોન પર્વત સમો ઊંચો અને કેન્દ્રસ્થાને છે; તે રાજાધિરાજનું નગર છે.

³ એ નગરને કિલ્લાઓ છે; પણ ઈશ્વરે એ બધામાં પોતાને અજેય શરણગઢ તરીકે પ્રગટ કર્યા છે.

⁴ રાજાઓ સૈન્યો સાથે એકત્ર થયા, તેઓ એક્સાથે સિયોન પર્વત પર આક્રમણ કરવા ચઢી આવ્યા.

⁵ પરંતુ સિયોનને જોઈને તેઓ આશ્ર્વર્યમાં ડૂબી ગયા, અને ભયભીત બની ઉતાવળે ભાગી ગયા.

⁶ તેઓ ભયથી ધ્રૂજી ઊઠયા; અને પ્રસૂતાની વેદના જેવી પીડામાં ઝડપાયા.

⁷ ઉત્તરના વાવાઝોડાથી તાર્શીશનાં વહાણોના ચૂરેચૂરા થતા હોય તેવી તેમની દશા થઈ.

⁸ અમે જેમ ઈશ્વરનાં મહાન કાર્યો વિષે સાંભળ્યું હતું, તે જ પ્રમાણે સેનાધિપતિ પ્રભુના નગરમાં, હા, ઈશ્વરના નગરમાં, અમે અમારી સગી આંખે થતું નિહાળ્યું છે! ઈશ્વર તે નગરને સદાસર્વદા ટકાવી રાખશે. (સેલાહ)

⁹ હે ઈશ્વર, તમારા મંદિરમાં તમારા પ્રેમ વિશે અમે વિચાર કર્યો છે.

¹⁰ હે ઈશ્વર, તમારા નામની જેમ જ તમારી સ્તુતિ પણ પૃથ્વીના છેડાઓ સુધી પ્રસરેલી છે; તમારો જમણો હાથ ઉદ્ધારક શક્તિથી ભરેલો છે.

¹¹ તમારાં ઉદ્ધારક કાર્યોને લીધે સિયોનના લોકો આનંદ માણો, અને યહૂદિયાના કુળપ્રદેશનાં નગરો હર્ષ પામો.

¹² હે ઈશ્વરના ભક્તો, સિયોનની પરિક્રમા કરતાં તેની આસપાસ ફરો, અને તેના મિનારાઓની ગણતરી કરો.

¹³ તેના સંરક્ષક કોટોને ખૂબ યાનપૂર્વક નિહાળો, અને તેના દુર્ગોને બરાબર ચક્સો. જેથી તમે આગામી પેઢીને કહી શકો કે,

¹⁴ “આ ઈશ્વર જ સદાને માટે આપણા ઈશ્વર છે; તે આપણને જીવનપર્યંત દોરશે.”