ગીતશાસ્ત્ર 38 - પવિત્ર બાઇબલ C.L.

સહાય માટે પ્રાર્થના

(સંસ્મરણને અર્થે: દાવિદનું ગીત)

¹ હે પ્રભુ, તમારા કોપમાં મને ઠપકો ન દો, અને તમારા રોષમાં મને શિક્ષા ન કરો.

² તમારાં બાણો મને વાગ્યાં છે; તમારા ભુજે મને ભીંસી નાખ્યો છે.

³ તમારા પ્રકોપને લીધે મારા શરીરમાં તંદુરસ્તી નથી; મારા પાપને કારણે મારાં હાડકાંમાં પણ ચેન નથી.

⁴ મારાં પાપનો ગંજ મારા શિર પર ખડક્યો છે; તેમનો ભારે બોજ મારે માટે અસહ્ય છે.

⁵ મારાં પાપની મૂર્ખાઈને કારણે મારાં ઘારાં સડીને દુર્ગંધ મારે છે.

⁶ હું અત્યંત વાંકો વળી ગયો છું અને લથડી ગયો છું. હું આખો દિવસ શોકમગ્ન રહું છું.

⁷ હું તાવથી ધખધખું છું. મારા હાડમાંસમાં કંઈ આરોગ્ય નથી.

⁸ હું નિર્ગત થઈ ગયો છું અને અત્યંત કચડાઈ ગયો છું. મારા હૃદયમાં ખળભળાટ મચી ગયો છે અને હું વેદનાને લીધે કણસું છું.

⁹ હે પ્રભુ, તમે મારી આકાંક્ષા જાણો છો; અને મારા નિ:સાસા તમારાથી છુપા નથી.

¹⁰ મારા દયના ધબકારા વધી ગયા છે, મારું બળ ઓસરી ગયું છે; મારી આંખોનું તેજ ઝાંખું પડયું છે.

¹¹ મારા સ્નેહીઓ અને મિત્રો મારા રોગને લીધે મારી પાસે આવતા નથી; મારાં કુટુંબીજનો પણ મારાથી વેગળાં રહે છે.

¹² મારો જીવ લેવા ઇચ્છનારાઓ મારે માટે જાળ બિછાવે છે; મને હાનિ પહોંચાડવા મથનારા મને મારી નાખવાની ધમકી આપે છે, તેઓ આખો દિવસ કપટી યોજનાઓ ઘડયા કરે છે.

¹³ પરંતુ જાણે બહેરો હોઉં તેમ હું કશું સાંભળતો નથી, અને જાણે મૂંગો હોઉં તેમ હું કશું બોલતો પણ નથી.

¹⁴ હું તો સાંભળી નહિ શકવાને લીધે પોતાના બચાવમાં દલીલ કરી ન શકે તેવા માણસ જેવો બની ગયો છું.

¹⁵ પરંતુ હે પ્રભુ, હું તમારી પ્રતીક્ષા કરું છું; હે પ્રભુ, મારા ઈશ્વર, માત્ર તમે જ મને ઉત્તર આપશો.

¹⁶ તેથી મેં કહ્યું હતું કે, “મારા શત્રુઓને મારા દુ:ખ પર હરખાવા ન દો; મારા પતનના સમયમાં તેમને શેખી મારવા ન દો.”

¹⁷ હું ઢળી પડવાની અણી પર છું; મારી વેદના નિરંતર મારી સાથે છે.

¹⁸ હું મારો દોષ કબૂલ કરું છું; મારાં પાપોને લીધે હું વ્યથિત છું.

¹⁹ મારા શત્રુઓ સ્ફૂર્તિલા અને બળવાન છે; વિનાકારણ મારો દ્વેષ કરનારા પણ ઘણા છે.

²⁰ તેઓ તો ભલાઈનો બદલો ભૂંડાઈથી વાળી આપનારા છે; હું તેમનું ભલું કરું છું, ત્યારે તેઓ મારી નિંદા કરે છે.

²¹ હે પ્રભુ, મારો ત્યાગ કરશો નહિ; મારા ઈશ્વર, મારાથી દૂર થશો નહિ.

²² હે પ્રભુ, મારા ઉદ્ધારર્ક્તા મને સત્વરે સહાય કરો.