ગીતશાસ્ત્ર 35 - પવિત્ર બાઇબલ C.L.

શત્રુઓથી બચાવ માટે પ્રાર્થના પ્રથમ વિભાગ

(દાવિદનું ગીત)

¹ હે પ્રભુ, મારી સાથે વિવાદ કરનારાઓની સાથે તમે વિવાદ કરો. મારી સાથે લડનારાઓની સામે તમે લડો.

² ઊઠો! ઢાલ અને બખ્તર સજીને મારી વહારે આવો.

³ મારો પીછો કરનારાઓનો સામનો કરવા તમારાં ભાલો અને ફરસી ઉપાડો! મને હૈયાધારણ આપો કે તમે જ મારા ઉદ્ધારક છો.

⁴ જેઓ મારો જીવ લેવા યત્ન કરે છે તેમને તમે લજ્જિત અને અપમાનિત કરો. જેઓ મારું ભૂડું કરવાની પેરવી કરે છે, તેમને તમે ગૂંચમાં નાખીને નસાડી મૂકો.

⁵ તેઓ પવનમાં ઊડી જતા તણખલા જેવા થાઓ, અને પ્રભુનો દૂત તેમને હાંકી કાઢો.

⁶ તેમનો માર્ગ અંધકારમય તથા લપસણો થાઓ, અને પ્રભુનો દૂત તેમનો પીછો પકડો.

⁷ વિનાકારણ તેમણે મારે માટે જાળ પાથરી છે, અને વિનાકારણ મારો જીવ લેવા ખાડો ખોદ્યો છે.

⁸ તેમના પર ઓચિંતો વિનાશ આવી પડો, અને તેમણે સંતાડેલી જાળમાં તેઓ જાતે જ સપડાઈ જાઓ; તેમાં પડીને તેમની પાયમાલી થાઓ!

⁹ ત્યારે મારો જીવ પ્રભુને લીધે આનંદથી ગાશે, અને તેમણે કરેલા ઉદ્ધારને લીધે હરખાશે.

¹⁰ હું મારા પૂરા અંત:કરણથી કહીશ કે, “હે પ્રભુ, તમારા સમાન કોણ છે?” તમે નિર્બળને બળવાનના સકંજામાંથી ઉગારો છો, અને પીડિત તથા કંગાલને તેમને લૂંટનારાના હાથમાંથી છોડાવો છો.

બીજો ભાગ

¹¹ દુષ્ટો મારી વિરુદ્ધ જુબાની આપે છે; મને જાણ નથી એવા ગુનાઓ વિષે તેઓ મારી ઊલટતપાસ કરે છે.

¹² તેઓ મારી ભલાઈનો બદલો ભૂંડાઈથી વાળે છે અને મારો જીવ હતાશામાં ડૂબી ગયો છે.

¹³ પરંતુ તેઓ માંદા પડતા ત્યારે હું શોકમાં કંતાન ઓઢતો, ઉપવાસથી મારા જીવને કષ્ટ આપતો, અને માથું ખોળામાં ઢાળીને પ્રાર્થના કર્યા કરતો.

¹⁴ મારો કોઈ મિત્ર કે સગો ભાઈ બીમાર હોય તેમ હું ખિન્‍ન થતો; પોતાની મા માટે વિલાપ કરનારની જેમ હું ભૂમિ પર મસ્તક ટેકવીને શોક કર્યા કરતો.

¹⁵ પરંતુ હું લથડી પડયો ત્યારે તેમણે ટોળે મળીને કિલકારીઓ કરી, તેઓ મારી આસપાસ ઠેકડી કરવા એકત્ર થયા; મારાથી અજાણ્યા લોકોએ મારા પર પ્રહાર કર્યા અને મને મારીમારીને મારી ચામડી ઊતરડી નાખી.

¹⁶ ઈશ્વરનિંદકોની જેમ મારી ઠેકડી ઉડાડનારા મને ઘેરી વળ્યા છે અને ગુસ્સામાં પોતાના દાંત મારી સામે પીસે છે.

¹⁷ હે પ્રભુ, તમે ક્યાં સુધી આ બધું જોયા કરશો? તેમના હિંસક હુમલાથી મારા પ્રાણને અને સિંહોથી મારા જીવને બચાવો.

¹⁸ પછી મોટી સભામાં હું તમારો આભાર માનીશ અને વિશાળ જનસમુદાયમાં હું તમારી સ્તુતિ કરીશ.

ત્રીજો વિભાગ

¹⁹ મારા કપટી શત્રુઓને મારા ઉપર આનંદ કરવા ન દો, એને વિનાકારણે મારો દ્વેષ કરનારા તેમની આંખના મિચકારા ન મારે.

²⁰ તેમના બોલવામાં જરાય શુભેચ્છા નથી. અને બદલે, શાંતિપ્રિય જનોની વિરુદ્ધ તેઓ પ્રપંચ રચે છે.

²¹ તેઓ મારી વિરુદ્ધ ઘાંટા પાડી પાડીને બોલે છે; તેઓ કહે છે, “આહા, આહા, તારું અધમ કામ અમે નજરોનજર જોયું છે.”

²² હે પ્રભુ, તમે આ જુઓ છો; તમે મૌન રહેશો નહિ. હે પ્રભુ, મારાથી દૂર થશો નહિ.

²³ મને ન્યાય અપાવવા જાગ્રત થાઓ. હે મારા ઈશ્વર અને મારા સ્વામી, મારા દાવાનો ઉકેલ લાવો.

²⁴ હે પ્રભુ, તમારી ન્યાયપ્રિયતાથી મારું સમર્થન કરો; હે મારા ઈશ્વર, મારા શત્રુઓને મારા પર આનંદ કરવા ન દો.

²⁵ તેઓ પોતાના મનમાં એમ ન કહે કે, “આહા, અમારી ઇચ્છા ફળી છે,” અને તેઓ એમ ન કહે કે, “અમે તેને ગળી ગયા છીએ.”

²⁶ મારા સંકટમાં આનંદ કરનારાઓને તમે લજ્જિત કરો અને મૂંઝવી દો, મારા પર રૂઆબ કરનારાઓને તમે શરમિંદા અને અપમાનિત કરો.

²⁷ પરંતુ મારા ઉદ્ધારના શુભેચ્છકો આનંદથી જયજયકાર કરો, અને તેઓ સદા કહો કે, “પોતાના ભક્તના કલ્યાણમાં રાચનાર પ્રભુ મહાન મનાઓ.”

²⁸ ત્યારે મારી જીભ તમારી ન્યાયપરાયણતા પ્રગટ કરશે અને આખો દિવસ તમારાં સ્તોત્ર ગાશે.