ગીતશાસ્ત્ર 26 - પવિત્ર બાઇબલ C.L.

સદાચારીની પ્રાર્થના

(દાવિદનું ગીત)

¹ હે પ્રભુ, તમારા ન્યાયચુકાદાથી મારું સમર્થન કરો; કારણ, હું નિખાલસપણે વર્ત્યો છું. મેં તમારા પર ભરોસો રાખ્યો છે અને હું ડગી ગયો નથી.

² હે પ્રભુ, મારી પારખ કરો અને મને ક્સી જુઓ;

³ કેમ કે હું તમારો પ્રેમ મારી નજરે નિહાળું છું, અને હું તમારા સત્ય માર્ગે ચાલું છું.

⁴ હું જૂઠા માણસોની સાથે બેઠો નથી. અને દંભીઓની સોબતમાં ભળ્યો નથી.

⁵ હું દુર્જનોની સંગત ધિક્કારું છું, અને દુષ્ટો સાથે વાસ કરતો નથી.

⁶ મારી નિર્દોષતા જાહેર કરવા હું મારા હાથ ધોઈ નાખીશ; હે પ્રભુ, જનસમુદાય સાથે તમારી વેદીની પ્રદક્ષિણા કરીશ.

⁷ હું મોટે સાદે તમારા ધન્યવાદનાં ગીતો ગાઈશ, અને તમારાં સર્વ અદ્‍ભુત કાર્યો પ્રગટ કરીશ.

⁸ હે પ્રભુ, હું તમારા ભવ્ય મંદિરને ચાહું છું; જે ધામમાં તમારું ગૌરવ વસે છે તે મને પ્રિય છે.

⁹ પાપીઓ સાથે મારા પ્રાણનો અને ઘાતકી લોકો સાથે મારા જીવનો નાશ કરી દેતા નહિ.

¹⁰ તેમના ડાબા હાથ દુરાચારથી ખરડાયેલા છે, અને તેમના જમણા હાથ લાંચથી ભરેલા છે.

¹¹ પરંતુ મારું વર્તન દોષરહિત રહેશે; મારા પર દયા દર્શાવીને મને છોડાવી લો.

¹² મારા પગ સમતલ ભૂમિ પર ઊભા છે; હું ભક્તોની મોટી સભામાં પ્રભુની સ્તુતિ કરીશ.