ગીતશાસ્ત્ર 20 - પવિત્ર બાઇબલ C.L.

રાજાના વિજય માટે પ્રાર્થના રાજા માટે લોકોની શુભેચ્છા

(સંગીત સંચાલક માટે સૂચના: દાવિદનું ગીત)

¹ સંકટને સમયે પ્રભુ તમને ઉત્તર આપો; યાકોબના ઈશ્વરનું નામ તમારી રક્ષા કરો.

² તે પોતાના પવિત્ર સ્થાનમાંથી તમને સહાય કરો; સિયોન પર્વત પરથી તમને શક્તિ આપો.

³ તે તમારાં સર્વ અર્પણોનું સ્મરણ કરો, વિશેષત: તમારા દહનબલિથી સંતુષ્ટ થાઓ. (સેલાહ)

⁴ તે તમારી મનોકામના પૂર્ણ કરો અને તમારી સર્વ યોજનાઓને સફળ બનાવો.

⁵ પછી તો અમે તમારા વિજયને લીધે જય જયકાર કરીશું અને અમે આપણા ઈશ્વરને નામે વિજયપતાકાઓ ફરકાવીશું. પ્રભુ તમારી સર્વ અરજો પરિપૂર્ણ કરો.

રાજાનો પ્રતિભાવ

⁶ હવે મને ખાતરી છે કે, પોતે અભિષિક્ત કરેલ રાજાને પ્રભુ વિજય આપે છે, તે તેમના પવિત્ર સ્વર્ગમાંથી રાજાને ઉત્તર આપે છે, અને પોતાના જમણા હાથની શક્તિથી વિજય પમાડે છે.

⁷ કોઈ રથોનો અને કોઈ ઘોડાઓનો અહંકાર રાખે છે, પરંતુ આપણે તો આપણા ઈશ્વર યાહવેના નામનું સહાય માટે સ્મરણ કરીશું.

⁸ તેઓ તો ઠોકર ખાઈને પતન પામશે, પરંતુ આપણે તો ઊઠીને ઊભા થઈશું.

લોકોનો પ્રતિભાવ

⁹ હે પ્રભુ, રાજાને વિજય પ્રદાન કરો; અમે પોકારીએ ત્યારે ઉત્તર દો.