ગીતશાસ્ત્ર 147 - પવિત્ર બાઇબલ C.L.

સર્વશક્તિમાન પ્રભુની સ્તુતિ

(ઇઝરાયલના ઇતિહાસમાં અને સૃષ્ટિમાં પ્રભુનું સામર્થ્ય)

¹ યાહની સ્તુતિ કરો: હાલ્લેલૂયાહ! આપણા ઈશ્વરનાં સ્તવન ગાવાં તે કેવું ઉત્તમ છે! તેમની સ્તુતિ ગાવી તે કેવું આનંદદાયક અને ઉચિત છે!

² પ્રભુ યરુશાલેમને ફરી બાંધે છે; તે વિખેરાઈ ગયેલા ઇઝરાયલીઓને પાછા એકત્ર કરે છે.

³ તે દયભંગિતોને સાજા કરે છે; તે તેમના ઘા રૂઝવે છે.

⁴ તેમણે પ્રત્યેક નક્ષત્રમાં તારાની સંખ્યા નિશ્ર્વિત કરી છે; તે દરેક નક્ષત્રને તેના નામથી બોલાવે છે.

⁵ આપણા પ્રભુ મહાન અને અત્યંત સામર્થ્યવાન છે; તેમનું જ્ઞાન અસીમ છે.

⁶ તે જુલમપીડિતોને સહારો આપે છે. પરંતુ દુષ્ટોને જમીનદોસ્ત કરી નાખે છે.

કુદરતી બનાવોમાં યાહવેનું સામર્થ્ય

⁷ પ્રભુનો આભાર માનતાં માનતાં ગાઓ; વીણા સાથે આપણા ઈશ્વરનાં સ્તવન ગાઓ.

⁸ તે આકાશને વાદળોથી આચ્છાદિત કરે છે; તે પૃથ્વીને માટે વરસાદ તૈયાર કરે છે; તે ડુંગરો પર ઘાસ ઉગાવે છે.

⁹ તે ઢોરોને તેમ જ ખોરાક માટે પોકારતા કાગડાંનાં બચ્ચાને પણ ખોરાક પૂરો પાડે છે.

¹⁰ તે અશ્વદળની શક્તિથી પ્રસન્‍ન થતાં નથી, કે બહાદુર સૈનિકોના પાયદળથી પણ રાજી થતા નથી.

¹¹ પરંતુ તે તો તેમના ભક્તો, એટલે તેમના પ્રેમ પર ભરોસો રાખનારાઓથી જ પ્રસન્‍ન થાય છે.

પોતાના લોકને પોષણ પૂરું પાડનાર પ્રભુ

¹² હે યરુશાલેમ, પ્રભુનું સ્તવન કર; હે સિયોન, તારા ઈશ્વરની સ્તુતિ કર;

¹³ તે તારા દરવાજાઓના આગળિયાઓને સુદૃઢ બનાવે છે;

તે તારા નગરજનોને આશિષ આપે છે.

¹⁴ તે તારી સરહદોને સુરક્ષિત રાખે છે, અને શ્રેષ્ઠ ઘઉંથી તને ભરપૂર કરે છે.

¹⁵ તે પોતાની આજ્ઞા પૃથ્વી પર પાઠવે છે; તેમનો અવાજ તેજ ગતિએ દોડે છે.

¹⁶ તે સફેદ ઊન જેવો બરફ વરસાવે છે, અને રાખની જેમ હિમ વેરે છે.

¹⁷ તે કાંકરા જેવા કરા વરસાવે છે અને તેમની ઠંડીથી પાણી ઠરી જાય છે.

¹⁸ પછી તે આજ્ઞા આપે છે એટલે બરફ પીગળવા માંડે છે; તે પવન મોકલે છે એટલે પાણી વહેવા લાગે છે.

¹⁹ તે યાકોબના વંશજોને પોતાનું શિક્ષણ, એટલે ઇઝરાયલ લોકને પોતાનાં ફરમાનો અને ચુકાદાઓ પ્રગટ કરે છે.

²⁰ ઈશ્વરે બીજી કોઈ પ્રજા સાથે આવો વ્યવહાર રાખ્યો નથી; તેઓ તેમના ચુકાદા જાણતા નથી. યાહની સ્તુતિ કરો: હાલ્લેલૂયાહ! સમગ્ર વિશ્વ યાહવેની સ્તુતિ કરો! યાહની સ્તુતિ કરો: હાલ્લેલૂયાહ!