ગીતશાસ્ત્ર 137 - પવિત્ર બાઇબલ C.L.

બેબિલોનમાં દેશનિકાલ થયેલાઓનું ગીત

(બેબિલોન દેશમાં અવદશા)

¹ બેબિલોનમાં નદીઓને કાંઠે અમે બેઠા; ત્યારે સિયોનની યાદ આવી જતાં અમે રડી પડયા.

² ત્યાંના વૃક્ષો પર અમે અમારા તાનપૂરા ફરી કદી ન બજાવવા ટાંગી દીધા.

³ કારણ, અમને બંદિ બનાવનારા બેબિલોનીઓએ અમને ગીત ગાવા ફરમાવ્યું; અમારા એ જુલમગારોએ અમને કહ્યું, “અમારા મનોરંજન માટે સિયોનનાં ગીતોમાંથી કોઈએક ગીત ગાઓ.”

યરુશાલેમને વીસરવાનો શાપ

⁴ પરંતુ પારકી ભૂમિ પર અમે પ્રભુનું ગીત કેવી રીતે ગાઈએ?

⁵ હે યરુશાલેમ, જો હું તને વીસરી જાઉં; તો મારો જમણો હાથ સુકાઈ જાઓ!

⁶ જો હું તારું સ્મરણ ન કરું, જો હું યરુશાલેમને મારો શ્રેષ્ઠ આનંદ ન માનું; તો મારી જીભ તાળવે ચોંટી જાઓ.

અદોમીઓને શાપ

⁷ હે પ્રભુ, યરુશાલેમના પતનના દિવસે અદોમીઓએ જે કર્યું તેનું સ્મરણ કરી તેમને સજા કરો. તેઓ વારંવાર કહેતા હતા, “પાડી નાખો, પાડી નાખો, યરુશાલેમને પાયા સુદ્ધાં ધરાશાયી કરો.”

બેબિલોન નગરને શાપ

⁸ હે વિનાશક નગરી બેબિલોન, જે બૂરો વ્યવહાર તેં અમારી સાથે કર્યો, તેવો જ વ્યવહાર તારી સાથે કરનારને ધન્ય હો!

⁹ જે તારાં સંતાનોને પકડીને ખડક પર અફાળે તેને ધન્ય હો!