ગીતશાસ્ત્ર 136 - પવિત્ર બાઇબલ C.L.

સર્જનહાર અને ઉદ્ધારક પ્રભુની સ્તુતિ

આભારસ્તુતિ

¹ પ્રભુની આભારસ્તુતિ કરો; કારણ, તે ભલા છે; સાચે જ તેમનો પ્રેમ સાર્વકાલિક છે.

² દેવાધિદેવ ઈશ્વરની આભારસ્તુતિ કરો; સાચે જ તેમનો પ્રેમ સાર્વકાલિક છે.

³ પ્રભુઓના પ્રભુની આભારસ્તુતિ કરો; સાચે જ તેમનો પ્રેમ સાર્વકાલિક છે.

સર્જનહાર પ્રભુની સ્તુતિ

⁴ એકલા તે જ મહાન અને અજાયબ કાર્યો કરે છે; સાચે જ તેમનો પ્રેમ સાર્વકાલિક છે.

⁵ તેમણે પોતાના જ્ઞાનથી આકાશો સર્જ્યાં છે; સાચે જ તેમનો પ્રેમ સાર્વકાલિક છે.

⁶ તેમણે ઊંડી જળરાશિ પર પૃથ્વીને સ્થાપી છે; સાચે જ તેમનો પ્રેમ સાર્વકાલિક છે.

⁷ તેમણે મહાન જ્યોતિઓ એટલે સૂર્ય અને ચંદ્ર સર્જ્યાં; સાચે જ તેમનો પ્રેમ સાર્વકાલિક છે.

⁸ તેમણે દિવસને અજવાળવા સૂર્ય બનાવ્યો; સાચે જ તેમનો પ્રેમ સાર્વકાલિક છે.

⁹ તેમણે રાત્રિને અજવાળવા ચંદ્ર અને તારા બનાવ્યા; સાચે જ તેમનો પ્રેમ સાર્વકાલિક છે.

ઇજિપ્તમાંથી ઉદ્ધાર માટે સ્તુતિ

¹⁰ ઈશ્વરે ઇજિપ્તના પ્રથમજનિતોનો સંહાર કર્યો; સાચે જ તેમનો પ્રેમ સાર્વકાલિક છે.

¹¹ તેમણે ઇઝરાયલીઓને ઇજિપ્તમાંથી મુક્ત કર્યાં; સાચે જ તેમનો પ્રેમ સાર્વકાલિક છે.

¹² પોતાના સમર્થ ભુજ અને ઉગામેલા હાથ વડે તેમને છોડાવ્યા; સાચે જ તેમનો પ્રેમ સાર્વકાલિક છે.

¹³ તેમણે સૂફ સમુદ્રના બે ભાગ કર્યા; સાચે જ તેમનો પ્રેમ સાર્વકાલિક છે.

¹⁴ તેમણે સૂફ સમુદ્રની મધ્યેથી ઇઝરાયલીઓને પાર ઉતાર્યા; સાચે જ તેમનો પ્રેમ સાર્વકાલિક છે.

¹⁵ પણ તેમણે ફેરો તથા તેની સેનાને તે સમુદ્રમાં ડુબાવી દીધાં; સાચે જ તેમનો પ્રેમ સાર્વકાલિક છે.

વચનના પ્રદેશ માટે સ્તુતિ

¹⁶ ઈશ્વરે રણપ્રદેશમાં પોતાના લોકોને દોર્યા; સાચે જ તેમનો પ્રેમ સાર્વકાલિક છે.

¹⁷ તેમણે મહાન રાજાઓનો સંહાર કર્યો. સાચે જ તેમનો પ્રેમ સાર્વકાલિક છે.

¹⁸ અને તેમણે નામાંક્તિ રાજાઓને માર્યા; સાચે જ તેમનો પ્રેમ સાર્વકાલિક છે.

¹⁹ તેમણે અમોરીઓના રાજા સિહોનને માર્યો, સાચે જ તેમનો પ્રેમ સાર્વકાલિક છે.

²⁰ બાશાનના રાજા ઓગને પણ સંહાર્યો; સાચે જ તેમનો પ્રેમ સાર્વકાલિક છે.

²¹ તેમનો પ્રદેશ તેમણે ઇઝરાયલને વારસા તરીકે આપ્યો; સાચે જ તેમનો પ્રેમ સાર્વકાલિક છે.

²² પોતાના સેવક ઇઝરાયલના વંશજોને તે પ્રદેશ વારસામાં આપ્યો; સાચે જ તેમનો પ્રેમ સાર્વકાલિક છે.

પ્રભુના અવિચળ પ્રેમ માટે સ્તુતિ

²³ આપણી નામોશીમાં તેમણે આપણને સંભાર્યા; સાચે જ તેમનો પ્રેમ સાર્વકાલિક છે.

²⁴ આપણા શત્રુઓના હાથમાંથી આપણને છોડાવ્યા; સાચે જ તેમનો પ્રેમ સાર્વકાલિક છે.

²⁵ તે સર્વ જનજનાવરને આહાર આપે છે; સાચે જ તેમનો પ્રેમ સાર્વકાલિક છે.

²⁶ આકાશના ઈશ્વરની આભારસ્તુતિ કરો; સાચે જ તેમનો પ્રેમ સાર્વકાલિક છે.